വീട്ടുകാര്യങ്ങളും ഔദ്യോഗിക ഉത്തരവാദിത്തങ്ങളും സമർത്ഥമായി കൈകാര്യം ചെയ്യുന്നതിൽ ഇന്നത്തെ സ്ത്രീകൾ ഏറെ മുന്നിലാണ്. നിസ്സാരകാര്യങ്ങൾക്കു പോലും ഭർത്താവിനെ ആശ്രയിക്കുന്ന ശീലം അവൾ ഉപേക്ഷിച്ചിരിക്കുന്നു.
വീട്ടിലെ സാമ്പത്തിക കാര്യങ്ങൾ ആസൂത്രണം ചെയ്യുന്നതിലും ഭാവി സാമ്പത്തികമായി ഭദ്രമാക്കുന്നതിലും ഇന്നത്തെ സ്ത്രീകൾ അങ്ങേയറ്റം ശ്രദ്ധ പുലർത്തുന്നു. ഒരു കുടുംബത്തിന്‍റെ ഭാവികാര്യങ്ങൾ രണ്ട് വിധത്തിലുള്ളതായിരിക്കും. ഒന്ന് നിശ്ചിതവും മറ്റൊന്ന് അനിശ്ചിതവും. കുട്ടികളുടെ വിദ്യാഭ്യാസം, തൊഴിൽ, ഭവന നിർമ്മാണം, വിവാഹം എന്നിവയാണ് നിൾചിത പദ്ധതികൾ രോഗം, അപകടം, മരണം, പ്രകൃതി ദുരന്തം എന്നിവയാണ് അനിശ്ചിതങ്ങൾ.
ഈ രണ്ടു തരത്തിലുള്ള ആവശ്യങ്ങൾക്കും സാമ്പത്തിക നില ഭദ്രമാക്കിയേ പറ്റൂ. ഇവിടെയാണ് ഒരു ഗൃഹനാഥയുടെ സാമർത്ഥ്യം തെളിയുന്നത്. സാമ്പത്തിക കാര്യങ്ങളെക്കുറിച്ചും നിക്ഷേപപദ്ധതികളെക്കുറിച്ചും പരിമിതമായ അറിവേ ഉള്ളൂവെങ്കിൽ പുറത്തുനിന്നും വിദഗ്ധോപദേശം തേടാം.
വിവരങ്ങൾ എവിടെ നിന്ന്
സാമ്പത്തിക സ്ഥാപനങ്ങളിൽ നിന്നോ സാമ്പത്തിക വിദഗ്ദ്ധരിൽ നിന്നോ വിവിധ സമ്പാദ്യ പദ്ധതികളെക്കുറിച്ച് ചോദിച്ചു മനസ്സിലാക്കാം. സാമ്പത്തിക- തൊഴിൽ മേഖലയിലുണ്ടായിട്ടുള്ള സ്ഫോടനാത്മകമായ വളർച്ചയ്ക്കൊപ്പം സാമ്പത്തിക ഉപദേഷ്ടാക്കളുടെ എണ്ണവും നാൾക്കുനാൾ വർദ്ധിച്ചുവരികയാണ്. എഫ്.പി.ബി.എസ്. (FPBS) ഇന്ത്യയിലെ സാമ്പത്തിക മാർക്കറ്റിലെ നിക്ഷേപ പദ്ധതികളെപ്പറ്റിയുള്ള ബോധവൽക്കരണം, സാന്‍റഡൈസേഷൻ, രജിസ്ട്രേഷൻ തുടങ്ങി സമഗ്ര വളർച്ച ലക്ഷ്യമാക്കിയുള്ള പരിപാടികൾ ആസൂത്രണം ചെയ്തുവരികയാണ്.
