ചങ്ങാതി നന്നായാൽ കണ്ണാടി വേണ്ട എന്നാണ് ചൊല്ല്! സംഭവം ശരിയാ തെറ്റോ എന്നതൊക്കെ അവിടെ നിൽക്കട്ടെ. ചങ്ങാതിമാരില്ലാത്ത ഒരു ജീവിതത്തെ കുറിച്ച് ഇക്കാലത്ത് നമുക്ക് ആലോചിക്കാൻ പറ്റുമോ? വിർച്‍വെൽ ലോകത്തും അല്ലാതെയും ധാരാളം ചങ്ങാതിമാരുള്ളവരാണ് നമ്മളിൽ ഭൂരിഭാഗവും. ഇങ്ങനെ കൂട്ടുകാർ വന്നും പോയുമിരിക്കുമ്പോഴും ചിലരോടൊക്കെ നമുക്ക് ഒരു സ്പെഷ്യൽ ഫീൽ ഉണ്ടാകാറില്ലേ? എക്കാലത്തെും ചങ്ങാതിമാര്‍ കൂടെയുണ്ടാവുന്നത് ചിലർക്കൊക്കെ ലഭിക്കുന്ന അപൂർവ്വ സൗഭാഗ്യങ്ങളാണ്. നിങ്ങളുടെ ഓരോ ചങ്ങാതിമാരെയും ശ്രദ്ധിച്ചു നോക്കൂ.
ഓരോരുത്തർക്കും ജീവിതത്തിൽ ഓരോ റോൾ ആയിരിക്കും. വ്യത്യസ്‌തമായ ആവശ്യങ്ങളുടെയോ ആശയങ്ങളുടെയോ അടിസ്‌ഥാനത്തിലാണ് പല സൗഹൃദങ്ങളും ശക്‌തിപ്പെടുന്നത്. ഇനി നല്ല ചങ്ങാതിമാരല്ല കൂടെ ഉള്ളതെങ്കിലോ, നിരാശയ്ക്കു മറ്റൊരു കാരണം വേണ്ട. നല്ലതും ചീത്തയുമായ കൂട്ടുകെട്ടുകൾ നമ്മെ രണ്ടു രീതിയിലും ബാധിക്കും. എങ്കിലും നല്ല ചങ്ങാതിമാർ എക്കാലവും നല്ല മാറ്റങ്ങൾ ആണ് ഉണ്ടാക്കുന്നത് എന്ന് ആശ്വസിക്കാമെങ്കിലും ചങ്ങാതിമാരെ അവരുടെ സ്വഭാവങ്ങൾക്കനുസരിച്ച് നമുക്ക് വേർതിരിക്കാവുന്നതാണ്.
സൗഹൃദം എന്നു പറയുന്നത് ഒരു ബോണ്ടിംഗ് ആണ്. അത് എല്ലാവരുമായും പങ്കുവയ്‌ക്കാൻ കഴിയുന്ന സംഗതിയല്ല.
അയ്യോ… പേഴ്സ് മറന്നു!
കൂട്ടു കൂടാനും സംസാരിക്കാനും സിനിമ കാണാനും ചായ കുടിക്കാനുമൊക്കെ മുൻപന്തിയിൽ തന്നെ നിങ്ങളുടെ കൂടെ ഉണ്ടാകുന്ന ഒരു സുഹൃത്തായിരിക്കും ഇയാൾ. നിങ്ങളുടെ സെൽഫിയിലും യാത്രകളിലും ഒക്കെ ഈ കക്ഷി ഉണ്ടാക്കും. ക്ലബ്ബിൽ ഷോപ്പിംഗ് സെന്‍ററുകളിൽ എല്ലാം സന്തോഷത്തോടെ കൂടെ വരും. ഇവരുടെ കമ്പനി മിക്കവാറും മതിയാവുന്നത്, ഒരേയൊരു ഡയലോഗിലായിരിക്കും. “ഓഫ്… സോറി. ഞാൻ പേഴ്സ് എടുക്കാൻ മറന്നു.”
