കടൽ കാണാനും പുരാതന പൈതൃകം കാണാനും ലഹരി ഉപയോഗിക്കാനും പാർട്ടി നടത്താനും വേണ്ടി മാത്രം ആളുകൾ ഗോവയിലേക്ക് പോയിരുന്ന ഒരു കാലമുണ്ടായിരുന്നു. എന്നാൽ ഇന്നത്തെ യുവാക്കൾ ഗോവ ടൂറിസത്തെ വ്യത്യസ‌മായ ഒരു കോണിൽ കണ്ടു തുടങ്ങിയിരിക്കുന്നു. അതാണ് സാഹസിക ടൂറിസം. കയാക്കിംഗ്, ജമ്പിംഗ്, കൈറ്റ് സർഫിംഗ്, ബനാന റൈഡുകൾ, സ്നോർക്കലിംഗ്, പാരാസെയിലിംഗ്, പാരാഗ്ലൈഡിംഗ്, സ്കൂബ ഡൈവിംഗ് തുടങ്ങിയ നിരവധി സാഹസിക കായിക വിനോദങ്ങൾ യുവാക്കൾ ആസ്വദിക്കാൻ ഇഷ്ടപ്പെടുന്നു. ഇന്ന് വിനോദസഞ്ചാരികളെയും സാഹസിക പ്രേമികളെയും ഗോവയിലേക്ക് ഏറ്റവും കൂടുതൽ ആകർഷിക്കുന്നത് സാഹസിക ടൂറിസം എന്ന സാധ്യത ആണ്.
കാരണം സാഹസിക പ്രവർത്തനങ്ങൾക്ക് ഏറ്റവും മനോഹരമായ സ്‌ഥലങ്ങളിൽ ഒന്നായി ഗോവ കണക്കാക്കപ്പെടുന്നു. 2024 ഡിസംബർ മാസത്തിൽ പുതുവത്സരാഘോഷത്തിൽ ഗോവ സന്ദർശിച്ച ആഭ്യന്തര വിനോദസഞ്ചാരികളുടെ എണ്ണത്തിൽ 27% റെക്കോർഡ് വർദ്ധനവ് ഉണ്ടായി ട്ടുണ്ട് എന്നാണ് കണക്കുകൾ പറയുന്നത്. 2023-നെ അപേക്ഷിച്ച് 2024 ഡിസംബറിൽ ഗോവയ്ക്ക് 75.51 കോടിയിലധികം വരുമാനം ലഭിച്ചു എന്നാണ് വിവരം. ഗോവ യാത്ര ആവേശകരവും രസകരവുമാക്കാൻ ആഗ്രഹിക്കുന്നുവെങ്കിൽ ഗോവയിലെ ഈ പ്രവർത്തനങ്ങളിൽ സ്വയം പങ്കാളികളാകേണ്ടത് പ്രധാനമാണ്. എന്നാൽ ഈ സാഹസിക കായിക വിനോദങ്ങൾക്കുള്ള ചില നിയമങ്ങൾ അറിയേണ്ടതും പ്രധാനമാണ്.
ഗോവ ടൂറിസം ഡെവലപ്മെന്‍റ് കോർപ്പറേഷൻ അതായത് ജിടിസിഡി ഈ ദിശയിൽ നിരവധി സാഹസിക കായിക വിനോദങ്ങളെ പ്രോത്സാഹിപ്പിക്കുന്നു. സുരക്ഷിതവും ആവേശകരവുമായ പരിപാടികൾ സംഘടിപ്പിക്കുന്നു. ഗോവയിൽ ഇക്കാലത്ത് വളരെ പ്രചാരത്തിലുള്ള ചില ഗെയിമുകളെക്കുറിച്ച് നമുക്ക് നോക്കാം.
