സുനിത ചേച്ചി എന്തു ധരിച്ചാലും നല്ല ചേലാണ്. പക്ഷേ പുള്ളിക്കാരിയണിഞ്ഞ അതേ തരത്തിലുള്ള ചുരിദാർ ഞാനിട്ടപ്പോൾ ഒരു ഭംഗിയും ഇല്ല. പ്രവീണയുടെ പരാതി.. ചിലപ്പോഴെങ്കിലും നിങ്ങളും ഉന്നയിച്ചിട്ടുണ്ടാവില്ലേ? ഭംഗി തോന്നുന്നത് സുനിത ചേച്ചിയുടെ കുറ്റമല്ല. അത് നിങ്ങളുടെ തന്നെയാണ്. കാരണം, ഓരോ ശരീര പ്രകൃതിയ്ക്ക് ഇണങ്ങുന്ന വസ്ത്രങ്ങൾ തിരഞ്ഞെടുക്കാൻ പഠിക്കണം. തടി തോന്നിപ്പിക്കാനും നീളക്കൂടുതൽ തോന്നാനും തടി തോന്നാതിരിക്കാനും ഉയരം കുറവ് തോന്നിപ്പിക്കാനും വസ്ത്രങ്ങൾക്ക് ചില ഗുട്ടൻസ് ഉണ്ട്.
ശരീര ഷെയ്‌പിന് ക്ലോത്തിംഗ് ടെക്‌നിക്ക്
- സ്വന്തം ഫിഗറിലെ ഏറ്റവും ആകർഷകമായ ഫീച്ചറുകളെ ഹൈലൈറ്റ് ചെയ്യുക.
- ഏറ്റവും ഇണങ്ങുന്ന ലെംഗ്തിലുള്ള വേഷം തെരഞ്ഞെടുക്കാം.
- ഒരേ നിറത്തിലുള്ള ഡ്രസ്സ് തെരഞ്ഞെടുക്കാം. ഉദാ: സാരി ബ്ലൗസ് അല്ലെങ്കിൽ സൽവാർ കമ്മീസ് എന്നിവ ഒരേ നിറത്തിലുളള്ളതായിരിക്കണം. ഇത് ഉയരം കൂടുതൽ തോന്നിപ്പിക്കാൻ സഹായിക്കും.
- വളരെ നേർത്തതും നല്ല മെറ്റീരിയലിലുളളതുമായ ഡ്രസ്സുകൾ തെരഞ്ഞടുക്കാം.
- ചെറിയ പ്രിന്‍റുകളുള്ള വസ്ത്രങ്ങൾ ഉയരക്കൂടുതൽ തോന്നിപ്പിക്കും.
- പ്ലെയിൻ സാരികളും ഡ്രസ്സുകളും അണിയുന്നത് ഉയരവും ആകർഷണീയതയും തോന്നിപ്പിക്കാനുള്ള കുറുക്കു വഴികളാണ്.
- ചെറിയ ബോർഡറുകളുള്ള സാരിയോ ഡ്രെസ്സോ തെരഞ്ഞെടുക്കാം.
- ഡ്രസ്സിന്‍റെ ഒരു ഭാഗത്ത് കോൺട്രാസ്‌റ്റ് കളർ സ്‌റ്റൈൽ അവലംബിക്കാം. ടോപ്പ് ഒരു കളർ, ബോട്ടം മറ്റൊരു കളർ എന്ന രീതി വേണ്ട.
- ഭംഗിയുള്ള നെക്ക് ഡിസൈനുകൾ വഴി വേഷം ആകർഷണീയമാക്കാം.
- ഡ്രസ്സിന്‍റെ അതേ നിറത്തിലുള്ളതും വീതികുറഞ്ഞതുമായ ബെൽറ്റ് തെരഞ്ഞെടുക്കാം.
- ലൈറ്റ് ആന്‍റ് ഡെലിക്കേറ്റ് ജ്വല്ലറി, ആകർഷണീയത പകരും.
- പോയിന്‍റഡ് ഷൂ ധരിച്ചാൽ ഉയരം തോന്നിക്കും.
ഉയരക്കുറവ് തോന്നിപ്പിക്കാൻ
5 അടി 9 ഇഞ്ചിലധികമാണ് ഉയരമെങ്കിൽ സാധാരണയിലപേക്ഷിച്ച് ഉയരം നിങ്ങൾക്ക് ഉണ്ട്. ഇത്തരക്കാരെ സംബന്ധിച്ച് ഇപ്പോഴത്തെ ഫാഷൻ ട്രെൻഡ് നിർഭയം അവലംബിക്കാം. ഉയരക്കുറവ് തോന്നിപ്പിക്കാൻ വേഷത്തിൽ ചില സൂത്രപ്പണികൾ സ്വീകരിക്കേണ്ടി വരും.
