ചർമ്മ സൗന്ദര്യത്തിനും പെർഫെക്ട് ലുക്കിനുമായി ഇടയ്ക്കിടെ ബ്യൂട്ടിപാർലറിൽ പോകാൻ സമയവും സൗകര്യവും ഇല്ലെങ്കിൽ ഒട്ടും വിഷമിക്കേണ്ട. പാർലറുകളിൽ ചെയ്യുന്ന പോലെ വീട്ടിലിരുന്നു ചെയ്യാൻ ചില ഉപകരണങ്ങൾ സഹായിക്കും. ബ്യൂട്ടി ഗാഡ്ജറ്റ്സ് ഉപയോഗിക്കുമ്പോൾ ശ്രദ്ധിക്കേണ്ട കാര്യങ്ങൾ ഡർമറ്റോളജിസ്റ്റ് ഡോ.ഗീതാഞ്‌ജലി ഷെട്ടി നിർദ്ദേശിക്കുന്നു.
ക്ലൻസിംഗ് ബ്രഷ്
നല്ല ചർമ്മം ലഭിക്കാൻ ദിവസവും ക്ലൻസിംഗ്, ടോണിംഗ്, മോയിസ്ചുറൈസിംഗ് ഇവ അനിവാര്യമാണ്. ഇതിൽ തന്നെ ഏറ്റവും പ്രാധാന്യമർഹിക്കുന്ന കാര്യം ക്ലൻസിംഗ് ആണ്. ചർമ്മത്തിലെ മാലിന്യങ്ങൾ കൃത്യമായി നീക്കിയാൽ മാത്രമേ ആരോഗ്യമുള്ള ചർമ്മം ലഭിക്കൂ. അതിനാൽ ബ്യൂട്ടികിറ്റിൽ ക്ലൻസിംഗ് ബ്രഷ് തീർച്ചയായും സൂക്ഷിക്കൂ. പുറത്തു നിന്ന് ക്ലീൻ ചെയ്‌ത് അകത്തും ആരോഗ്യം നിലനിർത്താം. മസാജിംഗിലൂടെ ചർമ്മത്തിന്‍റെ തിളക്കവും വർദ്ധിക്കും.
എങ്ങനെ ചെയ്യണം
ക്ലൻസിംഗ് ബ്രഷ് കിറ്റ് വാങ്ങുമ്പോൾ കൂടെ ക്ലൻസിംഗ് ക്രീം കൂടി ലഭിക്കും. മുഖം മുഴുവൻ ക്ലൻസിംഗ് ക്രീം പുരട്ടിയ ശേഷം ക്ലൻസിംഗ് ബ്രഷ് ഉപയോഗിച്ച് 5 മിനിട്ട് മുഖം ഉഴിയുക. വെള്ളം ഒഴിച്ച് കഴുകി ഉണക്കുക.
സ്മാർട്ട് ടിപ്സ്
ഒലെ പ്രോ എക്സ് മൈക്രോ ഡർമ ബ്രഷ് അഡ്വാൻസ് ക്ലൻസിംഗ് ബ്രഷ്, പ്രൊ ആക്‌ടീവ് സ്കിൻ ക്ലൻസിംഗ് ബ്രഷ്, സ്പാ സോണിക് കെയർ സിസ്റ്റം ഇവയുടെ ബ്രഷ് വാങ്ങാവുന്നതാണ്. വില ആയിരം രൂപ മുതൽ.
റിങ്കിൾ ഇറേസർ
മുഖത്ത് പ്രായാധിക്യത്തെ തുടർന്നുണ്ടാകുന്ന ചുളിവുകൾ അലട്ടുന്നുവോ? ബ്യൂട്ടിപാർലറുകളിൽ മാസം തോറും പോയി വലിയ തുക മുടക്കിയിട്ടും വലിയ മാറ്റം തോന്നുന്നില്ല എങ്കിൽ റിങ്കിൾ ഇറേസർ വാങ്ങി ഉപയോഗിക്കാവുന്നതാണ്. മുഖത്തെ ചുളിവുകൾ, കണ്ണുകൾ, ചുണ്ടുകൾ, കഴുത്ത് എന്നിവിടങ്ങളിലെ വരകൾ ഇതൊക്കെ കുറയ്ക്കാം. ആഴ്ചയിൽ രണ്ടുപ്രാവശ്യം ഉപയോഗിക്കണം.