സത്യം പറയാലോ, നല്ല അഭിനയശേഷി ഉള്ള ഇവരുടെ മുഖഭാവവും സംസാരവും കണ്ടാൽ പിന്നെ നോ പറയാൻ ആർക്കും കഴിയില്ല. ഒരു പ്രാവശ്യമൊക്കെ ഇതു ആർക്കും സംഭവിക്കില്ലെന്നല്ല. പക്ഷേ പലവട്ടം ആവർത്തിച്ചു കഴിഞ്ഞാൽ പിന്നെ അതൊരു അവിചാരിതമായ കാര്യമല്ലെന്ന് ആർക്കാ മനസ്സിലാവില്ലാത്തത്? ഇത്തരക്കാരുടെ പ്രശ്നമെന്തെന്നോ? അവർ പണം ചെലവഴിക്കുന്നവരല്ല, സമ്പാദിക്കാൻ ഇഷ്‌ടപ്പെടുന്നവരാണ്!
സങ്കടം ലൈൻ
ഇത്തരം സുഹൃത്തുക്കളെ നിങ്ങൾക്ക് ഒരിക്കലും അവഗണിക്കാൻ കഴിയില്ല. എന്നാൽ അവരെ സഹിക്കാനും ഇത്തിരി പ്രയാസമാണ്. സ്വന്തം കദനകഥ പങ്കുവയ്‌ക്കാൻ മാത്രമാണ് അവർക്ക് നിങ്ങളെ ആവശ്യം. അവരോട് സഹതാപം കാണിക്കുകയും, ഉപദേശവും വേണ്ടി വന്നാൽ കൗൺസിലിംഗും നൽകും നിങ്ങൾ. കാരണം അവർക്ക് അത്രയേറെ അത് ആവശ്യമാണെന്ന് നമുക്ക് തോന്നും. എന്നാൽ സത്യം എന്തെന്നോ, നിങ്ങളുടെ ആശ്വസിപ്പിക്കൽ അല്ല ആവശ്യം. തലചായ്ച്ചു കരയാൻ ഒരു തോൾ വേണം. സ്വന്തം പ്രയാസങ്ങൾ എണ്ണിപ്പെറുക്കി പറയുമ്പോൾ ശ്രദ്ധയോടെ കേട്ടിരിക്കാൻ ഒരാൾ! അവർക്ക് സന്തോഷം ഉള്ള അവസരത്തിൽ ഈ ചങ്ങാതിയുടെ പൊടി പോലും ഉണ്ടാകില്ല. നിങ്ങളെ ഓർക്കുകയും ഇല്ല.
വിശ്വസ്തരായ അസൂയാലു
ഇത്തരക്കാർ പേരു പറയുംപോലെ അത്ര മോശം ആളുകളല്ല. പക്ഷേ അവർ ചങ്ങാതിമാരെ കണ്ടെത്തുന്നത് തങ്ങളുടെ കാര്യ സാദ്ധ്യത്തിനു കൂടിയാണ്. എന്തെങ്കിലുമൊക്കെ ചെയ്യാൻ കഴിയും എന്നുറപ്പുള്ളവരോടെ ഇവർ കൂട്ടു കൂടു. കാര്യം നടത്തിക്കിട്ടാൻ വേണ്ടി, ഇവർ വലിയ സ്വീറ്റ് ആയി സംസാരിക്കും, ഇംപ്രസീവ് ആയിരിക്കും. ആവശ്യങ്ങൾ ബോധ്യപ്പെടുത്തുന്ന രീതിയിലും ഇവരെ വെല്ലാൻ ആളുണ്ടാവില്ല. വാഹനത്തിൽ കൊണ്ടുവിടാനും വിളിച്ചു കൊണ്ടു വരാനും വേണ്ടി നിങ്ങളെ ആശ്രയിച്ചേക്കാം. അതുപോലെ വിശപ്പുള്ളപ്പോൾ, ഭക്ഷണം വാങ്ങിത്തരാൻ മടി കൂടാതെ പറയും. നിങ്ങളുടെ പ്രിയപ്പെട്ട വസ്‌ത്രങ്ങൾ കടമായി ചോദിക്കും, പിന്നെ തിരിച്ചുതരാതിരിക്കും. ഇത്തരം സുഹൃത്തുക്കൾ വിശ്വസ്തരായിരിക്കാം. പക്ഷേ അതു നിങ്ങളുടെ സന്മനസ്സ് പിടിച്ചു പറ്റാൻ വേണ്ടിയാണെന്നു മാത്രം. “എ ഫ്രണ്ട് ഇൻ നീഡ്, ഇസ് എ ഫ്രണ്ട് ഇൻഡീഡ്” എന്ന് കരുതുന്നവരാണ് ഇവർ. ഇവരുടെ ആവശ്യങ്ങൾക്ക് ഉപകരിക്കപ്പെടുന്നില്ലെന്നു കണ്ടാൽ പിന്നെ സൗഹൃദം തകരാൻ വലിയ താമസം ഉണ്ടാവില്ല.