- ഒരേ നിറത്തിലുള്ള വേഷം വേണ്ട.
- തോള് ചരിച്ച് നടക്കാതിരിക്കുക.
- താഴോട്ട് വരകളുള്ള ഡ്രസ്സുകൾ അണിയരുത്.
- മുന്നിൽ സ്‌ട്രെയിറ്റ് ബട്ടനുകളുള്ള വേഷം വേണ്ട.
- സ്‌റ്റൈലിഷായ ഫാഷനുകൾ അവലംബിക്കാം.
എന്ത് ധരിക്കാം
- ഒരേ സമയം രണ്ടും മൂന്നും നിറങ്ങളുള്ള ഡ്രസ്സണിയാം.
- റെഡ് ഷർട്ട്, ബ്ലാക്ക് സൽവാർ, മൾട്ടി കളേഡ് ദുപ്പട്ടാ അല്ലെങ്കിൽ റെഡ് ടീഷർട്ട്, റെഡ് ബെൽറ്റ്, ബ്ലാക്ക് ട്രൗസർ, യെല്ലോ ജാക്കറ്റ്… ഇത്തരം വേഷങ്ങൾ അണിയാം. പല നിറങ്ങളിലുള്ള കോമ്പിനേഷൻ ഉയരം കുറച്ചു കാട്ടും.
- ബ്രൈറ്റ് നിറങ്ങളിലുള്ള ഡ്രസ്സുകൾ ധരിക്കാം.
- ലൂസ് ഫിറ്റിംഗിലുള്ള ഡ്രസ്സുകൾ എലഗന്‍റ് ലുക്ക് പകരും.
- ഡബിൾ ബ്രസ്‌റ്റഡ് ഷർട്ടുകൾ, ടോപ്‌സ്, ജാക്കറ്റുകൾ എന്നിവ ഉയരക്കാരെ സംബന്ധിച്ച് അനുഗ്രഹീത വേഷങ്ങളാണ്.
- ബോൾഡ് ഡിസൈനുകളുള്ള ഷോൾ, സാരി, ഡ്രസ്സുകൾ എന്നിവയും ഇത്തരക്കാർക്ക് നന്നായി ഇണങ്ങും.
- വലിയ പാറ്റേണുകളും പ്രിന്‍റുകളുള്ളവയും ധൈര്യമായി തെരഞ്ഞെടുക്കാം.
- കുറുകെ വരകളുള്ള വേഷങ്ങൾ ഉയരക്കുറവ് തോന്നിക്കാൻ സഹായിക്കും.
- ഹെവി ബോൾഡ് ജ്വല്ലറി ഉയരക്കാർക്ക് ഇണങ്ങും.
- ഏത് സൈസിലും ഷെയ്‌പിലുമുള്ള ബെൽറ്റുകൾ ഇണങ്ങും.
- കോൺട്രാസ്‌റ്റ് കളർ ലെയറുകളും പ്രിന്‍റുകളും ഉയരക്കാരുടെ വേഷവിധാനത്തെ ആകർഷകമാക്കും.
സ്ലിം ലുക്കിന്
സ്ലിം ആന്‍റ് സ്‌മാർട്ട് ലുക്ക് വേണമെന്ന് ആഗ്രഹിക്കുന്നവരാണല്ലോ എല്ലാവരും. എന്നാൽ എല്ലാവർക്കും ആകർഷകമായ ശരീരഘടന കിട്ടണമെന്നുമില്ല. അല്‌പം തടിച്ച ശരീരപ്രകൃതം ആകർഷണീയതയ്‌ക്ക് തടസ്സമായി തീരണമെന്നുമില്ല.
- ഒരേ സമയം വ്യത്യസ്‌ത നിറങ്ങളിലുള്ള വേഷമണിയരുത്. അത് വണ്ണം തോന്നിപ്പിക്കും.
- അമിതമായി ഇറുക്കമുള്ള വേഷങ്ങൾ അരുത്. ശരീരഭാഗങ്ങൾ തള്ളി നിൽക്കുന്ന പ്രതീതി സൃഷ്‌ടിക്കും.
- ഒരേ നിറത്തിലുള്ള സാരിയും ബ്ലൗസ്സും ഷർട്ടും ജീൻസും സൽവാറും കമ്മീസും ധരിക്കാം.
- താഴോട്ട് വരകളുള്ള (സ്ട്രൈപ്സ്) ഡിസൈനുകൾ ശരീരം സ്ലിമ്മായി തോന്നിപ്പിക്കും.
