കൊറോണയുടെ പിടിയിൽ കരിയർ പെട്ടുപോയെങ്കിലും 2020 ൽ കുടുംബം കെട്ടിയുയർത്താൻ ഈ താരങ്ങൾക്ക് കഴിഞ്ഞു. അതിന്‍റെ സന്തോഷ വാർത്ത അവർ പുറത്തു വിടുകയും ചെയ്തു. 2020 ൽ, മുൻ വർഷങ്ങളെ അപേക്ഷിച്ച് ജീവിതത്തിൽ വലിയ മാറ്റങ്ങൾ ഉണ്ടായി. അത് ഉയർച്ചയും താഴ്ചയും എല്ലാം ആകാം. അച്‌ഛനും അമ്മയും ആകുക എന്ന ഉത്തരവാദിത്തം സ്വസ്‌ഥമായി നിറവേറ്റാൻ പലർക്കും ലോക്ക്ഡൗൺ വേളയിൽ കഴിഞ്ഞു എന്നതും വാസ്തവമാണ്. ലോക്ക്ഡൗൺ വേളയിൽ അങ്ങനെയൊരു ശ്രമം നടത്തി കുഞ്ഞതിഥികളെ വീട്ടിലേക്ക് കൂട്ടിയ സെലിബ്രിറ്റികളെ അറിയാം.
കരീന കപൂർ ഖാൻ – സെയ്ഫ് അലിഖാൻ
ബോളിവുഡിലെ പവർ കപ്പിൾ ആണ് കരീന കപൂറും സെയ്ഫ് അലിഖാനും. തങ്ങളുടെ രണ്ടാമത്തെ കുഞ്ഞിനെ ഉടനെ വരവേൽക്കാനുള്ള തയ്യാറെടുപ്പിലാണ് ഈ ദമ്പതികൾ. കരീന ഔദ്യോഗികമായിത്തന്നെ തന്‍റെ വ്യക്‌തിപരമായ ജീവിതത്തിലെ സന്തോഷ മുഹൂർത്തം ആരാധകരുമായി പങ്കുവച്ചിരിക്കുന്നു. തൈമൂറിന് ഉടനെ ഒരു സഹോദരൻ, സഹോദരി എത്താൻ പോകുന്നു എന്നാണ് അവർ അറിയിച്ചത്. മീഡിയക്കു മുന്നിലെ പുതിയൊരു സ്റ്റാർ ആകും ആ കുഞ്ഞും.
അനുഷ്ക ശർമ്മ – വിരാട് കോഹ്‍ലി
പ്രശസ്ത താരവും ഇന്ത്യൻ ക്രിക്കറ്റർ വിരാട് കോഹ്‍ലിയുടെ ഭാര്യയുമായ അനുഷ്ക ശർമ്മയും തന്‍റെ മദർഹുഡിലേക്കുള്ള യാത്രയിലാണ്. ഇൻസ്റ്റഗ്രാമിൽ അനുഷ്കയുടെ ബേബി ബംബ് തലോടുന്ന ചിത്രം പങ്കു വച്ചാണ് വിരാട് ഇങ്ങനെ കുറിച്ചത്. “ഞങ്ങൾ ഉടനെ മൂന്ന് പേരാകും” 2021 ൽ അവരുടെ വീട്ടിലേക്ക് പുതിയ അതിഥി വിരുന്നു വരും. അനുഷ്ക തന്‍റെ നിറവയറുമായി യോഗ ചെയ്യുന്ന ചിത്രം അവർ സോഷ്യൽ മീഡിയയിൽ പോസ്റ്റ് ചെയ്‌തപ്പോഴും ഏറെ ശ്രദ്ധിക്കപ്പെട്ടിരുന്നു. അനുഷ്കയും വിരാടും 2017 ൽ ഇറ്റലിയിൽ വച്ചാണ് വിവാഹിതരായത്. താൻ അനുഷ്കയോട് ഫോർമലായി പ്രണയാഭ്യർത്ഥന ഒന്നും നടത്തിയിട്ടില്ല എന്നും, എങ്കിലും രണ്ടാളും പ്രണയം സ്വയം തിരിച്ചറിയുകയായിരുന്നുമെന്നും വിരാട് മുമ്പ് പറഞ്ഞിരുന്നു.
