മോര് കറി

വീട്ടിലെ ഭക്ഷണം എന്നും ഒരു വികാരമാണ്, പരമ്പരാഗതമായി നമ്മുടെ അടുക്കളയിൽ തയ്യാറാക്കുന്ന നാടൻ വിഭവങ്ങളുടെ സ്വാദ് ഒന്നു വേറെ തന്നെയാണ്.

മോര് കറി കൂട്ടി ചോറുണ്ണാൻ പ്രത്യേക രുചി തന്നെയാണ്.

പലതരം പച്ചക്കറി ഇട്ട് മോര് കറി തയ്യാറാക്കാം. പച്ചക്കറികളൊന്നും ഇടാതെ മോര് കറി തയ്യാറാക്കുന്നത് എങ്ങനെ എന്ന് നോക്കാം.

ചേരുവകൾ

മോര് 2 കപ്പ്

ചെറിയ ഉള്ളി ചെറുതായി അരിഞ്ഞത് കാൽ കപ്പ്

പച്ചമുളക് ഒന്ന്

ഇഞ്ചി ചെറുതായി അരിഞ്ഞത് ഒരു ടീസ്പൂൺ

വെളുത്തുള്ളി ചെറുതായി അരിഞ്ഞത് 2 ടീസ്പൂൺ

വെളിച്ചെണ്ണ ഒരു ടേബിൾ സ്പൂൺ

കടുക് അര ടീസ്പൂൺ

ജീരകം അര ടീസ്പൂൺ

ഉലുവ കാൽ ടീസ്പൂൺ

വറ്റൽ മുളക് 1-2 എണ്ണം

കായം കാൽ ടീസ്പൂൺ മഞ്ഞൾ

പ്പൊടി അര ടീസ്പൂൺ

ഉപ്പ് ആവശ്യത്തിന്

കറിവേപ്പില അൽപം.

തയ്യാറാക്കുന്ന വിധം

ഒരു പാനിൽ വെളിച്ചെണ്ണ ചൂടാക്കി കടുക്, ഉലുവ, വറ്റൽ മുളക്, ജീരകം എന്നിവയിട്ട് പൊട്ടിക്കുക. ശേഷം കറിവേപ്പില അരിഞ്ഞുവച്ച ഇഞ്ചി, വെളുത്തുള്ളി, പച്ചമുളക് കീറിയത് എന്നിവയിട്ട് ഒരു മിനിറ്റ് നേരം വഴറ്റുക.

ശേഷം നേർത്തതായി അരിഞ്ഞ ചെറിയ ഉള്ളി നേർമ്മയായി വഴറ്റാം. ഇനി അതിൽ മഞ്ഞൾപ്പൊടി ഇട്ട് ഒരു മിനിറ്റ് നേരം പാകം ചെയ്യാം.

ശേഷം തീ കുറച്ച് അടിച്ചുവച്ച മോര് ചേർക്കാം. ആവശ്യത്തിന് ഉപ്പും ചേർത്ത് ലോ ഫ്ളെയിമിൽ അൽപസമയം ചൂടാക്കാം. മോര് തിളയ്ക്കുന്നതിന് മുമ്പ് ഗ്യാസ് ഓഫാക്കാം. മോര് കറി റെഡി!