ഉപയോഗിക്കേണ്ട രീതി
റിങ്കിൾ ഇറേസർ പെൻ ഉപയോഗിക്കും മുമ്പ് കണ്ണുകൾക്കടിയിൽ അണ്ടർ ഐ ക്രീം പുരട്ടുക. അതിനു ശേഷം റേസർ പെൻ ചുളിവുകളിൽ സാവകാശം അമർത്തിപ്പിടിക്കുക. എന്നിട്ട് മാറ്റുക. 2-3 മിനിറ്റ് ഇങ്ങനെ ആവർത്തിക്കുക. ചുണ്ടുകൾക്കടിയിലും, കഴുത്തിലും ഉള്ള ചുളിവുകൾ ഇങ്ങനെ കുറയ്ക്കാം.
സ്മാർട്ട് ടിപ്സ്
റിങ്കിൾ ഇറേ സറിന്‍റെ വില രണ്ടായിരം രൂപ മുതൽ. കെയർ ജോയ്, ഇറേസർ പെൻ, എച്ച്ഐജിപിഎഫ് റിങ്കിൾ ഇറേ സർ പെൻ, ഡർമൊസിൻ ഇൻസ്റ്റന്‍റ് റിങ്കിൾ ഇറേസർ ഇങ്ങനെ പലതുമുണ്ട്. ഇഷ്‌ടമുള്ളത് തെരഞ്ഞെടുക്കാം.
സ്കിൻ സ്മൂത്തർ
മുഖചർമ്മം വളരെ മൃദുലമാണ്. വെയിൽ, പൊടിപടലങ്ങൾ, അന്തരീക്ഷത്തിലെ മറ്റു മാലിന്യങ്ങൾ ഇതൊക്കെ വളരെ വേഗം മുഖചർമ്മത്തെ ബാധിക്കും. മുഖം വരണ്ട്, നിറം മങ്ങിയതു പോലെ തോന്നുന്നത് അതുകൊണ്ടാണ്. ഇത്തരം പ്രശ്നങ്ങൾക്ക് പരിഹാരമാണ് സ്കിൻ സ്മൂത്തർ. ആഴ്ചയിൽ രണ്ടുപ്രാവശ്യം ഇതുപയോഗിക്കാം. ഡാർക്ക് സ്പോട്ട്സും കുറയും.
ഉപയോഗിക്കേണ്ട വിധം
മുഖത്ത് ഭംഗിയായി മോയിസ്ചുറൈസർ പുരട്ടിയ ശേഷം സ്കിൻ സ്മൂത്തർ ഉപയോഗിക്കണം. മുഖത്ത് സ്മൂത്തർ കൊണ്ട് മസാജ് ചെയ്‌താൽ ഉണങ്ങി വരണ്ട ചർമ്മം നീങ്ങും. തുടർന്ന് വെള്ളം മുഖത്ത് ധാരാളം ഒഴിച്ച് കഴുകിക്കളയുക.
സ്മാർട്ട് ടിപ്സ്
ഫിലിപ്സ് സ്കിൻ സ്മൂത്തർ, പിഎംഡി പേഴ്സണൽ മൈക്രോ ഡെം, അൾട്രാ സോണിക്ക് സ്കിൻ സ്മൂത്തർ തുടങ്ങിയവ ട്രൈ ചെയ്യാം. വില ആയിരം രൂപ മുതൽ ഓൺലൈൻ പർച്ചേസ് ചെയ്യാം.