അക്കൗണ്ട് ഓപ്പൺ ചെയ്യുക, ക്യാഷ് ഡെപ്പോസിറ്റ്, ക്യാഷ് പിൻവലിക്കൽ, എൽ.ഐ.സി. പ്രീമിയം അടയ്ക്കുക, എ.ടി.എം. വഴി പണമെടുക്കുക, .യുപിഐ ഉപയോഗിക്കുക തുടങ്ങിയ ധനസംബന്ധമായ കാര്യങ്ങൾ ഗൃഹനാഥ ഇന്ന് വളരെ അനായാസമാക്കി കൈകാര്യം ചെയ്യുന്നുണ്ട്. മെച്ചപ്പെട്ട സാമ്പത്തിക ഭദ്രത ഉറപ്പുനല്കുന്ന സ്ഥാപനങ്ങളെക്കുറിച്ച് അറിയാൻ അവർ ഇന്‍റർനെറ്റിനെ വലിയതോതിൽ ആശ്രയിച്ചും തുടങ്ങിയിരിക്കുന്നു.
അടിയന്തിര ഘട്ടങ്ങളിൽ
സാമ്പത്തിക കാര്യങ്ങൾ പ്ലാൻ ചെയ്യുന്നതിനൊപ്പം എൽ.ഐ.സി, മെഡി ക്ലെയിം, ടാക്സ് സേവിംഗ്, പ്രോവിഡന്‍റ് ഫണ്ടിൽ പണം നിക്ഷേപിക്കൽ, ഹൗസ്- എജ്യുക്കേഷൻ ലോൺ, മ്യൂച്ചുവൽ ഫണ്ട് തുടങ്ങിയവയുമായി ബന്ധപ്പെട്ട കാര്യങ്ങളും അറിഞ്ഞിരിക്കണം. സാമ്പത്തിക പദ്ധതികൾ തയ്യാറാക്കുന്നതിനൊപ്പം അടിയന്തിര ഘട്ടങ്ങളെ അഭിമുഖീകരിക്കുന്നതിനായി എത്ര പണം. മിച്ചം വയ്ക്കണമെന്നതിനെക്കുറിച്ചും ഗൗരവമായി ചിന്തിക്കേണ്ടതുണ്ട്.
30 വയസ്സുള്ള വ്യക്തി മൂന്നുമാസത്തെ ശമ്പളവും 38 വയസ്സുള്ള വ്യക്തി 6 മാസത്തെ ശമ്പളും 45 വയസ്സുള്ള വ്യക്തി ഒരു വർഷത്തെ സമ്പാദ്യവും 55ൽ കൂടുതൽ പ്രായമുള്ള വ്യക്തി 6 മാസത്തെ സമ്പാദ്യവും അടിയന്തിരഘട്ടങ്ങളെ നേരിടാൻ മാറ്റിവെയ്ക്കണമെന്നാണ് സാമ്പത്തിക വിദഗ്ദ്ധർ ഉപദേശിക്കുന്നത്. സാമ്പത്തിക കാര്യങ്ങളിൽ ജാഗ്രത പുലർത്തുന്ന ഒരു ഗൃഹനാഥയെ സംബന്ധിച്ച് ഇത് വളരെ പ്രധാനമാണുതാനും.
സമ്പാദ്യത്തിൽ ശ്രദ്ധ
സമർത്ഥയും ഭാവികാര്യങ്ങളിൽ മുൻകരുതലുമുള്ള ഒരു വീട്ടമ്മ സമ്പാദ്യത്തിൽ കൂടുതൽ ശ്രദ്ധപുലർത്തും. വരുമാന നികുതിയിൽ നിന്നൊഴിവാകാവുന്ന നിക്ഷേപ പദ്ധതികളിൽ ചേരുന്നതിനും അതിന്‍റെ പ്രതിഫലത്തെക്കുറിച്ചും ബുദ്ധിമതിയായ വീട്ടമ്മയ്ക്ക് പെട്ടെന്ന് മനസ്സിലാക്കാനാവും.
ടാക്സ് സേവിംഗ് ബോണ്ട്, എൽ.ഐ.സി., നിശ്ചിത പ്രതിഫലമുള്ള നിക്ഷേപങ്ങൾ, പോസ്റ്റ‌് ഓഫീസ് റിക്കവറി ഡെപ്പോസിറ്റ്, മന്ത്ലി സേവിംഗ്, ഫിക്സഡ് ഡെപ്പോസിറ്റ്, മ്യൂച്ചുവൽ ഫണ്ട് എന്നിവയാണ് സർവ്വ സാധാരണമായ സമ്പാദ്യ പദ്ധതികൾ.
