പൊതുവെ ജോലി ചെയ്ത് ക്ഷീണിക്കുന്നവർക്ക് ഒരു റിഫ്രഷ്മെന്‍റ് ആവശ്യമല്ലേ. അതിനായി മിക്കവരും ആദ്യം എന്താവും ചെയ്യുക? കടുപ്പത്തിലോ ലൈറ്റാക്കിയോ ഒരു ചായ കുടിക്കും, അല്ലെങ്കിൽ ഒരു ചൂടൻ കോഫി അതുമല്ലെങ്കിൽ ഹെൽത്ത് കോൺഷ്യസായിട്ടുള്ളവർ ഗ്രീൻ ടീയോ ഫ്രഷ് ഫ്രൂട്ട് ജ്യൂസോ കുടിച്ച് ക്ഷീണമകറ്റും.
ഓപ്ഷനുകൾ നിരവധിയുണ്ടെങ്കിലും ഭൂരിഭാഗംപ്പേരുടെയും ഇഷ്ട ചോയിസ് കോഫി തന്നെയായിരിക്കും. എക്സ്പ്രസ്സോ, ലോട്ടെ, കാപ്പുച്ചിനോ, ഫ്ളാറ്റ് വൈറ്റ്, മോചാ കോഫി എന്നിങ്ങനെ കോഫിയിൽ വെറൈറ്റി ടേസ്റ്റുകളുണ്ട്. എന്നാലും ഇന്ത്യക്കാർക്ക് പൊതുവെ പാലൊഴിച്ച് തയ്യാറാക്കുന്ന കോഫിയോടാണ് പ്രിയം കൂടുതൽ.
ഒരേ തരത്തിലുള്ള കോഫി കുടിച്ച് മടുത്തവർക്ക് ചില വെറൈറ്റി ടിപ്സുകൾ പരീക്ഷിച്ച് കോഫിയുടെ വ്യത്യസ്ത രുചികൾ ആസ്വദിക്കാം.
വാനില ക്രീമർ കോഫി
ഒരു കപ്പ് കണ്ടൻസ്ഡ് മിൽക്ക്, കാൽ വലിയ സ്പൂൺ വാനില എസൻസ് എന്നിവ മിക്സിയിൽ ബ്ലൻഡ് ചെയ്‌ത മിക്സ് ഏതെങ്കിലും ഗ്ലാസ് ജാറിൽ വായു കടക്കാത്തവിധം അടച്ച് ഫ്രിഡ്ജിൽ വയ്ക്കുക.
ഒരു കപ്പ് പാലിൽ 2 വലിയ സ്പൂൺ ബ്ലൻഡ് ചെയ്‌ത ഈ വാനില ക്രീമറും കാൽ വലിയ സ്പൂൺ കോഫിയും ചേർത്ത് മൈക്രോ വേവ് അല്ലെങ്കിൽ ഗ്യാസടുപ്പിലോ ചൂടാക്കി കുടിച്ചു നോക്കൂ.
ചോക്ക്ളേറ്റ് കോഫി
ഒരു കപ്പ് കോഫിയിൽ അര വലിയ സ്പൂൺ കൊക്കോ പൗഡർ അല്ലെങ്കിൽ ഡ്രിങ്കിംഗ് ചോക്ക്ളേറ്റ് പൗഡർ ചേർത്ത് മികച്ചൊരു ചോക്കോ ഫ്ളേവർ കോഫി തയ്യാറാക്കാം. ഇത് മിക്സിയിൽ അടിച്ചെടുത്ത് ഗ്ലാസിലൊഴിച്ച് മുകളിൽ കൊക്കോ പൗഡർ വിതറി കുടിച്ചു നോക്കുക.
സ്പിൻ ഫിസ് കോഫി
സ്പിൻ ഫിസ് കോഫി തയ്യാറാക്കുന്നതിന് ഒരു ഗ്ലാസ് ഐസ്ഡ് ചിൽഡ് കോഫിയിൽ കാൽ കപ്പ് സ്പാർക്ക്ളിംഗ് വാട്ടർ അഥവാ ക്ലബ് സോഡ ചേർക്കുക. ക്ലബ് സോഡ ഷുഗർ ഫ്രീയും കലോറിരഹിതവുമാണ്.
ഫ്ളേവേഡ് കോഫി
കോഫി തയ്യാറാക്കാൻ സ്വാദനുസരിച്ച് കറുവാപ്പട്ട, കുരുമുളക്, ജാതിക്ക, മഞ്ഞൾപ്പൊടി എന്നിവ ചേർത്ത് സ്പൈസി ഫ്ളേവേഡ് കോഫി തയ്യാറാക്കാം.
ഫ്ളേവേഡ് കോഫിയിപ്പോൾ ട്രെന്‍റാണ്. ഇതിൽ കോഫിക്കൊപ്പം മസാലയുടെ രുചിയും ആസ്വദിക്കാം.
പീനട്ട് ബട്ടർ കോഫി
കോഫി പ്രോട്ടീൻ അടങ്ങിയ ഒരു പാനീയമാക്കണോ? എങ്കിൽ ഒരു കപ്പ് കോഫിയിൽ അര വലിയ സ്പൂൺ പീനട്ട് ബട്ടർ ചേർക്കൂ. സ്വാദിഷ്ഠവും പോഷക ഗുണവുമടങ്ങിയ കോഫി റെഡി. പ്രോട്ടീനിനൊപ്പം ഈ സ്പെഷ്യൽ കോഫിയിൽ ഫൈബറുകളും അടങ്ങിയിരിക്കും.
ഫ്രീസ്ഡ് കോഫി
നിങ്ങൾക്ക് അമിതമായ തളർച്ചയോ ക്ഷീണമോ ഉണ്ടെങ്കിൽ അതിനായി നല്ലൊരു ഓപ്ഷനുണ്ട്. അത്തരം ദിവസങ്ങളിൽ ഇഷ്ടപ്പെട്ട ഫ്ളേവറിൽ കൂടിയ അളവിൽ കോഫി തയ്യാറാക്കി ഫ്രീസറിൽ ഇതിന്‍റെ ക്യൂബ്സുകൾ തയ്യാറാക്കുക. കോഫി കുടിക്കാൻ തോന്നുമ്പോൾ പാലിൽ ഈ കോഫി ക്യൂബ്സുകൾ ഇട്ട് തിളപ്പിച്ച് കുടിച്ച് നോക്കൂ.