ബ്രാന്‍റ് ലവർ
നിങ്ങളുടെ ജീവിതത്തിലുള്ള ഇത്തരം ചങ്ങാതിമാർ എല്ലാ രീതിയിലും അപ്ഡേറ്റഡ് ആയിരിക്കും. എന്താണ് ലേറ്റസ്റ്റ് ട്രെന്‍റ് എന്ന് ഇവർക്ക് അറിയാം. എന്ത് ധരിക്കണം, എന്തു കഴിക്കണം, എവിടെ കറങ്ങാൻ പോകണം ഇത്തരം കാര്യങ്ങളെ കുറിച്ചൊക്കെ അറിയണമെങ്കിൽ ഇങ്ങനെയൊരു സുഹൃത്ത് ഉണ്ടെങ്കിൽ പിന്നെ ഗൂഗിളിന്‍റെ ആവശ്യം പോലും വരില്ല. സ്വന്തം സ്റ്റാറ്റസ് എപ്പോഴം മികച്ചതായിരിക്കാൻ ആഗ്രഹിക്കുന്ന ഇവർ പക്ഷേ തെരുവോരത്ത് തട്ടുകടയിൽ പോയി ഭക്ഷണം കഴിക്കാൻ കൂടെ വരില്ല. പണം ധൂർത്തടിക്കുകയോ, ആർഭാടം കാട്ടുകയോ ചെയ്യാത്തവർ ആണെങ്കിൽ പോലും നിലയും വിലയും വിട്ട്, ഒന്നിനും തയ്യാറാവില്ല. ബ്രാന്‍റ് ബോധം വളരെ മുന്നിൽ നിൽക്കുന്നതാണ് കാരണം. അതുകൊണ്ടെന്താ? എവിടെ പോയാലും അവർ ശ്രദ്ധിക്കപ്പെടും. നിങ്ങളുടെ കൂടെയായിരിക്കുമ്പോഴും മറ്റുള്ളവർ അവരെ ആയിരിക്കും ശ്രദ്ധിക്കുക. ഇവർ സെൽഫ് സെന്‍റഡ് ആണ്. സുഹൃത്തിനെക്കുറിച്ച് വലിയ ആശങ്ക ഒന്നും ഇവർക്കില്ല.
സ്നേഹിച്ചു കൊല്ലും
പഞ്ചാര പോലെ മധുരിക്കുന്ന സ്നേഹം കാട്ടുന്ന സുഹൃത്തുക്കളുണ്ടോ നിങ്ങൾക്ക്. സോഷ്യൽ മീഡിയയിൽ പടം ഇടുമ്പോൾ ഈ സ്നേഹം ഇരട്ടിപ്പിക്കും. ഫ്രണ്ട്സ് ഫോർ ലൈഫ്, ഐ ലവ് യു ഇങ്ങനെ പലവിധ ഹാഷ്‍ടാഗുകളും കാണും. സുഹൃത്തുക്കളെ അവർ നല്ലത്, വളരെ നല്ലത്, ഏറ്റവും നല്ലത് ഇങ്ങനെ വേർതിരിച്ചു സ്നേഹിക്കുകയും ചെയ്യും. പക്ഷേ ഒന്നിൽ കൂടുതൽ ബെസ്റ്റ്ഫ്രണ്ട് ഉണ്ടാവുകയും ചെയ്യും. യഥാർത്ഥത്തിൽ ഒരു വ്യക്‌തിക്ക് ആത്മാർത്ഥ സുഹൃത്ത് എന്നു പറയാൻ ഒരാളെ ഉണ്ടാകും. ബാക്കി ഉള്ളവരോടൊക്കെ ആ പേര് പറഞ്ഞ് സ്നേഹം പ്രകടിപ്പിക്കേണ്ടി വരും. ഐ ലവ് യു എന്ന് പറയുമ്പോൾ അവർ അത് ഉദ്ദേശിക്കുന്നതേയില്ല. സത്യത്തിൽ ഇത്തരം ഫേക്ക് ചങ്ങാതിമാരിൽ നിന്ന് അകന്നു നിൽക്കുന്നതാണ് നല്ലത്. ആരുമായും ചങ്ങാതിമാരാകുന്ന ഇക്കൂട്ടർ ഒരിക്കലും നല്ല സൗഹൃദത്തിന് മൂല്യം നൽകുന്നവരല്ല.
