കാക്കനാട് കളക്ട്രേറ്റിലാണ് ഷീനയുടെ ജോലി. എന്നും രാവിലെയും വൈകിട്ടും വീട്ടിൽ നിന്ന് ജോലി സ്ഥലത്തേക്കും തിരിച്ചും രണ്ട് മണിക്കൂർ ബസ്സ് യാത്രയുണ്ട്. അവധി ദിവസങ്ങളെത്തുമ്പോൾ ഉറങ്ങാനാണ് ഷീനയ്ക്കിഷ്ടം. വീട്ടിൽ എട്ടും പത്തും വയസ്സുള്ള കുട്ടികളുണ്ട്. അതുപോലെ ഭർത്താവിന്‍റേയും അച്‌ഛനമ്മമാരുടേയും കാര്യങ്ങൾ നോക്കണം. വീട്ടിലെ മറ്റു ചുമതലുകളും പിന്നെ ജോലിയും ദിവസേനയുള്ള യാത്രയും കൂടിയാവുമ്പോൾ താനിതൊക്കെ എങ്ങനെ മാനേജ് ചെയ്യുന്നുവെന്ന് ഷീന ഇടയ്ക്കിടെ സ്വയം അത്ഭുതപ്പെടാറുണ്ട്.
ഇന്നത്തെ നാഗരിക സമൂഹത്തിൽ ഷീനയെപ്പോലെ തന്‍റേതായ ആഗ്രഹങ്ങളും ഇഷ്‌ടങ്ങളും മാറ്റിവച്ച് കുടുംബത്തിനു വേണ്ടി കഷ്ടപ്പെടുന്ന ധാരാളം സ്ത്രീകളുണ്ട്. കുട്ടികളും മുതിർന്നവരും അടങ്ങുന്ന കുടുംബത്തിന്‍റെ എല്ലാ കാര്യങ്ങളിലും ശ്രദ്ധ ചെലുത്തേണ്ട ഉത്തരവാദിത്വം പൊതുവേ ഭർത്താക്കന്മാരേക്കാൾ ഭാര്യമാരിലേക്കാണ് എത്തിച്ചേരുക.
ഇതിനിടയിൽ തന്നെ വേണ്ടത്ര ശ്രദ്ധിക്കുന്നില്ല, മുമ്പത്തെപ്പോലെ സ്നേഹമില്ല, എന്തോ ഇഷ്‌ടക്കുറവുള്ളത് പോലെ, സെക്‌സിൽ താൽപര്യം കാട്ടുന്നില്ല എന്നെല്ലാമുള്ള ഭർത്താക്കന്മാരുടെ പരാതികളാണ് ജോലി ചെയ്യുന്ന സ്ത്രീകളെ ഏറ്റവുമധികം മുഷിപ്പിക്കുന്നത്.
ഭാര്യമാർ അമാനുഷിക ശക്തിയുള്ള സൂപ്പർ വുമൺ അല്ല എന്നുള്ളത് ഭർത്താക്കന്മാർ ഓർക്കണം. ഇതൊക്കെയാണെങ്കിലും ജോലി, കുടുംബം എന്നതിനപ്പുറത്തേക്ക് ഭർത്താവുമൊത്തുള്ള റൊമാന്‍റിക് മൂഡ് തിരിച്ചു പിടിക്കാൻ ചില എളുപ്പവഴികളുണ്ട്.
യാത്രകൾ ഉപകരിക്കും
ദൂരയാത്രകൾക്ക് സമയം കിട്ടിയില്ലെങ്കിലും മാസത്തിൽ ഒന്നോ രണ്ടോ തവണ തൊട്ടടുത്ത ടൂറിസ്റ്റ് സ്പോട്ടുകളിലേക്ക് പോകാം. പാർക്കും ബീച്ചുമൊക്കെ ഈ യാത്രയിൽ ഉൾപ്പെടുത്താം. കുട്ടികളെ അവരുടെ കളികളിൽ മുഴുകാനനുവദിക്കുക. യാത്രയിൽ ഭാര്യയും ഭർത്താവും മാത്രമായി തനിച്ചു കിട്ടുന്ന സന്ദർഭങ്ങളിൽ തോളിലോ മടിയിലോ ചാരിയിരുന്ന് ഇതുവരെയുള്ള ജീവിതത്തെക്കുറിച്ച് സംസാരിക്കുക. രസകരമായ സംഭവങ്ങളെ സംസാരത്തിനിടയിൽ ഓർത്തെടുക്കാം. കൈകോർത്ത് നടക്കാൻ മടി കാണിക്കരുത്.
സർപ്രൈസുകൾ
ചെറിയ സർപ്രൈസുകൾ ആരാണ് ഇഷ്ടപ്പെടാത്തത്. വൈകുന്നേരം കോഫി ബ്രേക്കിന് ഒരുമിച്ച് കൂടാം. ഭർത്താവിന്‍റെ ജോലി സ്ഥലത്ത് പെട്ടെന്നൊരു സന്ദർശനം നടത്തി ഒരു ട്രീറ്റ് പ്ലാൻ ചെയ്യാം. വീട്ടിലേക്ക് ഒരുമിച്ച് യാത്ര ചെയ്യാൻ ശ്രമിക്കാം. ബന്ധങ്ങളിലെ ഇഴയടുപ്പം കൂട്ടാനും പങ്കാളി തന്‍റെ അരികിലുണ്ടെന്ന തോന്നലെപ്പോഴും കൂടെയുണ്ടാകാനും ഇത്തരം പ്രവൃത്തികളിലൂടെ സാധിക്കും.