അനിത ഹസൻദാനി – രോഹിത് റെഡ്ഡി
നാഗിൻ, യെ ഹേ മുഹബത്ത്, കാവ്യാഞ്ജലി തുടങ്ങിയ പരമ്പരകളിലൂടെ പ്രശസ്തയായ അഭിനേത്രി അനിത ഹസൻദാനി ഫെബ്രുവരിയിൽ അമ്മയാകാൻ കാത്തിരിക്കുകയാണ്. “ഫെർട്ടിലിറ്റി ട്രീറ്റ്മെന്‍റ് ഒന്നുമില്ലാതെ നാച്ചുറൽ ആയിട്ടാണ് കൺസീവ് ആയത്.” അനിത പറയുന്നു. അനിതയും ഭർത്താവ് രോഹിത് റെഡ്ഡിയും ഈ സന്തോഷ വാർത്ത ആരാധകരുമായി പങ്കുവച്ചു കഴിഞ്ഞു. രണ്ടുപേരും കൂടിയുള്ള ഒരു ക്യൂട്ട് വീഡിയോയും ആരാധകർ വൈറലാക്കി. 30 വയസിനു ശേഷം അമ്മയാകാൻ ആദ്യമൊക്കെ വലിയ മടിയായിരുന്നു. പക്ഷേ ഇപ്പോൾ 39-ാമത്തെ വയസിൽ വളരെ സാധാരണമായ രീതിയിൽ ഗർഭധാരണം നടന്നു. വയസ് ഒക്കെ ഒരു നമ്പർ മാത്രമാണെന്നാണ് താരം ഇപ്പോൾ പറയുന്നത്. മാനസികവും ശാരീരികവും ഫിറ്റാണെങ്കിൽ ഏത് പ്രായത്തിലും അമ്മയാകാം എന്നാണ് അനിത പറയുന്നത്.
കരൺവീർ ബോഹ്റ – ടിജെ സിദ്ധു
മിനി സ്ക്രീൻ താരം കരൺവീർ ബൊഹ്റയും കുഞ്ഞുതാരത്തെ പുതുവർഷത്തിന് മുന്നേ സ്വന്തമാക്കിയ സന്തോഷത്തിലാണ്. പത്നി ടിജെ സിദ്ധു, ഒരു പെൺകുട്ടിയ്ക്ക് ജന്മം നൽകി. കഴിഞ്ഞ ഞായറാഴ്ച കരൺവീർ ഒരു വീഡിയോ ഷെയർ ചെയ്തു. ആശുപത്രിയിലേക്ക് പോകുന്ന വീഡിയോ ആണത്. ഭാര്യ ആശുപത്രിയിൽ അഡ്മിറ്റാണെന്നും ഏതു സമയത്തും കുഞ്ഞതിഥി കടന്നു വരുമെന്നും വീഡിയോ പറയുന്നു. തുടർന്ന് അടുത്ത പോസ്റ്റിൽ പെൺകുട്ടി പിറന്ന കാര്യവും കിരൺ അറിയിച്ചു.
“എന്‍റെ വീട്ടിൽ ഒരു പെൺകുട്ടി ജനിച്ചിരിക്കുന്നു. വാക്കുകളിൽ ആ സന്തോഷം ഒതുക്കാൻ കഴിയുന്നില്ല. ഞാൻ മൂന്ന് പെൺകുട്ടികളുടെ പിതാവായി എന്ന് വിശ്വസിക്കാൻ കഴിയുന്നില്ല. ഇതിലും മനോഹരമായ ജീവിതം ഇനി വരാനുമില്ല. മൂന്നു രാജകുമാരിമാർക്കൊപ്പമാണ് ഇനി എന്‍റെ ജീവിതം. ഇവർ മൂന്ന് ദേവിമാർ, എന്‍റെ ലക്ഷമിയും, സരസ്വതിയും പാർവ്വതിയും.
