തെക്കേ അമേരിക്കയിൽ ഉത്ഭവിച്ച് ലോകം മുഴുവൻ ഒരു വള്ളി പോലെ പടർന്നു കയറിയ കഥയാണ് പഴവർഗ്ഗത്തിലെ തിമിംഗലം എന്നു വിളിക്കാവുന്ന പാഷൻ ഫ്രൂട്ടിനുള്ളത്. നിരവധി പോഷക ഘടകങ്ങളാൽ സമ്പന്നമായ പാഷൻ ഫ്രൂട്ടിന്‍റെ ഗുണങ്ങൾ എത്ര പറഞ്ഞാലും തീരില്ല. നമ്മുടെ നാട്ടിൽ സുലഭമായ പാഷൻ ഫൂട്ട് ബോഞ്ചിക്ക, വള്ളി നാരങ്ങ, മുസ്സോളിങ്ങ, സർബത്തും കായ എന്നീ പേരുകളിലും അറിയപ്പെടുന്നു. ഉഷ്ണമിതോഷ്ണ മേഖലകളിലാണ് ഇത് സാധാരണയായി വളരുന്നത്. കേരളത്തിലും ഇന്ത്യയുടെ വടക്കുക്കിഴക്കൻ സംസ്ഥാനങ്ങളിലും ഇടവിളയായും വാണിജ്യ അടിസ്‌ഥാനത്തിലും പാഷൻ ഫ്രൂട്ട് വ്യാപകമായി കൃഷി ചെയ്യുന്നുണ്ട്. പഴത്തിലും തൊണ്ടിലും കുരുവിലും നിത്യയൗവനത്തിന്‍റേയും രോഗപ്രതിരോധത്തിന്‍റേയും അമൂല്യ ഘടകങ്ങൾ ഒളിപ്പിച്ചു വച്ചിരിക്കുന്ന പാഷൻ ഫ്രൂട്ടിനെക്കുറിച്ച് കൂടുതലറിയാം.
ഔഷധ ഗുണങ്ങൾ
പുരാതനകാലം മുതൽ ഉറക്കമില്ലായ്മക്കും മനസംഘർഷത്തിനും ഔഷധമായി പാഷൻ ഫ്രൂട്ട് ജ്യൂസ് ഉപയോഗിച്ചു വരുന്നു. വിറ്റാമിനുകളാലും, മിനറലുകളാലും ആന്‍റി ഓക്‌സിഡന്‍റുകളാലും നിറഞ്ഞ പാഷൻ ഫ്രൂട്ടിൽ ഇരുമ്പ്, മഗ്നീഷ്യം, ഫോസ്ഫറസ്, പൊട്ടാസ്യം, കോപ്പർഫൈബർ, പ്രൊട്ടീൻ എന്നിവ അടങ്ങിയിരിക്കുന്നു.
- രക്തസമ്മർദ്ദം, ആസ്തമ എന്നിവയ്ക്ക് പരിഹാരമാണ് പാഷൻ ഫ്രൂട്ട്. ദിവസവും പാഷൻ ഫ്രൂട്ട് ജ്യൂസ് കുടിക്കുന്നത് രക്തസമ്മർദ്ദം സാധാരണ നിലയിലാക്കാൻ സഹായിക്കും.
- ദഹനത്തിന് പാഷൻ ഫ്രൂട്ട് ഉത്തമമാണ്.
- വിറ്റാമിൻ എ യുടെ സ്രോതസ്സായ പാഷൻ ഫ്രൂട്ട് കാഴ്ച ശക്‌തി വർദ്ധിപ്പിക്കാൻ സഹായിക്കും.
- പൊട്ടാസ്യം പാഷൻ ഫ്രൂട്ടിൽ ധാരാളം അടങ്ങിയിട്ടുള്ളതിനാൽ ഹൃദയാരോഗ്യത്തിന് ഉത്തമമാണ്.
- വിറ്റാമിൻ സിയുടെ സാന്നിദ്ധ്യമുള്ളതിനാൽ പനി, ജലദോഷം എന്നിവയെ ചെറുക്കും.
- ആസ്തമ, മൈഗ്രേൻ എന്നിവയുടെ ചികിത്സയ്ക്കും പാഷൻ ഫ്രൂട്ട് ഫലപ്രദമാണ്.
- പാഷൻ ഫ്രൂട്ടിന്‍റെ ഇലകളിട്ടു വെള്ളം തിളപ്പിച്ചു കുടിച്ചാൽ പ്രമേഹം നിയന്ത്രിക്കാം.
- ക്ഷീണവും തളർച്ചയും മാറാനും രക്‌തത്തിലെ കൗണ്ട് വർദ്ധിപ്പിക്കുവാനും പാഷൻ ഫ്രൂട്ട് സഹായിക്കും.
ഡെങ്കി പോലുള്ള പനികൾ വ്യാപകമായപ്പോഴാണ് എല്ലാവരും പാഷൻഫ്രൂട്ടിനെ തിരിച്ചറിഞ്ഞു തുടങ്ങിയത്.
