ഏതെങ്കിലും ജോലി ചെയ്തു കൊണ്ടിരിക്കുമ്പോൾ നിങ്ങളുടെ മാനസികാവസ്‌ഥ എന്താണ്? നിങ്ങൾക്ക് ബോറടിക്കുമോ? അതോ ഊർജ്ജസ്വലരാകുമോ? നിങ്ങളുടെ പെർഫോർമൻസ് തീർച്ചയായും നിങ്ങളുടെ ശരീരത്തെയും മനസ്സിനെയും ആശ്രയിച്ചിരിക്കുന്നു. ശാരീരികമായി നിങ്ങൾ നുറുശതമാനം ഫിറ്റാണെങ്കിലും മനസ്സ് അസ്വസ്‌ഥമാണെങ്കിലോ. തീർന്നില്ലേ കഥ.
മനസ്സിന് സന്തുഷ്ടി പകരുന്ന നേട്ടങ്ങൾ വ്യക്ത‌ിയിൽ അനുകൂല മാറ്റങ്ങൾ ഉണ്ടാക്കും. ഇത്തരം ആഹ്ളാദകരമായ അവസ്‌ഥകൾ മനസ്സിന് നിർവ്യതിയും ആനന്ദവും പകരുമെങ്കിലും അവ എപ്പോഴും ഉണ്ടായിക്കൊള്ളണമെന്നില്ല. ശരീരവും മനസ്സും ഒരുപോലെ ആരോഗ്യകരമായിരുന്നാലേ ജീവിതം സന്തോഷപ്രദമാകുകയുള്ളു.
പ്രാതൽ അനിവാര്യം
സുന്ദരമായ ഒരു ദിവസം തുടങ്ങുന്നതിന് പ്രാതൽ ഏറ്റവും ആവശ്യമാണ്. എന്നും ശരിയായ രീതിയിൽ പ്രാതൽ കഴിക്കുന്നവർക്ക് ചിന്തിക്കാനുള്ള കഴിവിൽ ആശ്ചര്യജനകമായ മാറ്റമുണ്ടാകുമത്രേ. ശരിയായ പ്രാതൽ കഴിക്കുന്ന കുട്ടികളോ മത്സരാർത്ഥികളോ ഓർമ്മ ശക്തിയുമായി ബന്ധപ്പെട്ട പരീക്ഷണങ്ങളിൽ മികച്ച പ്രകടനം കാഴ്‌ചവെച്ചിട്ടുണ്ട് എന്നാണ് പഠനങ്ങൾ തെളിയിച്ചിട്ടുള്ളത്.
ഏതെങ്കിലും സാഹചര്യത്തിൽ പ്രാതൽ ഒഴിവാക്കുന്ന പക്ഷം കൊഴുപ്പില്ലാത്ത പാലോ, ജ്യൂസോ, ബിസ്‌ക്കറ്റോ, ഡ്രൈഫ്രൂട്ട്സോ കഴിച്ചിരിക്കണം. രക്തത്തിലെ ഗ്ലൂക്കോസ് നിലനിർത്താൻ പ്രാതലിന് കഴിയും. ദിവസം മുഴുവൻ നിങ്ങളെയത് ഊർ‌ജ്ജസ്വലരാക്കും.
ഓർമ്മശക്തിയെ ഉത്തേജിപ്പിക്കാൻ കഫീൻ
ദിവസവും കുറഞ്ഞ അളവിൽ കഫീൻ ചേർന്ന കാപ്പി കുടിക്കുന്നത് ഓർമ്മശക്തിയെ ഉത്തേജിപ്പിക്കും എന്നാണ് ഗവേഷണങ്ങൾ പറയുന്നത്. പക്ഷേ, നിങ്ങൾ തളർന്നിരിക്കുമ്പോൾ മാത്രമാകും ഇങ്ങനെ സംഭവിക്കുക. രാവിലെ അത്ര പ്രയോജനം ചെയ്തെന്ന് വരില്ല. നേരത്തെ മുതലേ ഉത്സാഹവും ഉണർവ്വം അനുഭവിക്കുന്നുണ്ടെങ്കിൽ കാപ്പി കുടിച്ച് ഓർമ്മശക്തിയെ ഉത്തേജിപ്പിക്കാൻ ശ്രമിക്കുന്നത് ഫലത്തിൽ ദോഷം ചെയ്യും.