ശില്പാ ഷെട്ടി – രാജ് കുന്ദ്ര
ബോളിവുഡ് താരം ശില്പാ ഷെട്ടി ഈ വർഷം പലരേയും ഞെട്ടിച്ചത് തന്‍റെ മകളുടെ പിറവിയെക്കുറിച്ച് പറഞ്ഞു കൊണ്ടാണ്. ശില്പയും രാജും സറോഗസിയിലൂടെയാണ് വീണ്ടും പേരന്‍റ്സ് ആയത്. കഴിഞ്ഞ അഞ്ചു വർഷമായി ഒരു കുഞ്ഞിനു വേണ്ടി ശ്രമിക്കുന്നുണ്ടായിരുന്നു. ഈ വർഷം വാടക ഗർഭപാത്രത്തിലൂടെ ആ മോഹം സഫലമായി.
അമൃതാ റാവ് – ആർജെ അൻമോൽ
വിവാഹത്തിന് നാലു വർഷം ശേഷം അമൃതാ റാവിന്‍റെ വീട്ടിൽ കുഞ്ഞിക്കാൽ പതിഞ്ഞിരിക്കുന്നു. നടിക്ക് ഒരു മകൻ പിറന്നു. പ്രഗ്നൻസി വാർത്ത രഹസ്യമാക്കി വച്ചിരിക്കുകയായിരുന്നു അമൃത. ഒമ്പതാം മാസത്തിൽ ഒരു ചിത്രം പോസ്റ്റ് ചെയ്ത് തന്‍റെ രഹസ്യം അമൃത പരസ്യമാക്കി. ഇത്രയും കാലം ഈ കാര്യം ഒളിച്ചു വച്ചതിൽ ക്ഷമയും ചോദിച്ചായിരുന്നു പോസ്റ്റ്.
“വളരെ സന്തോഷത്തോടെ ഞാൻ ഈ വാർത്ത എന്‍റെ കൂട്ടുകാർക്കും ആരാധകർക്കും മുന്നിൽ സമർപ്പിക്കുകയാണ്. ഇതുവരെ ഇക്കാര്യം പറയാതിരുന്നതിൽ ക്ഷമ ചോദിക്കുന്നു.”
2016 മെയിലാണ് താരം അമൃതയും ആർജെ അൻമോലും രഹസ്യമായി വിവാഹിതരായത്. 7 വർഷത്തെ പ്രണയത്തിനു ശേഷമായിരുന്നു ഈ വിവാഹം! മൊത്തമുള്ള ആ രഹസ്യ സ്വഭാവമാണ് കുഞ്ഞു പിറന്നപ്പോൾ താരം ഉപേക്ഷിച്ചത്.
പൂജ ബാനർജി – കുണാൽ വർമ്മ
ദേവോം കേ ദേവ് മഹാദേവ് പരമ്പരയിലെ പാർവ്വതി അതായത് പൂജാ ബാനർജിയും ഭർത്താവ് കുണാൽ വർമ്മയും അച്‌ഛനും അമ്മയുമായി കഴിഞ്ഞു. ഒക്ടോബറിലാണ് ഇവർക്ക് ആൺകുഞ്ഞ് പിറന്നത്. ഒരു ന്യൂസ് പോർട്ടലിലെ അഭിമുഖത്തിലാണ് കുണാൽ ഇക്കാര്യം അറിയിച്ചത്. പൂജയ്ക്കൊപ്പം ഡെലിവറി വേളയിൽ താനും ഉണ്ടായിരുന്നുവെന്ന് കുണാൽ പറഞ്ഞു.
