മൾട്ടി ടാസ്കിംഗ് എന്നാൽ ഒന്നിലധികം ജോലികൾ ഒരേസമയം കൈകാര്യം ചെയ്യുന്നതിനുള്ള കഴിവ് ആണ്. ആധുനിക ജീവിതത്തിൽ ആവശ്യമായ ഒരു വൈദഗ്ധ്യമായി ഈ കഴിവിനെ വാഴ്ത്തപ്പെടുന്നു. എന്നാൽ വളരെ കാര്യക്ഷമമെന്നു പുറമേക്ക് തോന്നുന്ന ഈ പ്രക്രിയ വ്യക്തിജീവിതത്തിലും ആരോഗ്യത്തിനും അത്രയും ഗുണകരമല്ല എന്നറിയാമോ?
ഒരു കണക്കിന് പറഞ്ഞാൽ
മൾട്ടിടാസ്കിംഗ് ഒരു ഇരുതല മൂർച്ചയുള്ള വാളിന് സമാനമാണ്‌. ഉദാഹരണത്തിന്, ഒരു അമ്മ /അച്ഛൻ കുട്ടിയെ ഗൃഹപാഠത്തിൽ സഹായിക്കുകയും ഒപ്പം ആ ദിവസത്തെ വാർത്തകൾ വായിക്കുകയും കൂടെ ഭക്ഷണം തയ്യാറാക്കുകയും ചെയ്യുന്നു എന്ന് കരുതുക. ഇത് ദൈനംദിന ജീവിതത്തിന്‍റെ തിരക്കിൽ സമയം ലാഭിക്കാൻ സഹായിക്കും. എല്ലാം നടന്നതായി നമുക്ക് തോന്നുകയും ചെയ്യും. മൾട്ടിടാസ്കിംഗ് നിങ്ങളെ കൂടുതൽ കാര്യങ്ങൾ ചെയ്യാൻ അനുവദിക്കുന്നതായി തോന്നിയേക്കാം, എന്നാൽ ഇത് യഥാർത്ഥത്തിൽ ഗ്രഹണശേഷി, ശ്രദ്ധ, മൊത്തത്തിലുള്ള പ്രകടനം എന്നിവ കുറയ്ക്കുന്നതിലൂടെ ഉൽപ്പാദനക്ഷമതയെ തടസ്സപ്പെടുത്തുകയാണ് ചെയ്യുന്നത്.
ടാസ്‌ക്കുകൾക്കിടയിൽ നിരന്തരം ശ്രദ്ധ മാറുന്നത് ഗുണനിലവാരം കുറയ്ക്കുകയും ചെയ്യും. തൽഫലമായി, പ്രിയപ്പെട്ടവർ അവഗണിക്കപ്പെടുകയോ അല്ലെങ്കിൽ അവർക്ക് അർഹമായ ശ്രദ്ധ ലഭിക്കാതെയും വരാം. അങ്ങനെ ബന്ധങ്ങൾ തകരാറിലായേക്കാം. ജീവിതത്തിലെ നല്ല നിമിഷങ്ങൾ, സംഭാഷണങ്ങൾ, ഒരുമിച്ച് പങ്കിടുന്ന അനുഭവങ്ങൾ ഇവയുടെ ഒക്കെ ഗുണ നിലവാരം നഷ്ടപ്പെട്ടേക്കാം.
ഇനി ആരോഗ്യകാര്യത്തിലേക്ക് വന്നാൽ
മൾട്ടിടാസ്കിംഗ്, ആരോഗ്യത്തിന് ഗുണം ചെയ്യില്ലെന്നാണ് ഗവേഷണങ്ങൾ സൂചിപ്പിക്കുന്നത്. കാരണം ഒന്നിലധികം ജോലികൾ ഒരേ സമയം ഫലപ്രദമായി നിർവഹിക്കാൻ ഉള്ള കഴിവ് മനുഷ്യ മസ്തിഷ്കത്തിന് ഇല്ല. മാനസിക ഭാരം തലച്ചോറിന്‍റെ പ്രോസസ്സിംഗ് ശേഷിയെ കവിയുന്നതിനാൽ, സമ്മർദ്ദത്തിന്‍റെ അളവ് വർദ്ധിപ്പിക്കും. രക്താതിസമർദ്ദം, ഹൃദയ സംബന്ധമായ അസുഖങ്ങൾ, ദുർബലമായ രോഗപ്രതിരോധ പ്രവർത്തനം എന്നിവയുൾപ്പെടെ നിരവധി ആരോഗ്യപ്രശ്നങ്ങൾക്കുള്ള റിസ്ക് വർദ്ധിച്ചേക്കാം. ഒപ്പം മെമ്മറിയെ തടസ്സപ്പെടുത്തുകയും ദീർഘകാല മെമ്മറി പ്രശ്നങ്ങൾ സൃഷ്ടിക്കുകയും ചെയ്യുന്നു.
