ബ്യൂട്ടി ക്ലിനിക്കിൽ പോകാനോ മുഖമൊന്നു മിനുക്കാനോ സമയം തീരെ കിട്ടുന്നില്ലേ? ഹോം ഫേഷ്യൽ നിങ്ങളുടെ സഹായത്തിനുണ്ട്. സാധാരണയായി അഞ്ചുതരം സ്കിന്നുകളാണുള്ളത്. നോർമൽ, ഓയിലി, ഡ്രൈ, കോമ്പിനേഷൻ, സെൻസിറ്റീവ് എന്നിങ്ങനെ ഓരോരുത്തരുടെയും സ്കിന്നിനിണങ്ങുന്ന ബ്യൂട്ടി പ്രോഡക്ട്‌സ് ഉപയോഗിച്ചുവേണം ഫേഷ്യൽ ചെയ്യേണ്ടത് എന്നുമാത്രം.
ആവശ്യമായ സമയം: 20- 30 മിനിറ്റ്.
ആവശ്യമുള്ള വസ്തുക്കൾ:
- ഇളം ചൂടുവെള്ളം
- സ്കിൻ ക്ലെൻസർ
- എക്സ‌് ഫോളിയേറ്റ് സ്ക്രബ്ബ്
- മാസ്ക്
- മോയ്സ്ചറൈസർ
- കോട്ടൺ തുണി/പഞ്ഞി
- ടവ്വൽ
ഫേഷ്യൽ ചെയ്യുന്നതിനുമുമ്പ് ഫേഷ്യലിനാവശ്യമായ വസ്തുക്കൾ അടുത്തുവയ്ക്കുക. ഫേഷ്യലിനിടയ്ക്ക് ഓരോന്നും അന്വേഷിച്ച് ബുദ്ധിമുട്ടുണ്ടാവാതിരിക്കാനാണ് ഇപ്രകാരം ചെയ്യുന്നത്.
ബേസിക്
ആദ്യം ക്ലെൻസർ ഉപയോഗിച്ച് മുഖം നന്നായി കഴുകി വൃത്തിയാക്കുക. ഓയിലി/ കോമ്പിനേഷൻ സ്‌കിന്നിന് ജെൽ ക്ലെൻസറും ഡ്രൈ സ്‌കിന്നിന് ക്രീം ക്ലെൻസർ/ മിൽക്ക് ക്ലെൻസറും ഉപയോഗിക്കണം. ഇതുകൂടാതെ വീട്ടിൽ തയ്യാറാക്കുന്ന ക്ലെൻസറും ഫേഷ്യലിനായി ഉപയോഗിക്കാം.
തേൻ – ജാതിക്ക ക്ലെൻസർ
ഒരു സ്‌പൂൺ ജാതിക്ക അരച്ചതും. ഒരു സ്‌പൂൺ തേനും ചേർത്ത് പേസ്റ്റ് തയ്യാറാക്കി 20 മിനിറ്റോളം മുഖത്ത് പുരട്ടുക. ഇനി മുഖം നല്ല തണുത്ത വെള്ളത്തിൽ കഴുകുക. ആഴ്‌ചയിൽ രണ്ടുതവണ ഇതാവർത്തിക്കുക. മുഖത്തെ പാടുകൾ മാറും.
സിട്രസ്സ് ബ്ലാക്ക്ഹെഡ് റിമൂവർ
ബ്ലാക്ക് ഹെഡ്‌സ് അകറ്റുന്നതിന് രാത്രി ഉറങ്ങുന്നതിനുമുമ്പ് പകുതി നാരങ്ങയെടുത്ത് മുഖത്ത് നന്നായി റബ്ബ് ചെയ്യുക. നാരങ്ങാനീരും രണ്ടു സ്‌പൂൺ റോസ് വാട്ടറും മുഖത്ത് പുരട്ടി വയ്ക്കുക.