ടെംപററി സ്കിൻ ടൈറ്റ്നർ
പ്രായമാകുന്തോറും ചർമ്മത്തിന്‍റെ മുറുക്കം കുറഞ്ഞു വരും. കെമിക്കൽ വസ്‌തുക്കൾ കലർന്ന ബ്യൂട്ടി പ്രൊഡക്റ്റുകൾ ഉപയോഗിക്കുമ്പോൾ ഇത് കുറച്ചൊക്കെ പരിഹരിക്കാൻ കഴിഞ്ഞേക്കാം. എന്നാൽ അതിന് വലിയ തുക ചെലവാകും. ടെംപററി സ്കിൻ ടൈറ്റ്നർ കയ്യിലുണ്ടെങ്കിൽ കുറച്ചു പരിഹാരമാവും. പേരു സൂചിപ്പിക്കും പോലെ ഇത് താൽക്കാലികമായ പരിഹാരം മാത്രമാണ്.
ഉപയോഗിക്കേണ്ട വിധം
ചർമ്മത്തിൽ മുറുക്കം വേണം എന്നു തോന്നുന്ന ഭാഗത്ത് ഈ മെഷീൻ സാവകാശം അമർത്തുകയും മാറ്റുകയും ചെയ്യുക. ഇത് രണ്ടുമിനിട്ട് ആവർത്തിക്കുക.
സ്മാർട്ട് ടിപ്സ്
വീനസ് വിവാ സ്കിൻ ടൈറ്റനിംഗ്, ട്രിവ സ്കിൻ ടൈറ്റ്നിംഗ്, മിഷ സ്കിൻ ടൈറ്റ്നിംഗ് തുടങ്ങിയ ഗാഡ്ജറ്റുകൾ ഉപയോഗിക്കാം. വില 1500 രൂപ മുതൽ.
ട്വീസർ
ഐബ്രോയുടെ ആകൃതി ശരിയല്ല എന്നു തോന്നിയോ? അതിനായി ബ്യൂട്ടിപാർലറിൽ പോകാൻ സമയവുമില്ല എന്നിരിക്കട്ടെ. അങ്ങനെ ഉള്ളവർക്ക് ട്വീസർ നല്ല ഓപ്ഷനാണ്. കുറേ ദിവസത്തേക്ക് യാത്ര പോകുമ്പോഴും ഇത് ഉപകാരപ്രദമാകും. പുരികത്തിലെ അനാവശ്യ രോമങ്ങൾ നീക്കാൻ ട്വീസർ സഹായിക്കും.
ഉപയോഗിക്കേണ്ട വിധം
വളരെ എളുപ്പം ഉപയോഗിക്കാം. കൊടിൽ പോലൊരു ഉപകരണമാണിത്. മുടി പിഴുതെടുക്കാൻ എളുപ്പം കഴിയും.
സ്മാർട്ട് ടിപ്സ്
100 രൂപ മുതൽ 600 വരെ വില. ബ്ലൂസേറ്റ് ട്വീസർ, ട്വീസർ ഗുരു, ഹാർപർ ടോൺ പ്ലക്ക്കിറ്റ് ഈ പേരിലൊക്കെ മാർക്കറ്റിൽ ലഭ്യമാണ്.
ഫേഷ്യൽ ഹെയർ റിമൂവർ
മുഖത്തെ അനാവശ്യ രോമങ്ങൾ നീക്കാൻ മാസത്തിൽ രണ്ടു പ്രാവശ്യമെങ്കിലും പാർലർ സന്ദർശിക്കേണ്ട സ്‌ഥിതി ഉണ്ടെങ്കിൽ ഒരു ഫേഷ്യൽ ഹെയർ റിമൂവർ ഉടനെ വാങ്ങി വച്ചോളൂ. വീട്ടിലിരുന്നു തന്നെ വളരെ എളുപ്പത്തിൽ മുഖരോമങ്ങൾ നീക്കാം. വാക്‌സ്, ബ്ലീച്ച് ഇവ ചെയ്‌തു വിഷമിക്കേണ്ടതുമില്ല. ഏതാനും മിനിട്ടുകൾ മതി, കാര്യം നടത്താം.