ബംഗി ജമ്പിംഗ്
വടക്കൻ ഗോവയിലെ മേം തടാകത്തിൽ ബംഗി ജമ്പിംഗ് വളരെ ജനപ്രിയമാണ്. ഓസ്ട്രേലിയ, ന്യൂസിലൻഡ് തുടങ്ങിയ അന്താരാഷ്ട്ര സുരക്ഷാ മാനദണ്ഡങ്ങൾ പാലിച്ചുകൊണ്ടാണ് ഇവിടെ വിനോദസഞ്ചാരികളെ ഈ കായിക വിനോദത്തിലേക്ക് പരിചയപ്പെടുത്തുന്നത്. അന്താരാഷ്ട്ര അംഗീകാരമുള്ള ജിന്മാസ്‌റ്റേഴ്‌സ് എന്നതിലുപരി കായികരംഗത്തെ അച്ചടക്കം, വിശ്വാസ്യത, സുരക്ഷിതമായ പെരുമാറ്റം എന്നിവ നിലനിർത്തുന്നതിൽ വിദഗ്‌ധരായ മുൻസൈനിക ഉദ്യോഗസ്‌ഥരാണ് ഇതിന്‍റെ മേൽനോട്ടം വഹിക്കുന്നത്. 2010 മുതൽ ഇന്നുവരെ ഏകദേശം 1,50,000 ജമ്പുകൾ ഇവിടെ നടത്തിയിട്ടുണ്ട്. ഇത് വിനോദസഞ്ചാരികൾ ആസ്വദിച്ചു. 12 നും 45നും ഇടയിൽ പ്രായമുള്ള 40 മുതൽ 110 കിലോഗ്രാം വരെ ഭാരമുള്ളവരുമായ എല്ലാവർക്കും ഇതിൽ പങ്കെടുക്കാം. എന്നാൽ ഉയർന്ന രക്തസമ്മർദ്ദം, ഒടിവ് അല്ലെങ്കിൽ ശസ്ത്രക്രിയ, നടുവേദന, നാഢീ സംബന്ധമായ തകരാറുകൾ ഉള്ളവർ, ഗർഭിണികൾ തുടങ്ങിയവർ ഇത് ഒഴിവാക്കേണ്ടതുണ്ട്.
സ്കൂബ ഡൈവിംഗ്
ഗോവയിലെ ആഴത്തിലുള്ള നീല സമുദ്ര ലോകത്തെക്കുറിച്ചുള്ള അറിവ് പകരുന്ന സ്കൂബ ഡൈവിംഗ് വിനോദസഞ്ചാരികൾക്ക് വളരെ സവിശേഷമാണ്. സ്കൂബ ഡൈവിംഗിന്‍റെ സഹായത്തോടെ നിങ്ങൾക്ക് ഇവിടെ മനോഹരമായ പവിഴപ്പുറ്റുകളും കടൽപ്പായലുകളും പര്യവേക്ഷണം ചെയ്യാം. ഇതിനുപുറമെ ഇവിടുത്തെ വർണ്ണാഭമായ മത്സ്യങ്ങളെ തൊട്ടുരുമ്മി നീന്തുന്നത് അവിസ്‌മരണീയമാകും. കടലിൽ നിങ്ങൾക്കൊപ്പം പരിശീലകരും ഉള്ളതുകൊണ്ട് സുരക്ഷിതമായി പോകാം. ഡൈവിംഗ് ചെയ്യാൻ ആവശ്യമായ ഉപകരണങ്ങൾ ശ്വസന ഉപകരണങ്ങൾ എന്നിവയും നൽകുന്നു. സ്കൂബ ഡൈവിംഗ് ഫീസ് 2,999 ഉം ജിഎസ്‌റ്റിഉം ആണ്. ഗോവയിൽ ഗ്രാൻഡ് ഐലൻഡിലും പീജിയൺ ഐലൻഡിലും ഈ പ്രവർത്തനങ്ങൾ ചെയ്യാൻ കഴിയും. തുടക്കക്കാർക്ക് മുതൽ പരിചയ സമ്പന്നരായ മുങ്ങൽ വിദഗ്‌ധർക്ക് വരെ ഇത് ആസ്വദിക്കാം. 5 നും 10നും ഇടയിൽ പ്രായമുള്ള കുട്ടികൾക്കും ആരോഗ്യ പ്രശ്നമുള്ള വിനോദസഞ്ചാരികൾക്കും സൗജന്യമായി ബോട്ട് യാത്രയിൽ പങ്കെടുക്കാം. ഡൈവിംഗിന് മുമ്പ് എല്ലാ വിനോദസഞ്ചാരികളെയും വൈദ്യപരിശോധനയ്ക്ക് വിധേയമാക്കുകയും ഒരു സർട്ടിഫൈഡ് ഇൻസ്ട്രക്ടർ ഒരു ഹ്രസ്വ സെഷൻ നൽകുകയും ചെയ്യുന്നു. ഡൈവിംഗിന് മുമ്പ് എല്ലാ സുരക്ഷാ നടപടികളും പാലിക്കുന്നു. ഉദാഹരണത്തിന് ഡൈവ് ഗിയർ, വെറ്റ് സ്യൂട്ട് മുതലായവ.