സ്ക്രബ്ബിംഗ്
മുഖം കഴുകിയശേഷം സ്ക്രബ്ബ് വട്ടത്തിൽ വിരലുപയോഗിച്ച് മൃദുവായി മുഖത്ത് റബ്ബ് ചെയ്യണം. മൂക്ക്, മുക്കിന്‍റെ വശങ്ങൾ, നെറ്റി, താടിയുടെ ഭാഗം എന്നിവ വേണം കൂടുതൽ വൃത്തിയാക്കാൻ. ഓയിലി കോമ്പിനേഷൻ സ്‌കിന്നിന് എണ്ണമയം അധികമുള്ള ഭാഗത്ത് റബ്ബ് ചെയ്യുക. 5-10 മിനിറ്റോളം തുടരണം. ഇനി തണുത്ത വെള്ളത്തിൽ മുഖം കഴുകാം.
സ്‌റ്റീം
സ്ക്രബ്ബിംഗിനുശേഷം ചർമ്മത്തിലെ തുറന്ന സുഷിരങ്ങൾ പൂർവ്വസ്‌ഥിതിയിലാകുന്നതിന് ഇളംചൂടുവെള്ളത്തിൽ മുക്കിയ തുണികൊണ്ട് രണ്ടുമൂന്നു തവണ മുഖം ഒപ്പുക.
മാസ്ക്
സ്റ്റീമിംഗിനുശേഷം മാസ്ക് പുരട്ടാം. എണ്ണമയമുള്ള ചർമ്മത്തിന് ക്ലേ മാസ്ക്, വരണ്ട ചർമ്മത്തിന് ഹൈഡ്രേറ്റിംഗ് ജെൽ, ക്രീം മാസ്ക് അനുയോജ്യമായിരിക്കും. കൺതടത്തിനു ചുറ്റും മാസ്ക് പുരട്ടരുത്. മാസ്ക്, കുറച്ചുനേരം മുഖത്തു പുരട്ടി വയ്ക്കുക. ഇനി തണുത്തവെള്ളത്തിൽ മുഖം കഴുകാം.
ഓയിലി സ്കിൻ മാസ്ക്
ക്ലേ മാസ്ക്
- ഒന്നര സ്‌പൂൺ ക്ലേ/ മുൽത്താനി മിട്ടി
- ഒന്നര സ്‌പൂൺ കെയോലിൻ ക്ലേ
- അര സ്‌പൂൺ അലോവേര ജെൽ
- ഒരു സ്‌പൂൺ റോസ് വാട്ടർ
- രണ്ട് തുള്ളി റോസ് എസ്സെൻഷ്യൽ ഓയിൽ
തയ്യാറാക്കുന്ന രീതി: ഇവയെല്ലാം നന്നായി യോജിപ്പിച്ച് നാല് ആഴ്‌ചയോളം ഫ്രിഡ്‌ജിൽ വച്ച് മുഖത്തു പുരട്ടാം.
ബനാന മാസ്ക്
- വാഴപ്പഴം ഒന്ന്
- ഒരു സ്‌പൂൺ തേൻ
- ഒരു ഓറഞ്ച്/ നാരങ്ങ
തയ്യാറാക്കുന്ന രീതി: പഴം നന്നായുടച്ച് തേൻ ചേർത്ത് നന്നായി യോജിപ്പിക്കുക. ഇതിലേയ്ക്ക് നാരങ്ങ/ ഓറഞ്ച് നീര് ചേർ ക്കുക. ഈ മിശ്രിതം 15 മിനിറ്റോളം മുഖത്ത് പുരട്ടി വയ്ക്കണം. ഇനി തണുത്ത വെള്ളത്തിൽ മുഖം കഴുകി ഇളം ചൂടുവെള്ളത്തിൽ മുക്കിയ തുണികൊണ്ട് തുടയ്ക്കാം.
ജ്യൂസ് മാസ്ക്
- ഒരു സ്‌പൂൺ നാരങ്ങാനീര്
- രണ്ട് മുട്ടയുടെ വെള്ള
- മൂന്ന് സ്‌പൂൺ തേൻ
- ഒരു കപ്പ് സ്ട്രോബറി
- നാലുതുള്ളി എസ്സെൻഷ്യൽ ഓയിൽ
തയ്യാറാക്കുന്ന രീതി: ഇവയെല്ലാം നന്നായി യോജിപ്പിച്ച് 10 മിനിറ്റോളം മുഖത്ത് പുരട്ടിവയ്ക്കുക. ഇനി തണുത്ത വെള്ളത്തിൽ കഴുകിക്കളയാം.