ആവശ്യം മാത്രം
ശ്രദ്ധിക്കൂ! ഇവരെ ഒരിക്കലും തെരഞ്ഞെടുക്കരുത്. സ്വന്തം കാര്യം നടത്താൻ മാത്രമാണ് ഇക്കൂട്ടർക്ക് ചങ്ങാതിമാർ. അവർ ഒരിക്കലും നിങ്ങളെ മറക്കുകയില്ല. ആവശ്യം അടിക്കടി വരുമ്പോൾ ഓർമ്മയിൽ നിങ്ങൾ തീർച്ചയായും ഉണ്ടാകും. ആദ്യം പറഞ്ഞ വിശ്വസ്തരായ അസൂയാലുക്കളുമായി ഇവരെ താരതമ്യം അരുത്. എന്തു സാഹചര്യത്തിലും നിങ്ങൾ കൂടെ ഉണ്ടാകുമെന്ന് ഉറപ്പാക്കിയാണ് ഇവർ കൂട്ടുപിടിക്കുന്നത്. രക്ഷിതാക്കളെ വെട്ടിച്ച് വീട്ടിൽ നിന്ന് പുറത്തു ചാടാൻ സഹായിക്കാൻ, കൈക്കൂലി കൊടുക്കാൻ പണം കണ്ടെത്താൻ, പ്രേമ ഭാജനത്തെ സന്ദർശിക്കാൻ എന്തിനും നിങ്ങളുടെ സഹായം ഇവർക്ക് വേണ്ടി വരും. ഇനി നേരെമറിച്ച് നല്ലൊരു മഴയുള്ള ദിവസം, നിങ്ങൾക്ക് ഒരു ആവശ്യം വന്നെന്നിരിക്കട്ടെ, അവരുടെ പൊടി പോലും ഉണ്ടാകില്ല!
മോഷ്ടാവ്
മോഷണം എന്നു പറയുന്നത് വസ്‌തുക്കളും പണവും മാത്രമല്ല. നല്ല ചങ്ങാതിമാരെയും മോഷ്ടിക്കാം. നിങ്ങളുടെ ജീവിതത്തിൽ ഉള്ള നല്ല കൂട്ടുകാരെ മോഷ്ടിക്കുന്ന ചങ്ങാതി വേഷം ധരിച്ചെത്തുന്ന കള്ളന്മാരുണ്ട്. പാർട്ടികളിലോ മറ്റോ ഒരു ചങ്ങാതിയെ ഇവർക്കൊന്നു പരിചയപ്പെടുത്തിക്കൊടുത്തു നോക്കൂ. അവർ പിന്നെ വലിയ ചങ്ങാതിമാരായി മാറും. കൂടെക്കൂടെ കാണാനും തുടങ്ങും. ഇതൊന്നും ചിലപ്പോൾ നിങ്ങൾ അറിഞ്ഞില്ലെന്നു പോലും വന്നേക്കാം. ഇങ്ങനെ വരുമ്പോൾ വഞ്ചിക്കപ്പെടുന്നത് നിങ്ങൾ ആയിരിക്കും. ചിലപ്പോൾ നിങ്ങളുടെ പങ്കാളിയെ പോലും തട്ടിയെടുത്തു കൊണ്ടു പോയെന്നു വരും. ഇതൊക്കെ സാധാരണ കാര്യമാണല്ലോ എന്ന് സ്വയം വിശ്വസിപ്പിക്കാൻ പാടുപെടും നിങ്ങൾ. നിങ്ങളോട് അസൂയ ഉള്ള ചങ്ങാതിയാണ് ഇങ്ങനെ ചെയ്യുന്നത് എന്നു മാത്രം മനസ്സിലാക്കുക.
