നൂറ്റാണ്ടുകളായി മനുഷ്യ സംസ്കാരത്തിന്റെ അവിഭാജ്യ ഘടകമായി തുടരുന്ന ഒന്നാണ് പെർഫ്യൂം. ചാരുത, വ്യക്തിത്വം, ആത്മവിശ്വാസം എന്നിവയെ അത് പ്രതീകപ്പെടുത്തുന്നു. ഇന്ന് പെർഫ്യൂം ആഡംബരത്തേക്കാൾ അനിവാര്യതയായി മാറിയിരിക്കുന്നു. എല്ലാത്തിനുമുപരി പെർഫ്യൂം ആത്മവിശ്വാസത്തിന്റെ അടയാളം കൂടിയാണ്. പെർഫ്യൂം അടിക്കാതെ പുറത്ത് പോകുന്നതിനെക്കുറിച്ച് ഇന്ന് ആർക്കും ചിന്തിക്കാൻ കൂടി കഴിയില്ല. പെർഫ്യൂം ഒരു സാധാരണ വസ്തുവല്ല. അത് വ്യക്തിയുടെ സാന്നിധ്യത്തെ കൂടിയാണ് അവിസ്മരണീയമാക്കുന്നത്. നിങ്ങളിൽ നിന്നുയരുന്ന നേരിയ ഹൃദ്യമായ സുഗന്ധം മറ്റൊരാളുടെ മനസ്സിൽ നിങ്ങളെക്കുറിച്ച് മതിപ്പ് സൃഷ്ടിക്കും. എന്നാൽ ഇത്തരം ഹൃദ്യമായ ഫലം ലഭിക്കുന്നതിന് നല്ലൊരു സുഗന്ധം മാത്രം പോരാ. അത് ശരിയായ രീതിയിൽ എങ്ങനെ പ്രയോഗിക്കണമെന്നതു കൂടി അറിഞ്ഞിരിക്കണം.
പെർഫ്യൂം പുരട്ടാനുള്ള ഏറ്റവും നല്ല മാർഗം വസ്ത്രങ്ങളിൽ മാത്രമല്ല നേരിട്ട് ചർമ്മത്തിലും പുരട്ടുക എന്നു കൂടിയാണ്. കൈത്തണ്ട, കഴുത്ത്, ചെവിക്ക് പിന്നിൽ അല്ലെങ്കിൽ കൈമുട്ടിന്റെ ഉൾഭാഗങ്ങൾ തുടങ്ങിയ നാഡിമിടിപ്പ് ഉള്ള ശരീര ഭാഗങ്ങളിൽ സുഗന്ധദ്രവ്യം പുരട്ടുന്നത് കൂടുതൽ ഫലപ്രദമാണ്. കാരണം അവിടത്തെ ചൂട് സുഗന്ധം സാവധാനം പരത്താൻ സഹായിക്കുന്നു. കുളികഴിഞ്ഞ് പെർഫ്യൂം പുരട്ടുന്നതാണ് നല്ലത്. പക്ഷേ ചർമ്മം പൂർണ്ണമായും വരണ്ടതായിരിക്കണം. പലരും പെർഫ്യൂം പുരട്ടിയ ശേഷം കൈത്തണ്ടിൽ തടവാറുണ്ട്. ഇത് തെറ്റായ രീതിയാണ്. സുഗന്ധത്തിന്റെ മുകളിലെ നനുത്ത ഗന്ധം പോകാൻ ഇടയാക്കുകയും അതിന്റെ പ്രഭാവം കുറയ്ക്കുകയും ചെയ്യും. പ്രേ ചെയ്തശേഷം ഉണങ്ങാൻ അനുവദിക്കുക.
അളവ് പ്രധാനം
2 മുതൽ 4 സ്പ്രേ ധാരാളം മതിയാകും. അമിതമായ പെർഫ്യൂം ഉപയോഗം ചുറ്റുമുള്ളവരെ അസ്വസ്ഥരാക്കും. അതേസമയം നേരിയതും സന്തുലിതവുമായ സുഗന്ധം വളരെ നേരം ആകർഷിക്കും. വ്യത്യസ്ത തരം പെർഫ്യൂമുകളെക്കുറിച്ചും അവ എപ്പോൾ എന്തുകൊണ്ട് തിരഞ്ഞെടുക്കണം എന്നതിനെക്കുറിച്ചും അറിയാം.
ആദ്യം വരുന്നത് ലിക്വിഡ് പ്രേ പെർഫ്യൂമാണ്. അതിൽ Eau de Perfum (EDP) Eau de toilettee (EDT) ഉൾപ്പെടു ന്നു. ഇഡിപിയിൽ കൂടുതൽ സുഗന്ധതൈലം ഉണ്ട്. അതിനാൽ ഇത് കൂടുതൽ നേരം നിലനിൽക്കുകയും പ്ര ത്യേക അവസരങ്ങൾക്ക് അനുയോജ്യവുമാണ്. മറുവശത്ത് ഇഡിറ്റിയിൽ നേരിയ സുഗന്ധമാണുള്ളത്. അത് ദിവസം മുഴുവൻ അനുയോജ്യമാണ്. പ്രത്യേകിച്ച് ഓഫീസ് അല്ലെങ്കിൽ പുറത്തെ ജോലികൾക്ക്.
