ഏതു നാട്ടിൽ ചെന്നാലും വീട്ടിലെ ഭക്ഷണം ഒരു വികാരമാണ്. പരമ്പരാഗതമായി നമ്മുടെ അടുക്കളയിൽ തയ്യാറാക്കുന്ന നാടൻ വിഭവങ്ങളുടെ സ്വാദ് ഒന്നു വേറെ തന്നെയാണ്. അത്തരം വിഭവങ്ങളെ പരിചയപ്പെടാം. ഇത് രുചിയുടെ നൊസ്റ്റാൾജിയ!
പരമ്പരാഗത കറി വിഭവങ്ങളിൽ ധാരാളം പേരുടെ ഇഷ്ടപ്പെട്ട വിഭവമാണ് മീന്‍ കറി. ഫിഷ് പെരളന്‍ ഉണ്ടാക്കുന്ന വിധം എങ്ങനെയെന്ന് നോക്കാം.
ചേരുവകൾ
മീൻ ഒരു കിലോ കഷണങ്ങളാക്കിയത്
എണ്ണ അര കപ്പ്
മല്ലി 2 ടീസ്പൂൺ വറുത്തത്
കടുക് ഒരു ടീസ്പൂൺ
ഉലുവ കാൽ ടീസ്പൂൺ
സവാള നേർത്തതായി അരിഞ്ഞത് ഒന്നര കപ്പ്
മുളകുപൊടി ഒരു ടേബിൾ സ്പൂൺ
മല്ലിപ്പൊടി ഒരു ടീസ്പൂൺ
മഞ്ഞൾപ്പൊടി അര ടീസ്പൂൺ
വാളൻ പുളി ഒരു നാരങ്ങാ വലിപ്പ ത്തിൽ വെള്ളത്തിൽ കുതിർക്കുക
ഉപ്പ് ആവശ്യത്തിന്
തയ്യാറാക്കുന്ന വിധം
ഒരു പാനിൽ എണ്ണയൊഴിച്ച് ചൂടാക്കുക. അതിൽ മല്ലിയും കടുകും ഉലുവയും ഇട്ട് വറുക്കുക. അത് വറുത്ത് പൊട്ടുമ്പോൾ സവാള അരിഞ്ഞതിട്ട് നല്ലവണ്ണം വഴറ്റുക.
ഇതിലേക്ക് മുളകുപൊടി, മല്ലിപ്പൊടി, മഞ്ഞൾപ്പൊടി ഇവ ചേർത്ത് വെള്ളം ചേർത്ത് മിക്സ് ചെയ്യുക. ചെറുതീയിൽ നന്നായി വഴറ്റുക. നല്ല മസാല മണം വരുന്നതോടെ മീൻ കഷണങ്ങൾ ഇതിലേക്ക് ഇട്ട് ശ്രദ്ധയോടെ എല്ലാം മിക്സ് ചെയ്യുക.
ഇനി പുളി വെള്ളവും ഉപ്പും ചേർക്കാം. ആവശ്യമെങ്കിൽ കുറച്ച് വെള്ളം കൂടി ചേർത്ത് അടച്ചവച്ച് പാകം ചെയ്യുക.
ഗ്രേവി കുറുകുമ്പോൾ കറിവേപ്പില കൂടി ചേർത്ത് അടച്ച് പാകം ചെയ്യുക. ഗ്രേവി അൽപം കുറുകി വറ്റുമ്പോൾ ഗ്യാസ് ഓഫാക്കി കറി താഴെ ഇറക്കി വയ്ക്കാം.
മീൻ പെരളൻ റെഡി. ചപ്പാത്തിക്കോ ചോറിനോ ഒപ്പം ഇത് നല്ലൊരു കോമ്പിനേഷനാണ്.