കളി മാത്രം
ഒരു രാഷ്ട്രീയക്കാരന്‍റെ നയതന്ത്രം ഉള്ള ചങ്ങാതിമാരുണ്ടാകും. ഇവരെ വിശ്വസിച്ച് ഒന്നും ചെയ്യാൻ കഴിയില്ല എന്നതാണ് ഏറ്റവും വലിയ സംഗതി. നിങ്ങളുടെ അടുത്ത് ഒരു രീതിയിലും മറ്റുള്ളവരുടെ അടുത്ത് വേറൊരു രീതിയിലും ആയിരിക്കും പെരുമാറ്റം. നിങ്ങളെ കുറിച്ച് മറ്റുള്ളവരുടെ അടുത്ത് പറയുന്നത് വ്യത്യസ്തമായിരിക്കും. തിരിച്ചും അങ്ങനെ തന്നെ. ഇങ്ങനെ ചെയ്‌ത് ചെയ്‌ത് പലരുടെയും ബന്ധങ്ങൾ ഇല്ലാതാകും. വളരെ വിദഗ്ധമായ നീക്കം ആയതു കൊണ്ട് നിങ്ങൾ പോലും സത്യം അന്വേഷിക്കാൻ മെനക്കെട്ടെന്നു വരില്ല. പക്ഷേ അവർ നിങ്ങളോടും, നിങ്ങളുടെ മറ്റ് സുഹൃത്തിനോടും ശത്രുവിനോടും ഒക്കെ നല്ല ബന്ധം നിലനിർത്തുകയും ചെയ്യും. ഇവരെ ചങ്ങാതി എന്ന് വിളിക്കണോ?
വിമർശകർ
ഇങ്ങനെയും ചിലർ നിങ്ങളുടെ ഫ്രണ്ട് ലിസ്റ്റിലുണ്ടാകും. വിമർശിക്കാൻ മാത്രമേ അറിയൂ. അതിലൂടെ ആത്മവിശ്വാസം മുഴുവനും ഇല്ലാതാക്കി സ്വന്തം കഴിവിലുള്ള എല്ലാ പോസിറ്റീവ് ചിന്തയും നശിപ്പിക്കും. എപ്പോഴും ഒരു ബോസ് സ്വഭാവം കാണിക്കും. എന്തു ചെയ്താലും അതിനെ വിലയിരുത്തലാണ് പ്രധാന വിനോദം.
യഥാർത്ഥ ചങ്ങാതി
മേൽപ്പറഞ്ഞതൊക്കെ വായിച്ചപ്പോൾ ഈ ലോകത്ത് നല്ലവർ ആരുമില്ലേ എന്നു തോന്നിയോ? പക്ഷേ അങ്ങനെയല്ല. സ്നേഹവും ആത്മാർത്ഥതയും ഉള്ള സൗഹൃദബന്ധങ്ങളും ഉണ്ട്. ഇത്തരം ബന്ധങ്ങൾ ഒരിക്കലും മേധാവിത്വ സ്വഭാവം കാണിക്കില്ല. വിമർശനങ്ങളേക്കാൾ ഉപദേശങ്ങൾ ആയിരിക്കും മുന്നിൽ. സ്വന്തം കഴിവിൽ കൂടുതൽ വിശ്വസിക്കാൻ പ്രേരിപ്പിക്കുന്ന ഒരു ചങ്ങാതി നിങ്ങൾക്കുണ്ടെങ്കിൽ അത് നല്ല ചങ്ങാതിയാണെന്ന് ഉറപ്പിക്കാം. കഷ്ടപ്പാടിലും, സന്തോഷത്തിലും കൂടെ ഉണ്ടെങ്കിലും നല്ല ചങ്ങാതി ആണെന്ന് വിശ്വസിക്കാം. വ്യവസ്‌ഥകളോ ഉപാധികളുമില്ലാത്ത സ്നേഹം നൽകുന്നതാരോ അവർ ചങ്ങാതി ആണ്.