വാണിജ്യ ഉൽപന്നങ്ങൾ
പഴച്ചാറുകൾക്ക് മണവും നിറവും നൽകാൻ പാഷൻ ഫ്രൂട്ട് വ്യാപകമായി ഉപയോഗിക്കുന്നുണ്ട്. ജ്യൂസ്, സിറപ്പ്, വൈൻ, സ്ക്വാഷ്, ജെല്ലി എന്നിവയുണ്ടാക്കാം. പാഷൻ ഫ്രൂട്ടിന്‍റെ പുറം തോടു കൊണ്ട് അച്ചാർ തയ്യാറാക്കാറുണ്ട്. മൂക്കുന്നതിനു മുമ്പ് പറിച്ചെടുത്ത് പല പാചകവിധികളിലും പുളിക്ക് പകരം ചേരുവയായും ഉപ്പ്, കാന്താരിമുളക് എന്നിവ ചേർത്ത് ചമ്മന്തിയുണ്ടാക്കാനും പാഷൻ ഫ്രൂട്ട് ഉപയോഗിക്കുന്നു. നിറവും മണവും കൂട്ടാൻ രാസവസ്‌തുക്കളൊന്നും ആവശ്യമില്ലെന്നതാണ് പാഷൻ ഫ്രൂട്ട് ജ്യൂസിന്‍റെ പ്രത്യേകത.
മഞ്ഞയും പർപ്പിളും
അഞ്ഞൂറോളം വ്യത്യസ്‌തയിനം പാഷൻ ഫ്രൂട്ടുകൾ ഇന്ന് ലോകത്തുണ്ട്. കേരളത്തിൽ പൊതുവേ കാണപ്പെടുന്നത് മഞ്ഞയും പർപ്പിളും നിറത്തിലുള്ളവയാണ്. ഈ രണ്ടു നിറത്തിലുള്ള പാഷൻ ഫ്രൂട്ടിനും രുചിയിൽ വ്യത്യാസമുണ്ട്. മഞ്ഞ നിറത്തിലുള്ള പഴത്തിന് പുളിരസമാണ് മേമ്പൊടി. എന്നാൽ നല്ല പോലെ പാകമായ മുന്തിരി പോലുള്ള പർപ്പിൾ പാഷൻ ഫ്രൂട്ടിന് കടും മധുരമാണ്. അതായത് പഞ്ചസാര വേണ്ടന്നർത്ഥം. പച്ച നിറത്തിലുള്ള കായകൾ പഴുക്കുമ്പോഴാണ് നിറം മാറുന്നത്. പർപ്പിൾ നിറത്തിലുള്ള പഴം പാകമായി തൊണ്ട് ചുളിഞ്ഞ് തുടങ്ങിയാൽ കാമ്പ് നല്ല മധുരമായെന്ന് മനസ്സിലാക്കാം.
കൃഷി ചെയ്യുന്ന രീതി
വള്ളികൾ മുറിച്ചു നട്ടും വിത്തുകളു പയോഗിച്ചും വംശ വർദ്ധന നടത്താവുന്നതാണ്. വള്ളി മുറിച്ചു നടുന്ന തൈകളാണ് ആദ്യം കായ്കൾ തരിക. വിത്തുകളുപയോഗിക്കുമ്പോൾ രണ്ടു ദിവസം വെള്ളത്തിൽ കുതിർത്ത് വച്ചിട്ട് പാകണം. ഏഴടി ഉയരത്തിൽ പന്തലിട്ടു പടർത്തുകയോ മരങ്ങളിൽ പടർത്തുകയോ ചെയ്യാം. തൈകൾ നട്ട് ഒരു വർഷത്തിനകം കായ്ച്ചു തുടങ്ങും.
ലോക വിപണിയിൽ പാഷൻ ഫ്രൂട്ടിന് ഡിമാൻഡ് കൂടുകയാണ്. പ്ലാസിഫോറ കുടുംബത്തിൽ നിന്നുള്ള പാഷൻ ഫ്രൂട്ടിൽ നിന്നും വേർതിരിച്ചെടുക്കുന്ന പ്ലാസിഫോറിൻ എന്ന ഘടകത്തിന് ഹൈപ്പർ ടെൻഷനെ നിയന്ത്രിക്കാൻ കഴിയുമെന്നുള്ള പഠനങ്ങൾ പുറത്തു വന്നിട്ടുണ്ട്. നേരിട്ടോ, ജ്യൂസായോ, ജെല്ലിയായോ പാഷൻ ഫ്രൂട്ട് സ്‌ഥിരമായി കഴിച്ചുകൊണ്ട് നമ്മുടെ ശരീരത്തിലുണ്ടാകുന്ന അദ്ഭുത കരമായ മാറ്റം സ്വയം തിരിച്ചറിയാം.
പാഷൻ ഫ്രൂട്ട് ചമ്മന്തി
തയ്യാറാക്കുന്ന വിധം
നന്നായി പഴുത്ത് മഞ്ഞനിറമായ പഴം തൊണ്ടോടെ നുറുക്കിയത് – രണ്ട്
കാന്താരിമുളക് – എട്ടെണ്ണം
കറിവേപ്പില – ഒരുപിടി നിറയെ
പാകത്തിന് ഉപ്പ്
ഇവയെല്ലാം കൂടെ മിക്‌സിയുടെ ചെറിയ ജാറിലിട്ട് നന്നായി അരച്ചെടുത്തതിനു ശേഷം ആവശ്യമെങ്കിൽ എക്സ്ട്രാ വിർജിൻ ഒലീവ് ഓയിൽ ഒന്നോ രണ്ടോ ടേബിൾ സ്പൂൺ ചേർക്കാം.