മാത്രമല്ല, ഉറക്കത്തിന്‍റെ ഗുണനിലവാരം കുറയുന്നു. പല കാര്യങ്ങൾ ചെയ്യുന്നതിനാൽ ഇപ്പോഴും ജാഗ്രതയോടെ ഇരിക്കാനും തലച്ചോർ ശ്രമിക്കുന്നു. അങ്ങനെ നിരന്തരമായ ഉത്തേജനത്തിന് ശീലിച്ച തലച്ചോറിനും മനസിനും വിശ്രമിക്കാനും ഉറങ്ങാനും കഴിയാതെ വെല്ലുവിളിയായേക്കാം. കാലക്രമേണ, ഉറക്കക്കുറവ് കുമിഞ്ഞുകൂടാം, ഇത് ബുദ്ധിശക്തി കുറയുന്നതിനും മാനസിക അസ്വസ്ഥതകൾക്കും സമ്മർദ്ദം കൂടുതൽ വഷളാക്കുന്നതിനും ഇടയാക്കും. ഇത് നെഗറ്റീവ് വികാരങ്ങളിലേക്കും ഉത്കണ്ഠയിലേക്കും നയിച്ചേക്കാം.
അതേ സമയം മൾട്ടിടാസ്കിംഗിന്‍റെ പോരായ്മകൾ മനസിലാക്കി അതിന്‍റെ നേട്ടങ്ങൾ പ്രയോജനപ്പെടുത്താൻ അറിയുന്നവർക്ക് അതൊരു നല്ല കാര്യം ആണ് താനും. എപ്പോൾ മൾട്ടിടാസ്‌ക് ചെയ്യണമെന്നും ഒരു ടാസ്‌ക്കിലേക്കോ പ്രിയപ്പെട്ടവരിലേക്കോ ശ്രദ്ധ എപ്പോൾ നൽകണമെന്നും തിരിച്ചറിയുന്നത് ഇതിൽ ഉൾപ്പെടുന്നു.
മൾട്ടിടാസ്കിംഗ് മികച്ച വൈദഗ്‌ധ്യമാകുമെങ്കിലും, അതിനെ ശ്രദ്ധയോടെയും സദുദ്ദേശ്യത്തോടെയും സമീപിക്കേണ്ടത് പ്രധാനമാണ്. അങ്ങനെ ചെയ്യുന്നതിലൂടെ, വ്യക്തിജീവിതത്തിലെ സങ്കീർണതകൾ ഒഴിവാക്കി കെണികളിൽ വീഴാതെ ആരോഗ്യം നിലനിർത്താനും കഴിയും.
ചുരുക്കത്തിൽ, മൾട്ടിടാസ്കിംഗ് കൂടുതൽ കാര്യങ്ങൾ ചെയ്യാനുള്ള ഒരു നല്ല മാർഗമായി തോന്നുമെങ്കിലും, അത് യഥാർത്ഥത്തിൽ വിപരീത ഫലമുണ്ടാക്കുകയും മാനസികാരോഗ്യത്തെ പ്രതികൂലമായി ബാധിക്കുകയും ചെയ്യും. ഒരു സമയം ഒരു ജോലിയിൽ ശ്രദ്ധ കേന്ദ്രീകരിക്കുന്നത്, അതായത് മോണോടാസ്കിംഗ് ഉൽപ്പാദനക്ഷമതയ്ക്കും ആരോഗ്യത്തിനും മികച്ചതായി പൊതുവെ കണക്കാക്കപ്പെടുന്നു. ചില സമയങ്ങളിൽ സിംഗിൾ ടാസ്കിംഗ് സ്വീകരിക്കുന്നത്, കൂടുതൽ സന്തുലിതവും സംതൃപ്തവുമായ ജീവിതത്തിലേക്കുള്ള പാത വാഗ്ദാനം ചെയ്യുന്നു.
ആദ്യം സൂചിപ്പിച്ച പോലെ രണ്ടിനും ഒരു ബാലൻസ് കണ്ടെത്തുകയും മൾട്ടിടാസ്‌ക്കിംഗിന്‍റെ പോരായ്മകളെക്കുറിച്ച് ശ്രദ്ധാലുവായിരിക്കുകയും ചെയ്യേണ്ടത് പ്രധാനമാണ്.