കൊങ്കൺ എക്സ്‌പ്ലോറിംഗ്
ചെറിയ ഗ്രൂപ്പുകൾക്കായി സംഘടി പ്പിക്കുന്ന ഒരു ഇഷ്ട്‌ടാനുസൃത സ്വകാര്യ ബോട്ട് യാത്രയാണിത്. ഈ യാത്ര വിനോദ സഞ്ചാരികൾക്ക് ഗോവയിലെ ജലപാതകൾ ശാന്തവും ആവേശകരവുമായ രീതിയിൽ അനുഭവിക്കാൻ അവസരം നൽകുന്നു. ഈ സമയത്ത് ഗോവയുടെ മനോഹരമായ കടൽ കാഴ്ച ആസ്വദിക്കുന്നതിനൊപ്പം മറഞ്ഞിരിക്കുന്ന ദ്വീപുകളും കണ്ടൽക്കാടുകളും കാണാനുള്ള അവസരവും ലഭിക്കും. ഈ യാത്രയിൽ പങ്കെടുക്കുന്ന വിനോദസഞ്ചാരികൾക്ക് സുരക്ഷയ്ക്കായി പരി ശീലനം ലഭിച്ച ഒരു മുങ്ങൽ വിദഗ്ദ്ധൻ, ജാക്കറ്റ്, നന്നായി പരിപാലിക്കുന്ന ബോട്ട് എന്നിവ നൽകുന്നു.
പാരാമോട്ടറിംഗ്
ഇത് ഒരു ആവേശകരമായ അനുഭവമാണ്. വിനോദസഞ്ചാരികൾക്ക് സാഹസികമായ വിമാനയാത്ര നടത്താനും മനോഹരമായ ആകാശ കാഴ്ച ആസ്വദിക്കാനും കഴിയുന്ന ഒരു ആവേശകരമായ കായിക വിനോദമാണിത്. സങ്കൽപ്പിക്കാൻ പോലും കഴിയാത്ത വിധത്തിൽ ലോകത്തെ കാണാൻ പാരാമോട്ടറിംഗ് നിങ്ങളെ അനുവദിക്കുന്നു. ഒക്ടോബർ മുതൽ ജൂൺ വരെ ഉച്ചയ്ക്ക് 1 മണി മുതൽ സൂര്യാസ്‌തമയം വരെ മാത്രമാണ് ഈ കായിക വിനോദം ലഭ്യമാവുക. ഗോവയുടെ മനോഹരമായ പ്രകൃതി ദൃശ്യങ്ങൾ കാണാനുള്ള അവസരം ഇത് നൽകുന്നു. ഇതിന്‍റെ ഫ്ളൈറ്റ് ദൈർഘ്യം 6 മുതൽ 10 മിനിറ്റ് വരെയാണ്. 5 മുതൽ 90 വയസ്സ് വരെ പ്രായമുള്ളവർക്ക് കയറാവുന്നതാണ്. ഭാരപരിധി 100 കിലോഗ്രാം വരെയാണ്. ഈ സാഹസികത ആസ്വദിക്കാനുള്ള ചെലവ് 4720 രൂപ വരും. ഇതിന്‍റെ സു രക്ഷാ മാനദണ്ഡങ്ങൾ വളരെ ശക്തമാണ്. സർട്ടിഫൈഡ് പൈലറ്റുമാരാണ് നമ്മളെ കൊണ്ടു പോകുക. അവർ കായിക വിനോദത്തെക്കുറിച്ചുള്ള എല്ലാ വിവരങ്ങളും മുൻകൂട്ടി പറഞ്ഞു തരും.
വാട്ടർ സ്ക‌ീയിംഗ്
ഈ ഗെയിം അപകടകരമാണെന്ന് തോന്നാം. പക്ഷെ വളരെ രസകരവുമാണ്. ഒരു കയർ ഒരു സ്‌കീയിലും മറ്റേ അറ്റം വേഗത്തിൽ നീങ്ങുന്ന ഒരു സ്‌പീഡ് ബോട്ടിലും ബന്ധിച്ചിരിക്കുന്നു. ബോട്ട് നീങ്ങുമ്പോൾ കയർ പിടിച്ച് വെള്ളത്തിൽ സന്തുലിതാവസ്‌ഥ നിലനിർത്താൻ ശ്രമിക്കുന്നു. 5 വയസ്സിന് താഴെയുള്ള കുട്ടികൾക്ക് ഈ കായിക വിനോദം കളിക്കാൻ കഴിയില്ല. ഇതിന്‍റെ ഫീസ് 500 മുതൽ 1200 വരെയാണ്. ബാഗ ബീച്ച്, മജോർഡ ബീച്ച്, മോബോർ ബീച്ച് എന്നിവിടങ്ങളിലാണ് ഇത് ചെയ്യുന്നത്.
