നിനച്ചിരിക്കാത്ത നേരത്തായിരിക്കും ഈ അതിഥികളുടെ വരവ്. അതും ക്ഷണിക്കപ്പെടാത്ത അതിഥികൾ ഉറുമ്പുകളെ കുറിച്ചാണ് പറയുന്നത്. ഭക്ഷണം കണ്ടാൽ എവിടെയും പാഞ്ഞെത്തും ക്ഷണിക്കാത്ത ഈ അതിഥികൾ. ഇവരെ തുരത്താൻ കീടനാശിനി പ്രയോഗം ഒന്നും വേണ്ട. വീട്ടിലെ ചില സാമഗ്രികൾ കൊണ്ടു തന്നെ ചെയ്യാം.
പൊദിനയില : സ്വന്തം ഭാരത്തിന്‍റെ 50 ഇരട്ടിഭാരം ഉയർത്താൻ ഉറുമ്പുകൾക്ക് കഴിയും. പൊദിന ഇല ചെറുതായി അരിഞ്ഞ് അൽപം മധുരമോ മറ്റോ ചേർത്ത് ഉറുമ്പിൻ കൂട്ടത്തിലേക്ക് ഇട്ടു കൊടുക്കുക. ഉറുമ്പുകൾ പൊദിനയില തിന്നാൽ ചത്തു പോകും.
സോപ്പ് ലായനി : ഉറുമ്പുകളെ വേഗം തുരത്താനുള്ള മറ്റൊരു ഉപായമാണിത്. ഒരു സ്പൂൺ ലിക്വിഡ് സോപ്പ് അല്ലെങ്കിൽ കുറച്ചു സോപ്പ് ചുരണ്ടി എടുത്ത് വെള്ളവുമായി ചേർത്ത് ഒരു ബോട്ടിലിൽ നിറച്ചു വയ്‌ക്കുക. ഈ ലായനി ഉപയോഗിച്ച് വീടിന്‍റെ ജനലുകൾ, വാതിലുകൾ തുടങ്ങി ദ്വാരങ്ങൾ വീഴാൻ ഇടയുള്ള ഭാഗങ്ങളിൽ ഒഴിക്കുക. തുടച്ചു കളയരുത്. ഭക്ഷണത്തിന്‍റെ സുഗന്ധം ഇതിലൂടെ ഇല്ലാതാകും. ഉറുമ്പുകൾ അവിടം വിട്ടുപോകുകയോ സോപ്പ് ലായനിയിൽ പെട്ട് ചത്തുപോകുകയോ ചെയ്യും.
കോൺമീൽ : മനുഷ്യർക്കും മൃഗങ്ങൾക്കും നല്ല സാധനമാണിതെങ്കിലും ഉറുമ്പുകൾക്ക് ഹാനികരമാണ്. ഇവയും പ്രയോഗിക്കാം.
ചോക്ക് പൊടി, ബേബി പൗഡർ : ഉറുമ്പുകളെ ഓടിക്കാനുള്ള പഴയ ഒരു ഉപായമാണ് ഇവ രണ്ടും. കിടപ്പുമുറിയിലും മറ്റും കൂടെക്കൂടെ ഉറുമ്പു ശല്യം ഉണ്ടെങ്കിൽ ബേബി പൗഡർ മികച്ച പ്രതിവിധിയാണ്.
കണ്ടെയ്നറും പരന്ന പാത്രവും : ഭക്ഷണത്തിൽ ഉറുമ്പു കയറുന്നതാണ് പ്രശ്നമെങ്കിൽ എയർടൈറ്റ് കണ്ടെയ്നറിൽ ഭക്ഷണം സൂക്ഷിച്ചിട്ട് അതൊരു പാത്രത്തിൽ വയ്‌ക്കുക. ഈ പാത്രം അങ്ങനെ തന്നെ മറ്റൊരു പരന്ന പാത്രത്തിൽ വെള്ളം എടുത്ത് അതിൽ വയ്‌ക്കാം.
വിനാഗിരി : ഭക്ഷണത്തിന് സ്വാദ് കിട്ടാൻ മാത്രമല്ല വിനാഗിരി ഉപയോഗിക്കുന്നത്. ഉറുമ്പിനെ ഓടിക്കാനും ഇതുകൊണ്ട് ഒരു പ്രയോഗമാകാം. ബാക്‌ടീരിയകളെയും കീടാണുക്കളെയും അകറ്റാൻ വിനാഗിരിക്ക് പ്രത്യേക കഴിവുണ്ട്. ഇതിന്‍റെ രൂക്ഷഗന്ധം നിമിത്തം ഉറുമ്പുകൾ ഇവയുടെ അടുത്തേക്ക് വരില്ല. കുറച്ചു വെള്ളത്തിൽ വിനീഗരി ഒഴിച്ച് തുണി മുക്കി തുടച്ചാൽ വൃത്തിയാകും.
ഭക്ഷണാവശിഷ്‌ടം നീക്കിക്കളയുക : ഫ്രിഡ്ജ് തുറക്കുമ്പോഴൊ, ഭക്ഷണം പകരുമ്പോഴൊ, കഴിക്കുമ്പോഴൊ ഒക്കെ ഭക്ഷണം താഴെ വീഴുക സ്വാഭാവികമാണ്. ഇങ്ങനെ വീഴുന്ന ഭക്ഷണത്തിന്‍റെ ചെറിയ തരി പോലും ഉറുമ്പ് ശല്യം ഉണ്ടാക്കും. അകത്തളങ്ങളിലും വരാന്തയിലും ഭക്ഷണാവശിഷ്ടങ്ങൾ ഒന്നും വീഴാതെ നോക്കിയാൽ ഉറുമ്പ് ശല്യം തീർത്തും കുറയ്ക്കാം.
കാലാവസ്‌ഥ : കാലാവസ്‌ഥയുടെ മാറ്റം കൊണ്ടും ഉറുമ്പ് ശല്യം ഉണ്ടാകാം. മഴക്കാലത്തും അതികഠിനമായ വേനലിലും ഉറുമ്പ് ശല്യം വീടിനകത്ത് കൂടിക്കാണാറുണ്ട്. അത്തരം അവസരങ്ങളിൽ പരമാവധി ഇത്തരത്തിലുള്ള പ്രയോഗങ്ങൾ നടത്തി നോക്കൂക.