പുരുഷന്മാരെക്കാൾ മികച്ച പ്രകടനം സ്ത്രീകളുടേത്
മൾട്ടിടാസ്കിംഗ് ചെയ്യുമ്പോൾ സ്ത്രീകൾ പുരുഷന്മാരെക്കാൾ മികച്ച പ്രകടനം കാഴ്ചവയ്ക്കുന്നു എന്നാണ് കാണുന്നത്. മൾട്ടിടാസ്‌ക്കിംഗിലെ ലിംഗ വ്യത്യാസങ്ങളെക്കുറിച്ചുള്ള പഠനങ്ങൾ അത്രയും കാര്യമായി നടന്നിട്ടില്ല.
ചില മൾട്ടിടാസ്കിംഗ് സാഹചര്യങ്ങളിൽ സ്ത്രീകൾക്ക് ഒരു നേട്ടമുണ്ടാകാം, എന്നാൽ വ്യക്തിഗത വ്യത്യാസങ്ങൾ സംഭവിക്കാം. ആരോഗ്യത്തിലും ഉൽപ്പാദനക്ഷമതയിലും ഇതെങ്ങനെ ആണ് എന്നറിയാൻ ഇനിയും കൂടുതൽ അന്വേഷണം ആവശ്യമാണ്.
നമ്മൾ “മൾട്ടിടാസ്കിംഗ്” എന്നതിനെക്കുറിച്ച് സംസാരിക്കുമ്പോൾ, അതിനെ “ടാസ്ക്- സ്വിച്ചിംഗ്” എന്ന് പരാമർശിക്കുന്നത് കൂടുതൽ നന്നായിരിക്കും. നേരത്തെ പറഞ്ഞത് പോലെ, മസ്തിഷ്കം ഒരേസമയം ഒന്നിലധികം ജോലികൾ ചെയ്യുന്നില്ല; പകരം, അത് ഒരു ജോലിയിൽ നിന്ന് മറ്റൊന്നിലേക്ക് ശ്രദ്ധ വേഗത്തിൽ മാറ്റുന്നു.
മോസ്കോയിലെ സ്കൂൾ ഓഫ് ഇക്കണോമിക്സിലെ (എച്ച്എസ്ഇ) ഗവേഷകർ നടത്തിയ ഒരു പഠനം ശ്രദ്ധേയമാണ്. ടാസ്ക് പെട്ടെന്ന് മാറുമ്പോൾ ഉണ്ടാകുന്ന പ്രകടനത്തിലെ ലിംഗ വ്യത്യാസങ്ങൾ ആണ് ഇവിടെ പഠന വിഷയം ആയത്. ഫംഗ്ഷണൽ മാഗ്നറ്റിക് റെസൊണൻസ് ഇമേജിംഗ് (എഫ്എംആർഐ) മെഷീനിൽ ഒരു ടാസ്ക് സ്വിച്ചിംഗ് ടെസ്റ്റ് നടത്തിയാണ് പരീക്ഷിച്ചത്.
ജോലികൾക്കിടയിൽ പല കാര്യം മാറുന്നത് പുരുഷന്മാർക്ക് കൂടുതൽ ബുദ്ധിമുട്ടാണെന്ന് പഠനം കണ്ടെത്തി. ലിംഗഭേദമോ പ്രായമോ പരിഗണിക്കാതെ, ടാസ്ക് സ്വിച്ചിംഗ് പ്രത്യേക മസ്തിഷ്ക മേഖലകളെ സജീവമാക്കുന്നുണ്ട്. പുരുഷ മസ്തിഷ്കം ടാസ്ക്- സ്വിച്ചിംഗ് ടെസ്റ്റുകൾ നടത്തുമ്പോൾ കൂടുതൽ ഉപയോഗിക്കുന്നതായി കണ്ടെത്തുകയും ചെയ്തു. അതേസമയം നാഷണൽ റിസർച്ച് യൂണിവേഴ്സിറ്റി സ്കൂൾ ഓഫ് ഇക്കണോമിക്സ് ന്യൂറോലിംഗ്വിസ്റ്റിക് ലബോറട്ടറി നടത്തിയ ഒരു പഠനത്തിൽ, പല കാര്യങ്ങൾ ഒരേ സമയം ചെയ്യാൻ സ്ത്രീകൾക്ക് പുരുഷന്മാരേക്കാൾ എളുപ്പമാണെന്ന് കണ്ടെത്തി. മൾട്ടിടാസ്കിംഗ് ചെയ്യുമ്പോൾ അവരുടെ തലച്ചോറിന് അധിക വിഭവങ്ങൾ സമാഹരിക്കേണ്ട ആവശ്യമില്ല.