ജെറ്റ് സ്കീ
ഹോളിവുഡ് അല്ലെങ്കിൽ ബോളിവുഡ് സിനിമകളിൽ ജെറ്റ് സ്കീ കളിക്കുന്ന നിരവധി നടന്മാരെയും നടിമാരെയും നിങ്ങൾ കണ്ടിട്ടുണ്ടാകും. എന്നാൽ ഗോവയിൽ നിങ്ങൾക്ക് ഈ പ്രവർത്തനം ആസ്വദിക്കാം. വിനോദസഞ്ചാരികൾക്കിടയിൽ ഏറ്റവും പ്രചാരമുള്ള കായിക വിനോദമാണ് ജെറ്റ് സ്കീ. തിരമാലകൾക്കനുസരിച്ച് ഉയർന്ന വേഗതയിൽ ഉയരുകയും താഴുകയും ചെയ്യുന്നതാണ് ജെറ്റ് സ്കീ.
ഒരു ജെറ്റ് സ്കിയുടെ ഉയർന്ന വേഗത റൈഡർക്കും പില്യൺ റൈഡർക്കും ഉന്മേഷം പകരുന്നു. നിങ്ങൾ ഈ ഗെയിമിൽ പുതിയ ആളാണെങ്കിൽ ഒരു പരിശീലകനോടൊപ്പം ഇത് കളിക്കാവുന്നതാണ്. കാൻഡോലിം ബീച്ച്, ബാഗ ബീച്ച്, വാഗേറ്റർ ബീച്ച് എന്നിവിടങ്ങളിൽ ജെറ്റ് സ്കീ റൈഡുകൾ ലഭ്യമാണ്. ഈ ഗെയിമിന്‍റെ ഫീസ് 500 മുതൽ ആരംഭിക്കുന്നു.
ബനാന റൈഡ്
വളരെ രസകരമായ ഒരു സാഹസിക പ്രവർത്തനമാണ് ബനാന റൈഡ്. ഇതിൽ നിങ്ങൾ ഒരു വാഴപ്പഴത്തിന്‍റെ ആകൃതിയിലുള്ള ബോട്ടിൽ ഇരുന്ന് വെള്ളത്തിന് മുകളിലൂടെ അതിവേഗത്തിൽ തെന്നിമാറുന്നു. 7 വയസ്സിന് താഴെയുള്ള കുട്ടികൾക്ക് ഈ ഗെയിമിൽ പങ്കെടുക്കാൻ കഴിയില്ല. ഗോവയിലെ കണ്ടോലിം ബീച്ച്, ബാഗ ബീച്ച്, അഞ്ജുന ബീച്ച്, അഗോഡ ബീച്ച് എന്നിവിടങ്ങളിൽ ബനാന റൈഡുകൾ സംഘടിപ്പിക്കാറുണ്ട്. ഓരേ സമയം 6 പേർക്ക് ഈ റൈഡിൽ സഞ്ചരിക്കാം. 4 പേരടങ്ങുന്ന ഒരു ഗ്രൂപ്പിന് 1400 രൂപ നൽകണം.