ഉപയോഗിക്കേണ്ട വിധം
ഹെയർ റിമൂവറിന്‍റെ രണ്ടുവശത്തും പിടിച്ചിട്ട് മുകളിൽ നിന്ന് താഴേക്ക് വലിക്കുക.
സ്മാർട്ട് ടിപ്സ്
ട്വീസർ പോലെ ഫേഷ്യൽ ഹെയർ റിമൂവറിനും വില താരതമ്യേന കുറവാണ്. 150 രൂപ മുതലാണ് വില. ട്വീസർ മെൻ സ്മൂത്ത് ഫിനിഷ് ഫേഷ്യൽ ഹെയർ റിമൂവർ, യുനീക് ഹെയർ റിമൂവൽ, ഡിഐവൈ ക്വിക്ക് സ്മൂത്ത് ഹെയർ റിമൂവർ തുടങ്ങിയവയിലേതെങ്കിലും തെരഞ്ഞെടുക്കാം.
ഹെയർ റിമൂവർ ലേസർ
കൈകാലുകൾ, ബിക്കിനി ലൈൻ, എന്നു വേണ്ട ശരീരത്തിലെവിടെയും രോമം നീക്കം ചെയ്യാൻ സഹായിക്കുന്ന ഗാഡ്ജറ്റാണ് ഹെയർ റിമൂവൽ ലേസർ. ചർമ്മത്തിൽ നിന്ന് രോമം നീക്കം ചെയ്യുന്നതിനൊപ്പം ചർമ്മത്തെ കോമളവുമാക്കും. ഇതുപയോഗിക്കുമ്പോൾ വേദനിക്കുകയുമില്ല. രണ്ടുമാസത്തിലൊരിക്കൽ ഈ ഗാഡ്ജറ്റ് ഉപയോഗിച്ചാൽ മതിയാവും.
ഉപയോഗിക്കേണ്ട വിധം
അനാവശ്യരോമങ്ങളുള്ള ഭാഗത്ത് സാവധാനം ചേർത്തു വലിക്കുക.
സ്മാർട്ട് ടിപ്സ്
വീറ്റ് ഹെയർ റിമൂവൽ ഡിവൈസ്, വർസാ ഈപ്പൻ പെർമനന്‍റ് ഹെയർ റിമൂവൽ, ട്രിവ ഹെയർ റിമൂവൽ ലേസർ ഇതൊക്കെ മാർക്കറ്റിൽ ലഭിക്കും. വില അയ്യായിരം മുതൽ.
സേഫ്റ്റി റൂൾസ്
- ബ്യൂട്ടി ഗാഡ്ജറ്റുകളുടെ ഉപയോഗം ശ്രദ്ധയോടെ വേണം. വാങ്ങുന്ന പാക്കറ്റിൽ കൊടുത്തിരിക്കുന്ന നിർദ്ദേശങ്ങൾ പൂർണ്ണമായും വായിച്ചു മനസ്സിലാക്കിയ ശേഷം മാത്രം പ്രയോഗിക്കുക.
- സ്കിൻ അലർജി ഉള്ളവരാണെങ്കിൽ ഗാഡ്ജറ്റ് ഉപയോഗം, ഡെർമറ്റോളജിസ്റ്റിനോട് ചോദിച്ചിട്ട് ചെയ്യുക.
സ്കിൻ പ്രശ്നങ്ങളുള്ളവർ പ്രാഥമികമായി ഒരു ഡോക്‌ടറെ കൺസൾട്ട് ചെയ്‌തശേഷം മാത്രം ഗാഡ്ജറ്റ് ഉപയോഗിക്കുക.
