വിശേഷാവസരങ്ങളിൽ പരമ്പരാഗത ശൈലിയുലുള്ള സാരി ധരിക്കാനാണ് പുതുതലമുറയ്ക്ക് പ്രിയം. പക്ഷേ, ഒരു ചെയ്ഞ്ചൊക്കെ സാരി ഉടുപ്പിലും നല്ലതല്ലേ. മനസ്സിലാക്കാം, വ്യത്യസ്‌തമായ സാരി ഡ്രേപിംഗ് സ്റ്റൈലുകൾ.
സാധാരണ രീതി
ഇടതു വശത്തെ തോളിലേക്ക് സാരിത്തുമ്പിട്ട് ഞൊറിഞ്ഞുടുക്കുന്ന സാധാരണ രീതിയാണ് ഏറ്റവും കൂടുതൽ പ്രചാരത്തിലുള്ളത്. ദിവസവും ഉടുക്കുന്നവർക്ക് വേണ്ടിയുള്ള ഏറ്റവും എളുപ്പമായ സാരി ഡ്രേപിംഗ് ആണിത്. മലയാളി വനിതകൾ ഈ രീതിയിലാണ് സാരി ഉടുക്കുക. യഥാർത്ഥത്തിൽ ഇത്തരം സാരി ഉടുക്കൽ രീതി ആന്ധ്രപ്രദേശിലാണത്രേ ആരംഭിച്ചത്. ഇപ്പോൾ ഇത് ഭാരതം മുഴുവൻ വ്യാപകമായ സാരി ഡ്രേപിംഗ് സ്റ്റൈൽ ആണ്.
മുംതാസ് സ്റ്റൈൽ
പാർട്ടികൾക്ക് പോകാൻ തയ്യാറെടുക്കുന്നവരുണ്ടെങ്കിൽ റെട്രോ ലുക്ക് ലഭിക്കുന്ന മുംതാസ് സ്റ്റൈൽ പരീക്ഷിക്കാവുന്നതാണ്. നല്ല ബോഡി ഷേയ്പ്പ് ഉള്ളവരാണെങ്കിൽ മുംതാസ് സ്റ്റൈൽ നന്നായി ചേരും.
ബട്ടർഫ്ളൈ സ്റ്റൈൽ
സാധാരണ രീതിയിൽ സാരി ചുറ്റുന്നതു പോലെയാണ് ബട്ടർ ഫ്ളൈ സ്റ്റൈലും. പല്ലു ചുറ്റുന്നതിൽ മാത്രമാണ് വ്യത്യാസം. സാരിത്തുമ്പ് നന്നായി ഡിസ്പ്ലേ ചെയ്‌ത് വയറിന്‍റെ ഭാഗം മൂടാതെ ധരിക്കുന്നതാണ് ബട്ടർഫ്ളൈ സാരി ഡ്രേപിംഗ് സ്റ്റൈല്‍.
പാന്‍റ് സ്റ്റൈൽ
പാന്‍റിന്‍റെയും ജെഗിംഗിന്‍റെയും ഒപ്പം സാരിക്കും കൊടുക്കാം കിടിലൻ സ്റ്റൈൽ. സാരി ഉടുക്കലിലെ ലേറ്റസ്റ്റ് ഫാഷൻ എന്നും പറയാം. റാമ്പുകളിലെ ഫേവറിറ്റ് സാരി സ്റ്റൈൽ കൂടിയാണിത്. സോളിഡ് പാന്‍റിന് പ്രിന്‍റഡ് സാരി നന്നായിട്ട് ഇണങ്ങും.
ലഹംഗ സ്റ്റൈൽ
ഇതും ഒരു മോഡേൺ ഡിസൈൻ ആണ്. സാരിയും ലഹംഗയും ചേർത്ത് ഉള്ള സ്റ്റൈൽ ആണിത്. ലഹംഗ ധരിക്കുന്നതു പോലെ സാരി ധരിക്കുന്നതാണ് രീതി. സാരിത്തുമ്പ് പിറകോട്ട് ഇടുന്നതിനു പകരം മുന്നോട്ടു ധരിക്കും.
ബംഗാളി സ്റ്റൈൽ
പരമ്പരാഗത ലുക്ക് ലഭിക്കാൻ ബംഗാളി സാരി സ്റ്റൈലിനേക്കാൾ മികച്ച മറ്റൊരു സ്റ്റൈൽ ഇല്ല. കഹാനി സിനിമയിൽ വിദ്യാബാലൻ സാരി ധരിച്ചതു പൊലെ മനോരഹരമായി ഇത് അണിയാം. ധരിക്കാനും എളുപ്പമാണ്. ഉടുത്താൽ ഭംഗിയും അപാരം.
കൂർഗ് സ്റ്റൈൽ
ഇത് വളരെ സവിശേഷമായ സാരി ഡ്രേപിംഗ് ആണ്. പ്ലീറ്റ്സ് പിന്നിലേക്കാണ് വരുന്നത്. പല്ലു മുന്നിലേക്ക് നെഞ്ചിനെ ചുറ്റി പിന്നിലൂടെ എടുത്ത് തോളിലേക്ക് ഇടും.
മറാഠി സ്റ്റൈൽ
സാധാരണ സാരി ഉടുക്കലിൽ നിന്ന് വളരെ വ്യത്യസ്‌തമാണ് മറാഠി പരമ്പരാഗത സാരി ഡ്രേപിംഗ് സ്റ്റൈൽ. 6 അടി നീളം പോര ഈ രീതിയിൽ ഉടുക്കാൻ. കുറഞ്ഞത് 9 അടി നീളം വേണം. മറാഠി സ്റ്റൈലിൽ സാരിക്ക്, ബ്ലൗസ് ധരിക്കേണ്ട ആവശ്യമില്ല. നെഞ്ചും കൂടി മറഞ്ഞിരിക്കാൻ പാകത്തിനാണ് ഇത്രയും നീളമുള്ള സാരി ഉപയോഗിക്കുന്നത്.