റിസ്ക് ഏറെയുള്ള പദ്ധതികളിൽ നിക്ഷേപം നടത്തുന്നതിനു മുമ്പായി മൂന്നു കാര്യങ്ങൾ ശ്രദ്ധിക്കണം. ഒന്നാമത്തേത് സുരക്ഷിതത്വം അഥവാ റിസ്ക് സാധ്യത, രണ്ടാമത്തേത് ലിക്വിഡിറ്റ്, മുന്നാമതായി പ്രതിഫലം. ആവശ്യമുള്ളപ്പോൾ പണം അനായാസമായി തിരിച്ചെടുക്കാമെന്നതാണ് ലിക്വിഡിറ്റി സൂചിപ്പിക്കുന്നത്.
ഇൻഷുറൻസ് നിക്ഷേപം
ഒരു കുടുംബം ഇൻഷുറൻസ് പോലെയുള്ള കാര്യങ്ങൾക്ക് കൂടുതൽ പ്രാധാന്യം നല്‌കണമെന്നാണ് സാമ്പത്തിക വിദഗ്ദ്ധർ അഭിപ്രായപ്പെടുന്നത്. കുടുംബത്തിന് കൂടുതൽ ഇൻഷുറൻസ് വേണ്ടിവരുന്നതാണ് കാരണം. കുടുംബനാഥന് ആകസ്‌മിക മരണം സംഭവിച്ചാലും കുടുംബത്തിന്‍റെ മൊത്തത്തിലുള്ള സാമ്പത്തിക സുരക്ഷിതത്വത്തിന് ഇൻഷുറൻസ് പോലുള്ള നിക്ഷേപങ്ങൾ കൂടുതൽ സഹായകരമാവും.
ഏതുതരം ഇൻഷുറൻസ് പദ്ധതിക്കും രണ്ടു ലക്ഷ്യങ്ങളുണ്ടാവും. ഒന്ന് സേവിംഗ് (റിട്ടേൺ), മറ്റൊന്ന് മരണശേഷം കുടുംബത്തിന് ലഭിക്കുന്ന റിട്ടേൺ. കുടുംബത്തിന്‍റെ സാമ്പത്തിക സുരക്ഷിതത്വവും വരുമാനവും കണക്കിലെടുത്ത് ഇൻഷുറൻസ് കവർ ചെയ്യാം. സ്വന്തം ആവശ്യങ്ങളും ഭാവിയിലെ സാമ്പത്തിക ലക്ഷ്യങ്ങളും അടിസ്ഥാനമാക്കിയാവണം ഇൻഷുറൻസ് പോളിസിയെടുക്കാൻ.
സേവിംഗ്‌സ് അടിസ്‌ഥാനമാക്കിയുള്ള പോളിസികളാണ് മണിബാക്കും നിശ്ചിത കാലാവധിയുള്ള ഇൻഷുറൻസ് പോളിസികളും. സേവിംഗ്‌സ് അടിസ്‌ഥാനമാക്കിയുള്ള പോളിസിയിൽ ഏതാനും വർഷം കഴിഞ്ഞ് സറണ്ടർ വാല്യു സൗകര്യം ലഭിക്കും. അതായത് രണ്ടുമൂന്ന് വർഷം കഴിഞ്ഞ് പ്രീമിയം അടയ്ക്കുന്നത് ഇടയ്ക്കുവെച്ച് നിർത്തുകയും ചെയ്യാം. ഇതിനിടെ പോളിസിയിലുണ്ടാവുന്ന ക്യാഷ് വാല്യു കസ്‌റ്റമറിന് ലഭിക്കുകയും ചെയ്യും.