മസാജുകൾ
അവധി ദിവസങ്ങളിൽ ടിവി ആസ്വദിക്കുന്ന നേരത്ത് നല്ലൊരു മസാജ് ആയാലോ. പ്രണയപൂർവ്വം കൈകളിലും കാലിലും ശരീരവടിവുകളിലും മസാജ് ചെയ്യുന്നത് വളരെ നല്ലതാണ്. ഭാര്യയും ഭർത്താവും പരസ്പരം മസാജ് ചെയ്യുന്നത് പുതിയൊരു അനുഭവമായിരിക്കും. കണ്ണിൽ കണ്ണിൽ നോക്കിയിരുന്ന് ശാരീരികവും മാനസികവുമായ ആനന്ദത്തെ തിരികെ വിളിക്കൂ.
ലൈംഗിക ജീവിതം
കുടുംബത്തിലെ തിരക്കുകൾക്കിടയിലും സ്നേഹത്തിന് ആക്കം കൂട്ടുന്നത് ലൈംഗിക ജീവിതമാണ്. പുരുഷന്മാർ പൊതുവെ പെട്ടെന്നുള്ള ലൈംഗിക ബന്ധങ്ങൾ ഇഷ്‌ടപ്പെടുന്നവരാണ്. എപ്പോഴും ഭർത്താവ് തന്നെ മുൻകൈ എടുക്കാതെ ഭാര്യയ്ക്കും താൽപര്യം കാണിക്കാം. ഭർത്താവ് സ്‌ഥിരമായി ലൈംഗിക ബന്ധത്തിന് വരുന്ന സമയത്തിന് കാത്തുനിൽക്കാതെ വ്യത്യാസം വരുത്താം. വേഷത്തിലും ഭക്ഷണത്തിലും ലൈംഗിക സംതൃപ്തി കിട്ടുന്ന വിധത്തിൽ മാറ്റങ്ങൾ വരുത്താം.
അണിഞ്ഞൊരുങ്ങാം
ആഘോഷങ്ങൾക്ക് പങ്കെടുക്കാനല്ലാതെ ഭർത്താവിനു വേണ്ടിയും ഒരുങ്ങാം. അത് ചിലപ്പോൾ നല്ലൊരു ഫേഷ്യലാകാം. നല്ല പോലെ കണ്ണുകൾ എഴുതിയിട്ടാകാം അല്ലെങ്കിൽ ചെറിയ മേക്കപ്പോ നല്ലൊരു വസ്‌ത്രമോ ആകാം. പെർഫ്യൂമുകൾ അനുയോജ്യമായത് കണ്ടെത്തുന്നത് റൊമാൻസിന് നല്ലതാണ്.
ഒന്നിച്ചൊരു സിനിമയും ഡിന്നറും
ജോലിയിൽ നിന്ന് അവധിയെടുത്തോ അല്ലെങ്കിൽ വീട്ടിൽ മറ്റു തിരക്കുകളില്ലാത്ത ദിവസം കണ്ടെത്തിയോ ഭാര്യയും ഭർത്താവും മാത്രമായി ഒരു സിനിമ പ്ലാൻ ചെയ്യാം. മുമ്പ് സിനിമയ്ക്കു പോയ നിമിഷങ്ങളുടെ മധുരാനുഭവങ്ങൾ തിരിച്ച് വരട്ടെ. ഇതുപോലെ തന്നെ ഏതെങ്കിലും നല്ലൊരു റെസ്റ്റോറന്‍റിൽ ഡിന്നറിനു പ്ലാൻ ചെയ്യാം. ഭക്ഷണം കഴിക്കുന്ന സമയത്ത് ടേബിളിനരികിലെ പേപ്പർ നാപ്കിനെടുത്ത് പ്രണയ സന്ദേശങ്ങൾ എഴുതി കൈമാറുന്നത് പുതിയൊരു അനുഭൂതി നൽകും. തിരിച്ച് വീട്ടിലെത്തുമ്പോഴേക്കും നിങ്ങൾക്കിടയിൽ നല്ലൊരു മൂഡ് സൃഷ്ടിക്കാൻ ഇത്തരം കൊച്ചു ഹാംഗ് ഔട്ടുകൾക്ക് സാധിക്കും.
താൽപര്യങ്ങളെ കൂട്ടുപിടിക്കാം
ഭർത്താവിന് സ്പോർട്സിലും പൊളിറ്റിക്‌സിലും മാത്രമേ താൽപര്യമുള്ളൂ എന്ന് പറഞ്ഞ് അവഗണിക്കരുത്. അവരുടെ കൂടെയിരുന്ന് ക്രിക്കറ്റോ, ഫുട്ബോളോ കാണുകയോ, വാർത്തകളെക്കുറിച്ച് ചോദിച്ചറിഞ്ഞ് താൽപര്യം പ്രകടിപ്പിക്കുകയോ ചെയ്യാം. പരസ്പരം ഇഷ്‌ടങ്ങൾ ഭാര്യയ്ക്കും ഈ അവസരങ്ങളിൽ തുറന്നു പറയാം.
അഭിപ്രായങ്ങൾ പറയാം
ഇലക്ട്രോണിക്ക് ഗാഡ്ജറ്റുകളിൽ സമയം ചെലവഴിക്കുന്നതിന് പകരമായി നല്ലൊരു ചർച്ചയാവാം. ഭാര്യയ്ക്കും ഭർത്താവിനും വിവിധ താൽപര്യങ്ങളുണ്ടാകാം. പക്ഷേ അതിനെക്കുറിച്ചെല്ലാം പരസ്പരം ആശയവിനിമയം നടത്തിയാൽ തമ്മിൽ തമ്മിൽ ഒത്തൊരുമ വർദ്ധിക്കും.