ഇക്കാലത്ത് സോളിഡ് പെർഫ്യൂം ഉപയോഗിക്കുന്നതും വർദ്ധിച്ചിട്ടുണ്ട്. ചെറിയ ബോക്സുകളിൽ ഇത് ലഭ്യമാണ്. ബാം പോലെയാണ് ഇത്. കൈത്തണ്ടയിലോ കഴുത്തിലോ ചെവിക്ക് പിന്നിലോ വിരൽ കൊണ്ട് ഇത് പുരട്ടാം. മാത്രവുമല്ല ഒലിച്ചിറങ്ങുകയുമില്ല. യാത്രയ്ക്ക് വളരെ സൗകര്യപ്രദമാണ്. ലളിതവും ശുദ്ധവും വ്യക്തിഗതവുമായ സുഗന്ധം ഇഷ്ടപ്പെടുന്നവർക്ക് ഇത് അനുയോജ്യമാണ്. റോൾ ഓൺ പെർഫ്യൂം ലളിതമായ ഓപ്ഷനാണ്. അതിൽ ചെറിയ ഒരു ബോളുണ്ട്. ആ ബോൾ ഉപയോഗിച്ചാണ് പെർഫ്യൂം നേരിട്ട് ചർമ്മത്തിൽ പുരട്ടുന്നത്. ഇതിൽ പാഴാകൽ കുറവാണ്. സുഗന്ധം വളരെനേരം നിലനിൽക്കും. മിക്കതും ആൽക്കഹോൾ രഹിതമാണ്. അതിനാൽ സെൻസിറ്റീവ് ചർമ്മമുള്ളവർക്ക് ഇത് നല്ലൊരു ഓപ്ഷനാണ്.
നേരിയതും പുതുമയുള്ളതുമായ സുഗന്ധം നൽകുന്ന ഒന്നാണ് ബോഡി മിസ്റ്റ്. ശരീരത്തിലുടനീളം ഇത് പുരട്ടാം. പ്രത്യേകിച്ച് കുളിച്ചതിന് ശേഷം. വേനൽക്കാലത്ത് അല്ലെങ്കിൽ ദിവസം മുഴുവൻ പുറത്തു നിൽക്കേണ്ടിവരുമ്പോൾ ഇതിന്റെ ഉപയോഗം ആശ്വാസകരമാണ്. എന്നിരുന്നാലും അതിന്റെ ഈട് കുറവായതിനാൽ ദിവസം 2-3 തവണയെങ്കിലും പുരട്ടേണ്ടി വരും. തലമുറകളായി ആളുകൾ ഉപയോഗിക്കുന്ന പരമ്പരാഗത സുഗന്ധമാണ് അത്തർ. ആൽക്കഹോൾ അടങ്ങിയിട്ടില്ലാത്ത ശുദ്ധമായ പെർഫ്യൂം ഓയിലാണിത്. അതിന്റെ ഒരു തുള്ളി മാത്രം മതി ദിവസം മുഴുവനും സുഗന്ധഭരിതമായിരിക്കാൻ. പ്രത്യേകിച്ചും പരമ്പരാഗത അവസരങ്ങളിലോ ഉത്സവങ്ങളിലോ ആണ് ഇത് ഉപയോഗിക്കുക.
ഇവ ശ്രദ്ധിക്കുക
- പെർഫ്യൂം മുടിയിൽ ലഘുവായി തളിക്കാം. പക്ഷേ നേരിട്ട് തലയോട്ടിയിൽ പുരട്ടരുത്.
- പെർഫ്യൂം നേരിട്ട് സൂര്യപ്രകാശത്തിലോ ചൂടിലോ ഒരിക്കലും സൂക്ഷിക്കരുത്, ഗുണനിലവാരം നശിപ്പിക്കും.
- രണ്ട് വ്യത്യസ്ത പെർഫ്യൂമുകൾ ഒരുമിച്ച് പുരട്ടരുത്. കാരണം അത് ഇടകലർന്ന് ആവശ്യമുള്ള ഫലം നൽകില്ല.
സുഗന്ധം മനോഹരമായ വികാരം മാത്രമല്ല അത് വ്യക്തിത്വത്തെ കൂടി പ്രതീകപ്പെടുത്തുന്നു. നിങ്ങൾ ധരിക്കുന്ന വസ്ത്രം ആളുകൾ കാണുമെങ്കിലും നിങ്ങൾ അവ ശേഷിപ്പിക്കുന്ന സുഗന്ധമാവും അവർ വളരെക്കാലം ഓർത്തുവയ്ക്കുക. അതിനാൽ അടുത്ത തവണ പെർഫ്യൂം പ്രയോഗിക്കുമ്പോൾ അതിന്റെ ഗന്ധത്തെക്കുറിച്ച് മാത്രം ചിന്തിക്കാതെ അത് നിങ്ങളെക്കുറിച്ച് എന്ത് പറയുമെന്ന് കൂടി ചിന്തിക്കുക.