മുമ്പ് ടാക്സ് അടയ്ക്കുന്നത് ഒഴിവാക്കാനായിരുന്നു ആളുകൾ കൂടുതലും സേവിംഗ്‌സ് പദ്ധതികളിൽ പണം നിക്ഷേപിച്ചിരുന്നത്. അതോടൊപ്പം നിക്ഷേപത്തിന് പുറമെയായി ലഭിക്കുന്ന റിട്ടേണും അവരെ ആകർഷിച്ചിരുന്നു. ഇൻഷുറൻസ് പോളിസികളിൽ അടയ്ക്കുന്ന പ്രീമിയം നിരക്ക് താരതമ്യേന വളരെ കുറവായിരുന്നതും ഒരു കാരണമാണ്. അതുകൊണ്ട് സാമ്പത്തിക സുരക്ഷിതത്വം നല്കുന്ന ഇത്തരം പോളിസികളോടാണ് പൊതുവെ ആളുകൾക്ക് പ്രിയം.
ഇൻഷുറൻസ്, നിക്ഷേപം എന്നിവയെ വേറിട്ട് കാണണമെന്നാണ് സാമ്പത്തിക വിദഗ്ദ്ധർ പറയുന്നത്. ഇൻഷുറൻസ് കവർ ചെയ്യുന്നതിന് ടേം ഇൻഷുറൻസ് എന്ന ഒപ്ഷനാണ് മികച്ചത്. ഇടത്തരവും സുരക്ഷിതവുമായ ഈ നിക്ഷേപപദ്ധതിയിൽ റിട്ടേൺ വളരെ കുറവായിരിക്കും.
യുലിപ് അഥവാ യൂണിക് ലിക്വിഡ് ഇൻഷുറൻസ് പ്ലാനിൽ പണം നിക്ഷേപിക്കുന്നതും ഇൻഷുറൻസ് പരിരക്ഷ നല്‌കും. ഡിസംബറിനും മാർച്ചിനുമിടയി ലാണ് കൂടുതൽ ആളുകളും ഇതിൽ നിക്ഷേപം നടത്തുന്നത്. നികുതി നിയമത്തിന്‍റെ ആർട്ടിക്കിൾ 80 അനുസരിച്ച് ഇതിൽ നിന്നും ലാഭം ലഭിക്കുകയും ചെയ്യും. യുലിപിൽ നിക്ഷേപം നടത്താൻ താല്‌പര്യമുള്ളവർ ഇൻഷുറൻസ് പരിരക്ഷ നല്കുന്ന സ്ക‌ീമുകൾ തെരഞ്ഞെടുക്കുന്നതാണ് ഉചിതം.
നിക്ഷേപം അനിവാര്യം ആകസ്‌മികമായ ആവശ്യങ്ങൾക്ക്
പണം നീക്കിവെയ്ക്കുന്നതിനും ഫൈനാൻഷ്യൽ പ്ലാനർ പ്രാധാന്യം നല്‌കുന്നുണ്ട്. ഇത്തരം പ്രതികൂല സാഹചര്യങ്ങളെ നേരിടുന്നതിന് വീട്ടമ്മമാർ ധനനിക്ഷേപ പരിപാടികൾക്ക് മുൻതൂക്കം നല്‌കണം. ശമ്പളത്തിൽ നിന്ന് നിശ്ചിത തുക മാറ്റി വെച്ചശേഷം ബാക്കി തുക ഫിക്സഡ് ഡെപ്പോസിറ്റിൽ നിക്ഷേപിക്കാം. മാസം അടയ്ക്കുന്ന ഇൻസ്റ്റോൾമെന്‍റിനൊപ്പം (ഇഎ.ഐ) വീട്ടാവശ്യങ്ങൾക്കും ഒരു തുക നീക്കിവയ്ക്കണം. അടിയന്തിര ഘട്ടങ്ങളിലേക്കുള്ള തുകയുടെ 5 മുതൽ 15 ശതമാനം വരെ പണമായി കയ്യിൽ കരുതാം. ശേഷിക്കുന്നവ റിസ്ക് കുറഞ്ഞ മ്യൂച്ചുവൽ ഫണ്ടുകളിലോ, സേവിംഗ്‌സ് ബാങ്ക് അക്കൗണ്ടിലോ നിക്ഷേപിക്കാവുന്നതാണ്.