- വളരെ ലൈറ്റായ ഷെയ്‌ഡിലുള്ള വേഷങ്ങൾ ധരിക്കുന്നത് വണ്ണം തോന്നിപ്പിക്കും. പകരം മീഡിയം, ഡാർക്ക് ഷെയ്‌ഡിലുള്ളവ തെരഞ്ഞെടുക്കാം.
- അരക്കെട്ടിനെ എടുത്തുകാട്ടും വിധമുള്ള ഡിസൈനുകൾക്ക് പകരം കംഫർട്ടബിൾ സൈസിലുള്ള വേഷങ്ങൾ ചൂസ് ചെയ്യാം.
- ഒരേ കളറിന്‍റെ പല ഷെയ്‌ഡുകൾ ട്രൈ ചെയ്‌തു നോക്കാം.
- ജീൻസു പോലെയുള്ള വേഷങ്ങളാണ് ധരിക്കുന്നതെങ്കിൽ ഹിപ്പ് ഏരിയാ കവർ ചെയ്യുന്ന തരത്തിലുള്ള ജാക്കറ്റോ ലോംഗ് ഗൗണോ ധരിച്ച് സ്‌റ്റൈലിഷാകാം.
ഉയരം കൂട്ടാൻ
അഞ്ചടിയിൽ താഴെ ഉയരമുള്ളവരെ സംബന്ധിച്ച് പൊക്കം തോന്നിപ്പിക്കണമെന്നത് ഒരാഗ്രഹമായിരിക്കുമല്ലോ? ഉയരം തോന്നിപ്പിക്കാൻ നീളൻ വസ്ത്രങ്ങൾ അണിയുകയും നീളമുള്ള ചെരിപ്പ് ധരിക്കുകയും വേണ്ട. വസ്‌ത്രധാരണ കാര്യങ്ങളിൽ ശ്രദ്ധിച്ചാൽ മതി.
- കടും നിറങ്ങളിലുള്ള വസ്‌ത്രം ധരിക്കാതിരിക്കുക.
- യോജിക്കാത്ത ഇറക്കമുള്ള ഫാഷനബിൾ വേഷങ്ങൾ ധരിക്കേണ്ടതില്ല.
- കുറുകെ വരയുള്ള വസ്ത്രങ്ങൾ ഒഴിവാക്കാം.
- വീതിയേറിയ ബോർഡറുള്ള സാരിയൊഴിവാക്കാം.
- കട്ടികൂടിയതും വീതിയേറിയതുമായ ആഭരണങ്ങൾ വേണ്ടേ വേണ്ട.
- വലിയ പ്രിന്‍റുള്ള വസ്‌ത്രങ്ങളും ഒഴിവാക്കുക.
വണ്ണം കൂട്ടാൻ
- ഒരേ നിറത്തിലുള്ള വേഷം ധരിക്കരുത്. അത് നിങ്ങളെ ഒന്നുകൂടി മെലിഞ്ഞതാക്കും.
- വെർട്ടിക്കൽ സ്ട്രൈപ്സ്, പ്ലീറ്റുകൾ വേണ്ട.
- അമിതമായി ഇറുക്കമുള്ള വസ്ത്രങ്ങൾ ധരിക്കരുത്.
- ലൈറ്റ്, ബ്രൈറ്റ് കളറുകൾ ഇത്തരം ശരീര പ്രകൃതക്കാർക്ക് ഏറെ ഇണങ്ങും.
- വലിയതും ബോൾഡായതുമായ ഡിസൈനുകൾ സെലക്‌റ്റ് ചെയ്യാം.
- ഹെവി ഫാബ്രിക്കുകൾ ഇണങ്ങും.
- കോൺട്രാസ്‌റ്റ് കളറുകൾ, പ്രിന്‍റുകൾ, പാറ്റേണുകൾ എന്നിവ പരീക്ഷിക്കാം.
- ഒരു സൈസ് വലുതായ ഔട്ട് ഫിറ്റുകൾ തെരഞ്ഞെടുക്കാം.
- പല ലെംഗ്തുകളിലുള്ള ഷർട്ടുകൾ, ടോപ്‌സ്, സ്‌കർട്ടുകൾ പരീക്ഷിച്ചു നോക്കാം. ശരീരത്തിന് വണ്ണം തോന്നിപ്പിക്കുക മാത്രമല്ല ഷോർട്ട് ലുക്ക് നൽകുകയും ചെയ്യും.
- തീം ജ്വല്ലറി നിങ്ങൾക്കേറെ ഇണങ്ങും.
- വേഷവിധാനത്തിൽ രാജസ്‌ഥാനി, പഞ്ചാബി തുടങ്ങിയ സ്‌റ്റൈലുകൾ പരീക്ഷിച്ചു നോക്കാം.