വൈറ്റ് വാട്ടർ റാഫ്റ്റിംഗ്
ജൂൺ മുതൽ സെപ്റ്റംബർ വരെ ഗോവയിലെ വാൽപോയിക്ക് സമീപമുള്ള മഹാദായി നദിയിൽ അതായത് മണ്ഡോവി നദിയിൽ വൈറ്റ് വാട്ടർ റാഫ്റ്റിംഗ് നടത്തുന്നു. അതിന്‍റെ സെഷനുകൾ ദിവസത്തിൽ രണ്ടു തവണയായി രാവിലെ 10 മണിക്കും ഉച്ചകഴിഞ്ഞ് 3 മണിക്കുമാണ് നടക്കുന്നത്. ഇതിനായി അഡ്വാൻസ് ബുക്കിംഗും ലഭ്യമാണ്. 12 വയസ്സിന് മുകളിലുള്ള കുട്ടികൾക്ക് ഇതിൽ പങ്കെടുക്കാം. ഈ ഗെയിമിന് ഒരാൾക്ക് 1800 ആണ് ഫീസ്. മുൻകൂട്ടി ബുക്ക് ചെയ്തിട്ട് പോകാൻ കഴിയുന്നില്ലെങ്കിൽ യാത്രയ്ക്ക് 48 മണിക്കൂർ മുമ്പ് റദ്ദാക്കിയാൽ പണത്തിന്‍റെ 50% തിരികെ ലഭി ക്കും. ഇതൊരു രസകരമായ ഗെയിമാണ്. ആസ്വദിക്കാനുള്ള കഴിവ് വളരെ വ്യത്യസ്തമാണ്. സുരക്ഷയ്ക്കായി ലൈഫ് ജാക്കറ്റ് ഹൈൽമെറ്റ് ഇവ ധരിക്കണം. കൂടെ ഗൈഡും ഉണ്ടാകും.
വിൻഡ് സർഫിംഗ്
ഗോവയിൽ സാഹസികത ആസ്വദിക്കാൻ സഹായിക്കുന്ന സാഹസിക വിനോദങ്ങളിൽ ഒന്നാണ് വിൻഡ് സർഫിംഗ്. ഈ കായിക വിനോദത്തിൽ വെള്ളത്തിൽ ഒരു സർഫ്‌ബോർഡിൽ സന്തുലിതാവസ്‌ഥ നിലനിർത്തണം. ഈ ഗെയിം കേൾക്കുമ്പോൾ നിങ്ങൾക്ക് വളരെ എളുപ്പമാണെന്ന് തോന്നാം. പക്ഷെ അത് ചെയ്യാൻ ബുദ്ധിമുട്ടാണ്. കലാൻഗുട്ട് ബീച്ച്, വാഗേറ്റർ ബീച്ച്, കോൾവ ബീച്ച്, മിറാമർ ബീച്ച്, ഡോണ പൗള ബീച്ച് എന്നിവടങ്ങളിൽ വിൻഡ്‌സർഫിംഗ് വളരെ പ്രശസ്തമാണ്. ഇവിടെ ഫീസ് 400 മുതൽ 800 വരെയാണ്.
കയാക്കിംഗ്
ഗോവയിൽ സുഹൃത്തുക്കളുമൊത്തുള്ള കയാക്കിംഗ് ആസ്വദിക്കുന്നത് ഏറെ രസകരം ആയിരിക്കും. മനോഹരമായ സ്‌ഥലങ്ങളിലൂടെ നിങ്ങളെ കൊണ്ടുപോകാൻ പ്രത്യേകം രൂപകൽപ്പന ചെയ്ത്‌ ഒരു ബോട്ടിൽ ഇരിക്കാം. സ്വയം തുഴയാം. ഗോവയിലെ കയാക്കിംഗ് അഭ്യന്തര വിദേശ വിനോദസഞ്ചാരികൾക്കിടയിൽ വളരെ ജനപ്രിയമാണ്. ഗോവയിലെ കയാക്കിംഗ് യാത്ര നിങ്ങളെ പ്രകൃതിയോട് വളരെ അടുത്തേക്ക് കൊണ്ടുപോകുന്നു. ഗോവയിൽ സുവാരി, മണ്ഡോവി നദി, സാൽ കായൽ എന്നിവ ഈ കായിക വിനോദത്തിന് പേരുകേട്ടതാണ്. കയാക്കിംഗ് ഫീസ് 1600 മുതൽ 3200 വരെയാണ്.
മൺസൂൺ കാലത്ത് പോയാൽ ഈ പറഞ്ഞ കായിക സാഹസിക വിനോദങ്ങൾ എല്ലാം ആസ്വദിക്കാൻ കഴിഞ്ഞെന്നു വരില്ല. കായിക വിനോദങ്ങൾ ആസ്വദിക്കാൻ പോകുന്നവർ മഴക്കാലം കഴിഞ്ഞു ഒക്ടോബർ മാസം മുതൽ പോകുന്നതായിരിക്കും നല്ലത്. എന്നാൽ മഴ ആസ്വദി ക്കാനും ബീച്ചിന്‍റെ സൗന്ദര്യം ആസ്വദിക്കാനും മൺസൂൺ സീസൺ നല്ലതാണ്.