മസ്‌തിഷ്കത്തിൽ സന്ദേശവാഹകനായി പ്രവർത്തിക്കുന്ന സെറോടിനൻ എന്ന രാസവസ്തു‌വിന് ഓർമ്മശക്തിയെ ഉത്തേജിപ്പിക്കാൻ കഴിവുണ്ട്. ഈ രാസവസ്‌തുവിനെയാണ് കഫീൻ സ്വാധീനിക്കുന്നത്. കാപ്പിയിൽ മാത്രമല്ല കഫീൻ അടങ്ങിയിരിക്കുന്നത്. ചായയിലും കാർബണേറ്റഡ് സോഡയിലും കോഫി ചേർത്ത ഐസ്ക്രീമിലും തൈരിലുമൊക്കെ കഫീൻ അടങ്ങിയിട്ടുണ്ട്. അതുകൊണ്ട് ഇത്തരം ഭക്ഷ്യ വസ്‌തുക്കൾ ഉപയോഗിക്കും മുമ്പ് അവ ഓർമ്മശക്തിയെ എപ്രകാരം സ്വാധീനിക്കും എന്നതിനെക്കുറിച്ച് അവശ്യം അറിഞ്ഞിരിക്കണം.
ഓർമ്മയ്ക്ക്, പഴങ്ങൾ
അയണിന്‍റെ കലവറയാണ് ആപ്പിൾ, മസ്ത‌ിഷ്കത്തെ പ്രവർത്തന നിരതമാക്കുന്നതിന് ആവശ്യമായ എല്ലാ പോഷകങ്ങളും ആപ്പിളിൽ അടങ്ങിയിട്ടുണ്ട്. ഇത് ദിവസവും കഴിക്കുന്നത് ഓർമ്മശക്തി വർദ്ധിപ്പിക്കാൻ സഹായിക്കും. കൂടാതെ മുന്തിരി, അത്തിപ്പഴം, ചെറി, കാറ്റേറ്റ്, ഉരുളക്കിഴങ്ങ്, ഏലയ്ക്ക എന്നിവയിലൂടെയും ശരീരത്തിന് ആവശ്യമായ പോഷകങ്ങൾ ലഭിക്കും.
ഇടയ്ക്കിടെ വെള്ളം കുടിക്കുക
മരവിപ്പോ ക്ഷീണമോ അനുഭവപ്പെടുകയാണെങ്കിൽ ഇടയ്ക്കിടെ ജലപാനമാകാം. കാര്യക്ഷമതയും ഓർമ്മശക്തിയും അത് വർദ്ധിപ്പിക്കും. ക്ഷീണിച്ചിരിക്കുന്ന സമയത്ത് വാഴപ്പഴം, ആപ്പിൾ, ഓറഞ്ച്, സലാഡ്, തൈര്, ജ്യൂസ്, കോൺഫ്ളേക്സ്, ബിസ്കറ്റ് എന്നിവയിൽ ഏതെങ്കിലും കഴിക്കാം. ആരോഗ്യം നിലനിർത്തുന്നതിന് പുറമേ മസ്ത‌ിഷ്കത്തെ ഉണർവുള്ളതാക്കാനും പഴങ്ങൾക്ക് അപാരമായ ശക്‌തിയുണ്ട്. ഇടയ്ക്കിടെ പാനീയങ്ങൾ കഴിക്കുന്നത് ശരീരത്തിനും മനസ്സിനും ഒരുപോലെ ഉണർവ്വേകും.
വ്യായാമം
വ്യായാമമാണ് നമ്മുടെ മസിലുകളെയും എല്ലുകളെയും ബലം ഉള്ളതായി നിലനിർത്തുന്നത്. വ്യായാമം ചെയ്യുന്നതിന് ഇടയിൽ പരിക്ക് പറ്റുമോ, എല്ലിന് ബല ക്ഷയം സംഭവിക്കുമോ, ഹൃദയ സംബന്ധമായ പ്രശ്നങ്ങൾ ഉണ്ടാകുമോ തുടങ്ങി നിരവധി സംശയങ്ങൾ കാരണം പലരും വ്യായാമത്തിൽ നിന്ന് പിന്തിരിയാറുണ്ട്. എന്നാൽ ഇവയിൽ നിന്നെല്ലാം മോചനം നേടുന്നതിനുള്ള ഉത്തമ പരിഹാരമാണ് വ്യായാമം എന്ന കാര്യം എല്ലാവരും മറക്കുന്നു. പല ജീവിതശൈലി രോഗങ്ങളുടെ പിടിയിൽ നിന്ന് രക്ഷപ്പെടുന്നതിനും വ്യായാമം സഹായിക്കുന്നു. ഊർജ്ജസ്വലത നിലനിർത്താൻ അലത വെടിഞ്ഞ് രാവിലെ വ്യായാമം ചെയ്യുന്നത് ദിനചര്യയുടെ ഭാഗമാക്കാവുന്നതാണ്.