പൂജയും കുണാലും കഴിഞ്ഞ മാർച്ചിലാണ് രജിസ്റ്റർ വിവാഹം ചെയ്തത്. അക്കാര്യം പൂജ ഇൻസ്റ്റഗ്രാമിലൂടെ അറിയിച്ചിരുന്നു. അതിനുശേഷം ഏപ്രിൽ 15 ന് പരമ്പരാഗത രീതിയിൽ വിവാഹവും നടത്താനിരുന്നതായിരുന്നു. പക്ഷേ കൊറോണയ്ക്കിടയിൽ അത് നടത്താൻ കഴിഞ്ഞില്ല. എങ്കിലും കല്യാണത്തിന് കരുതി വച്ച പണം കൊറോണ ബാധയിൽ ബുദ്ധിമുട്ടിയ വരെ സഹായിക്കാൻ പ്രയോജനപ്പെടുത്തി.
ഹാർദിക് പാണ്ഡ്യ – നതാസ സ്റ്റെൻ കോവിസ്
ടീം ഇന്ത്യയുടെ ആൾ റൗണ്ടറായ കളിക്കാരനാണ് ഹാർദിക്. പത്നി നതാസ 2020ലാണ് ഒരു ആൺകുഞ്ഞിന് ജന്മമേകിയത്. ഇൻസ്റ്റാഗ്രാമിൽ പങ്കുവച്ച ചിത്രത്തിലൂടെയാണ് ഹാർദിക് താൻ അച്ഛനാകാൻ പോകുന്ന കാര്യം ആദ്യമായി പുറത്തു വിട്ടത്. വിവാഹവും 2020 ആദ്യം പ്ലാൻ ചെയ്‌തുവെങ്കിലും കൊറോണ കാരണം നടന്നില്ല.
സാഗരിക – ജഹിർഖാൻ
ചക്ദേ നായിക സാഗരികയും ക്രിക്കറ്റർ ജഹിർഖാനും ഉടനെ തന്നെ അച്‌ഛനും അമ്മയും ആകാനുള്ള തയ്യാറെടുപ്പിലാണ്. മീഡിയക്കു മുന്നിൽ നിന്ന് തങ്ങളുടെ സ്വകാരഞ ജീവിതത്തെ മാറ്റി നിർത്താൻ ആഗ്രഹിച്ച ദമ്പതികളാണ് ഇവർ. യുവരാജ് സിംഹിന്‍റെ വിവാഹച്ചടങ്ങിൽ വച്ചാണ് ഇവർ രണ്ടുപേരും പരിചയപ്പെട്ടതും, ആ പരിചയം പ്രണയമായതും.
പേളി മാണി – ശ്രീനിഷ് അരവിന്ദ്
മലയാളത്തിൽ ഇത്രയേറെ ചർച്ച ചെയ്യപ്പെട്ട മറ്റൊരു സെലിബ്രിറ്റി ഗർഭിണി ഇല്ല എന്നു പറയാം. അത് മറ്റാരുമല്ല, അവതാരകയും നടിയുമായ പേളി മാണി. മലയാളി ഹൗസ് എന്ന ബിഗ്ബോസ് റിയാലിറ്റി ഷോയിൽ മത്സരിക്കവേ, കന്നഡ നടനായ ശ്രീനിഷ് അരവിന്ദുമായി പ്രണയത്തിലായ പേളിയുടെ വിവാഹവും തുടർന്നുള്ള ജീവിതവും സോഷ്യൽ മീഡിയയുടെ ഹോട്ട് സബ്ജക്ട് ആയിരുന്നു. ഇപ്പോഴിതാ പേളിയുടെ ഗർഭധാരണവും ആഘോഷിക്കപ്പെടുകയാണ്. ലോക്ക്ഡൗൺ വേളയിലാണ് ഇവരും തങ്ങളുടെ കുഞ്ഞതിഥിയുടെ വരവിനെക്കുറിച്ച് ആരാധകരുമായി പങ്കുവച്ചത്. ആഗസ്‌റ്റ് മാസത്തിലായിരുന്നു വെളിപ്പെടുത്തൽ. ഡാഡ് ആവാനുള്ള എക്സൈറ്റ്മെന്‍റിലാണ് ശ്രീനിഷെന്നും, മാർച്ചിൽ കുഞ്ഞു പിറക്കുമെന്നും പേളി തന്നെ സോഷ്യൽ മീഡിയയിലൂടെ വിവരം പങ്കുവച്ചിരുന്നു.
