കുടുംബ ബന്ധങ്ങളോ സാമൂഹിക ബന്ധങ്ങളോ പ്രണയ ബന്ധങ്ങളോ ആകട്ടെ എല്ലാത്തിലും കുറച്ച് “ഇൻവെസ്റ്റ്മെന്‍റ് നടത്തേണ്ടതുണ്ട്. ഇൻവെസ്റ്റ്മെന്‍റ് എന്നാൽ സാമ്പത്തിക നിക്ഷേപം എന്ന് അല്ല. എല്ലാത്തിന്‍റെയും ആകെ തുകയായ ഒരു പരിശ്രമം ഉണ്ടെങ്കിൽ ബന്ധങ്ങൾ സുഗമമായി നടക്കുകയും മനസ്സിന് സമാധാനം നൽകുകയും ചെയ്യും. നമ്മൾ ഒരു ബന്ധം സ്‌ഥാപിക്കുമ്പോഴെല്ലാം തുടക്കത്തിൽ അതിന് പ്രാധാന്യം നൽകുകയും പരിപാലിക്കുകയും ചെയ്യുന്നു. എന്നാൽ കാലക്രമേണ ആ ബന്ധം നിലനിർത്തുന്നതിൽ നാം അശ്രദ്ധരാകുന്നു. പിന്നെ ക്രമേണ ഈ ബന്ധം വിഷലിപ്ത‌മാകുമ്പോൾ കാരണം പോലും നമുക്ക് മനസ്സിലാകുന്നില്ല എന്ന അവസ്‌ഥ ഉണ്ടാകാം. ചില ശ്രമങ്ങൾ നടത്തി ബന്ധങ്ങൾ കേടാകാതെ സംരക്ഷിക്കുക.
പരസ്‌പര ബഹുമാനം
ബന്ധങ്ങൾ എന്തുതന്നെ ആയാലും നാം നമ്മുടെ ഹൃദയത്തിൽ നിന്ന് പരസ്പരം ബഹുമാനിക്കാതെ മറ്റുള്ളവരുടെ വികാരങ്ങളെ മാനിക്കാതെ സ്വന്തം താൽപ്പര്യങ്ങൾ മാത്രം പിന്തുടരുക ആണെങ്കിൽ ബന്ധം വഷളാകുമെന്ന് ഉറപ്പാണ്. പരസ്പ്‌പരം കണക്റ്റഡ് ആയ ശേഷവും ഇരുവരും സ്വതന്ത്രരാണെന്ന് തോന്നുന്ന ഒരു ബന്ധം മാത്രമേ നിലനിൽക്കുന്നതായി കണ്ടിട്ടുള്ളു. അതിനാൽ പരസ്പരം ഇടം നൽകുകയും ബഹുമാനിക്കുകയും ചെയ്യുക.
വിശ്വാസമാണ് എല്ലാം
പങ്കാളിയെ വിശ്വസിക്കുന്നത് നിർത്തുമ്പോൾ ആ ബന്ധം പതുക്കെ അവിടെ അവസാനിക്കാൻ തുടങ്ങുന്നു. അതിനാൽ പരസ്പ്‌പരം വിശ്വസിക്കുക എന്നത് വളരെ പ്രധാനമാണ്. നമ്മുടെ സന്തോഷങ്ങളും സങ്കടങ്ങളും പരസ്പരം പങ്കുവയ്ക്കാനും നമ്മുടെ വികാരങ്ങൾ പങ്കിടാനും കഴിയുന്ന തരത്തിലാണ് ബന്ധങ്ങൾ രൂപപ്പെടുന്നത്. നമ്മൾ ഇത് ചെയ്യാതെ ബന്ധത്തിൽ എപ്പോഴും സംശയാസ്‌പദമായി തുടരുകയാണ് എങ്കിൽ ബന്ധം വഷളാകുമെന്ന് ഉറപ്പാണ്. ഏത് ബന്ധത്തിലും എപ്പോഴും സംശയിക്കുന്ന ശീലം ഉപേക്ഷിക്കണം.