ഇത്തരം മുൻകരുതലുകൾ സ്വീകരികാത്തപക്ഷം വിഷമ പരിതസ്‌ഥിതികളെ നേരിടാൻ പണം എവിടെ നിന്ന് കണ്ടെത്തും? വസ്‌തുവും മറ്റും ഈടായിവെച്ച് ലോൺ എടുക്കുക, ബ്ലേഡ് കമ്പനിയിൽ നിന്നും പണം പലിശയ്ക്ക് എടുക്കുക, പേഴ്‌സണൽ ലോൺ എന്നിങ്ങനെ ആപത്ഘട്ടങ്ങളിൽ സഹായമാകുന്ന സാമ്പത്തിക സ്രോതസ്സുകൾ ഉണ്ടെങ്കിലും പലിശനിരക്കിലുണ്ടാവുന്ന വർദ്ധനയും മറ്റും സാധാരണക്കാരൻ സാമ്പത്തിക നിലയെ തകർക്കുകയേയുള്ളൂ.
നികുതി ഒഴിവാക്കൽ
നികുതിയിളവ് ലഭിക്കുന്നതിനുള്ള വിവിധ മാർഗ്ഗങ്ങൾ ബുദ്ധിമതിയായ ഗൃഹനാഥയ്ക്ക് ഉപയോഗപ്പെടുത്താം. കുടുംബം വാടകവീട്ടിലാണ് കഴിയുന്നതെങ്കിൽ ഭർത്താവ് ഉദ്യോഗസ്‌ഥനാണെങ്കിൽ കൂടി ഗൃഹനാഥയ്ക്ക് ഹൗസ് റെന്‍റ് അലവൻസ് ക്ലെയിം ചെയ്യാനാവും. മൊത്തം വരുമാനത്തിന്‍റെ 10 ശതമാനത്തിലുമധികം വാടക നല്‌കുന്നതിന്‍റെ പേരിൽ ടാക്സ് ഇളവ് ലഭിക്കാനായി ക്ലെയിം ചെയ്യാം. അതുമല്ല, കുടുംബത്തോടൊപ്പം സ്വന്തം വീട്ടിലാണ് താമസിക്കുന്നതെങ്കിൽ ഏതെങ്കിലും ബാങ്കിൽ നിന്നുമെടുത്ത ലോണിനുള്ള പലിശനിരക്കിന്മേൽ ടാക്സിളവ് ലഭിക്കാം.
ചാരിറ്റിയായി നല്കുന്ന സംഭാവനയുടെ പേരിലും ടാക്സ് ഇളവ് ലഭിക്കും. ഇത്തരം സംഭവനകൾ ചെക്ക് മുഖേന നല്‌കുക.
എജ്യൂക്കേഷൻ ലോണിനുമേലുള്ള പലിശയും നികുതിവിമുക് തമാണ്. ഇപ്രകാരം മെഡിക്കൽ ഇൻഷുറൻസിലും നികുതിയിളവ് ലഭിക്കും. അത് വളരെ കുറഞ്ഞ തുകയ്ക്ക് ആയിരിക്കുമെന്ന് മാത്രം. മാതാപിതാക്കളുടെ മെഡിക്കൽ ഇൻഷുറൻസ് പ്രീമിയത്തിൽ 15,000 രൂപയിൽ കൂടാതെയുള്ള ഇളവ് ലഭിക്കും. ഗൃഹനാഥയെയോ അവരുടെ ഭർത്താവിനെയോ ആശ്രയിച്ചുകഴിയുന്ന ഏതെങ്കിലും വ്യക്‌തിയുടെ മെഡിക്കൽ ഇൻഷുറൻസ് ചെലവ് ഗൃഹനാഥയുടെ കുടുംബം വഹിക്കുകയാണെങ്കിൽ പ്രസ്‌തുത ഗൃഹനാഥയ്ക്ക് 40,000 രൂപ മുതൽ 75,000 രൂപവരെ നികുതി ഇളവ് ലഭിക്കും.