കോമ്പിനേഷൻ സ്കിൻ മാസ്ക്
റോസ് ഫേയ്‌സ് മാസ്ക്
- രണ്ട് സ്‌പൂൺ റോസ് വാട്ടർ
- ഒരു സ്‌പൂൺ തൈര്
- ഒരു സ്‌പൂൺ തേൻ
- ആറ് റോസാ ഇതളുകൾ
തയ്യാറാക്കുന്ന രീതി: റോസാ ഇതളുകൾ നന്നായുണക്കി ക്രഷ് ചെയ്ത് റോസ് വാട്ടർ, തേൻ, തൈര് എന്നിവ യോജിപ്പിക്കുക. ഇത് 10 മിനിറ്റോളം മുഖത്ത് പുരട്ടി വച്ചശേഷം കഴുകിക്കളയാം.
വരണ്ട ചർമ്മത്തിന്
അവോകാഡോ മാസ്ക്
- കാൽ കപ്പ് തേൻ
- പകുതി അവോകാഡോ
തയ്യാറാക്കുന്ന രീതി: അവോകാഡോ മഷ് ചെയ്ത് തേനും ചേർത്ത് നന്നായി യോജിപ്പിക്കുക. ഇത് 10 മിനിറ്റോളം മുഖത്ത് പുരട്ടിവച്ചശേഷം കഴുകിക്കളയാം.
മിൽക്ക് മാസ്ക്
- ഒരു സ്‌പൂൺ മിൽക്ക് പൗഡർ
- ഒരു സ്‌പൂൺ തേൻ
- ഒരു സ്‌പൂൺ അവോകാഡോ ജെൽ
- രണ്ടുതുള്ളി എസ്സെൻഷ്യൽ ഓയിൽ
തയ്യാറാക്കുന്ന രീതി: ഇവയെല്ലാം നന്നായി യോജിപ്പിച്ച് 10 മിനിറ്റോളം മുഖത്തു പുരട്ടിയ ശേഷം തണുത്ത വെള്ളത്തിൽ മുഖം കഴുകാം.
ജീവസ്സറ്റ ചർമ്മത്തിന്
ഷുഗർ മാസ്ക്
- രണ്ട് സ്‌പൂൺ പഞ്ചസാര
- മൂന്ന് സ്‌പൂൺ ഇളം ചൂടുവെള്ളം
തയ്യാറാക്കുന്ന രീതി: പഞ്ചസാര വെള്ളത്തിൽ കലക്കി മുഖത്തു പുരട്ടി അധികം അമർത്താതെ മസാജ് ചെയ്യുക. ഇളം ചൂടുവെള്ളത്തിൽ മുഖം കഴുകാം.
സെൻസിറ്റീവ് സൺബേൺ
യോഗെർട്ട് മാസ്ക്
- ഒരു കപ്പ് തൈര്
- അര കപ്പ് ബാർലി മാവ്
തയ്യാറാക്കുന്ന രീതി: ഇവ രണ്ടും നന്നായി യോജിപ്പിച്ച് പത്തുപതിനഞ്ചു മിനിറ്റോളം മുഖത്ത് പുരട്ടിവയ്ക്കുക. പിന്നീട് കഴുകിക്കളയാം.
കുറിപ്പ്: മാവിൽ മുട്ടയുടെ വെള്ള ചേർത്ത് പത്തുപതിനഞ്ചു മിനിറ്റോളം മുഖത്ത് പുരട്ടിവച്ചശേഷം കഴുകിക്കളയാം. നല്ലൊരു മാസ്കാണിത്.
മോയ്സ്‌ചറൈസ്
മുഖത്തെ മാസ്ക് കഴുകിക്കളഞ്ഞ ശേഷം ചർമ്മത്തിനിണങ്ങുന്ന നല്ലൊരു മോയ്സ്ചറൈസർ പുരട്ടുക. ഹോം ഫേഷ്യലിലൂടെ പട്ടുപോലെ മിനുമിനുത്ത സുന്ദര ചർമ്മം നിങ്ങൾക്കും സ്വന്തമാക്കാം…