പരസ്പരം സമയം നൽകുന്നത്
എല്ലാവരും ജീവിതത്തിൽ തിരക്കുള്ള ഒരു ദിനചര്യ നയിക്കുന്നു. എന്നാൽ ഒരു ജീവിതം നയിക്കാൻ മാനസിക ശക്തി പോലെ തന്നെ പ്രധാനമാണ് സാമ്പത്തിക ശക്തിയും. പണം ഉണ്ടാക്കാനുള്ള തിരക്കിൽ പരസ്പരം സമയം നൽകാൻ പലരും മറക്കുന്നു. നമുക്ക് പണം മാത്രമല്ല, ചിരിക്കാനും വികാരങ്ങൾ പങ്കിടാനും ബന്ധങ്ങൾ ആവശ്യമാണ്. അതുകൊണ്ട് രണ്ടിനും അതിന്‍റേതായ പ്രാധാന്യമുണ്ട്. നിങ്ങളുടെ മുഴുവൻ സമയവും ജോലിക്ക് നൽകുകയാണ് എങ്കിൽ നിങ്ങൾക്ക് പണം കൊണ്ട് സമ്പന്നനാകാൻ കഴിയും. എന്നാൽ ബന്ധങ്ങളുടെ കാര്യത്തിൽ വളരെ ദരിദ്രനാകും. ഇത് ജീവിതത്തെ വളരെ മോശമായി ബാധിക്കുന്നു.
നിയന്ത്രണ ബോധം
എല്ലാവർക്കും പ്രതീക്ഷകൾ ഉണ്ടാകും സ്വന്തം ആഗ്രഹങ്ങൾ ഉണ്ടാകും. എന്നാൽ നിങ്ങളുടെ എല്ലാ ചിന്തകളോടും അവൻ- അവൾ യോജിക്കണമെന്നില്ല. അദ്ദേഹത്തിനും വ്യത്യസ്‌ത അഭിപ്രായമുണ്ടാകാം. അതിനാൽ ബന്ധത്തിൽ അപരനെ നിയന്ത്രിക്കുന്ന രീതി മിക്ക ബന്ധങ്ങളെയും നശിപ്പിക്കുന്നു. അതിനാൽ നിങ്ങളുടെ കാഴ്ചപ്പാടുകൾ മറ്റുള്ളവരിൽ അടിച്ചേൽപ്പിക്കുന്നതിന് പകരം മറ്റുള്ളവരെ മനസ്സിലാക്കാൻ തുടങ്ങുക.
ശരിയായ സമയത്ത് പിന്തുണയ്ക്കൽ
മോശം സമയങ്ങളിലും നിലനിൽക്കുന്ന ബന്ധങ്ങൾ ഏറ്റവും ശക്തമാണ്. അതിനാൽ ജീവിതകാലം മുഴുവൻ ബന്ധം നിലനിർത്താൻ നിങ്ങൾ ആഗ്രഹിക്കുന്നു എങ്കിൽ മോശം സമയങ്ങളിൽ ഒരിക്കലും നിങ്ങളുടെ പങ്കാളിയുടെ കൈവിടരുത്. ഇക്കാര്യങ്ങളെല്ലാം ശ്രദ്ധിച്ച് പ്രയോഗത്തിൽ വരുത്തിയാൽ മിക്ക ബന്ധങ്ങളും തകരാതെ സംരക്ഷിക്കാനും സന്തോഷകരമായ ജീവിതം നയിക്കാനും കഴിയും. ചിലർ അവരുടെ പെരുമാറ്റം കാരണം എല്ലാവർക്കും പ്രിയപ്പെട്ടവരാകുന്നു. ചിലർക്ക് അവരുടെ പെരുമാറ്റം കാരണം നല്ല ബന്ധങ്ങൾ പോലും നഷ്ടപ്പെടും. നമുക്കെല്ലാവർക്കും ഒറ്റയ്ക്ക് ജീവിക്കാൻ കഴിയില്ല. ബന്ധങ്ങളാണ് ജീവിതത്തിന്‍റെ ശക്തി. അതിനാൽ ആരെയും നിങ്ങളിൽ നിന്ന് അകറ്റാൻ അനുവദിക്കരുത്.