പല ജോലികൾക്ക് ഇടയിൽ ഇൻകമിംഗ് ഇമെയിലുകൾ, ഫോൺ കോളുകൾ, അസൈൻമെന്‍റുകൾ, മീറ്റിംഗുകൾ എന്നിവ കൈകാര്യം ചെയ്യുന്നതിൽ സ്ത്രീകൾ മികവ് കാട്ടുന്നു. എന്നിരുന്നാലും, മൾട്ടിടാസ്കിംഗ് സമയത്ത് വേഗത്തിൽ പ്രവർത്തിക്കാൻ ശ്രമിക്കുന്നതിനാൽ സ്ത്രീകളും പുരുഷന്മാരും കൂടുതൽ തെറ്റുകൾ വരുത്തുകയും ചെയ്യുന്നുണ്ട്. കൃത്യമായ ഉത്തരം ഇല്ലെങ്കിലും, ലിംഗഭേദമില്ലാതെ, വ്യക്തികൾക്കിടയിൽ ടാസ്ക് സ്വിച്ചിംഗ് കഴിവുകൾ വ്യത്യാസപ്പെടാമെന്ന് വ്യക്തമാണ്.
ഓരോ വ്യക്തിയുടെയും മൾട്ടിടാസ്കിംഗ് കഴിവുകൾ വിവിധ ഘടകങ്ങളെ ആശ്രയിച്ചിരിക്കുന്നുവെന്ന് തിരിച്ചറിയേണ്ടത് അത്യാവശ്യമാണ്. മൾട്ടിടാസ്കിംഗ് എങ്ങനെ കൈകാര്യം ചെയ്യുന്നു എന്നതിനെയും ജോലിയുടെ സ്വഭാവത്തെയും ആശ്രയിച്ച്, കരിയർ വളർച്ചയിൽ പോസിറ്റീവും പ്രതികൂലവുമായ സ്വാധീനം ചെലുത്തും.
പരിഗണിക്കേണ്ട ചില പോയിന്‍റുകൾ ഇതാ:
കരിയർ വളർച്ചയ്ക്ക് മൾട്ടിടാസ്കിംഗിന്‍റെ പോസിറ്റീവ് വശങ്ങൾ:
ഉൽപ്പാദനക്ഷമത: ഫലപ്രദമായി ചെയ്യുകയാണെങ്കിൽ, മൾട്ടിടാസ്കിംഗ് ഉൽപ്പാദനക്ഷമത വർദ്ധിപ്പിക്കുന്നതിന് ഇടയാക്കും, കുറഞ്ഞ കാലയളവിനുള്ളിൽ കൂടുതൽ ജോലികൾ ചെയ്യാൻ നിങ്ങളെ അനുവദിക്കുന്നു.
നൈപുണ്യ വികസനം: ഒന്നിലധികം ജോലികൾ കൈകാര്യം ചെയ്യുന്നത് ഏത് കരിയറിലെയും മൂല്യവത്തായ ഓർഗനൈസേഷണൽ, ടൈം-മാനേജ്‌മെന്‍റ് കഴിവുകൾ വികസിപ്പിക്കാൻ സഹായിക്കും.
പൊരുത്തപ്പെടുത്തൽ: ഒന്നിലധികം ഉത്തരവാദിത്തങ്ങൾ കൈകാര്യം ചെയ്യാൻ കഴിയുന്നവരെയാണ് തൊഴിലുടമകൾ പലപ്പോഴും അന്വേഷിക്കുന്നത്.
കരിയർ വളർച്ചയ്ക്ക് മൾട്ടിടാസ്കിംഗിന്‍റെ നെഗറ്റീവ് വശങ്ങൾ:
ജോലിയുടെ ഗുണനിലവാരം: മൾട്ടിടാസ്കിംഗ് ചിലപ്പോൾ ജോലിയുടെ ഗുണനിലവാരം കുറയാൻ ഇടയാക്കും, കാരണം ശ്രദ്ധ വിഭജിക്കുന്നത് കൂടുതൽ പിശകുകളിലേക്കോ കുറവുകളിലേക്കോ നയിച്ചേക്കാം.
സ്ട്രെസ്: ഇത് സ്ട്രെസ് ലെവലുകൾ വർദ്ധിപ്പിക്കും, ഇത് മൊത്തത്തിലുള്ള ജോലി പ്രകടനത്തെയും സംതൃപ്തിയെയും പ്രതികൂലമായി ബാധിച്ചേക്കാം. മതിയായ ഇടവേളകളില്ലാതെ തുടർച്ചയായി മൾട്ടിടാസ്കിംഗ് ചെയ്യുന്നത് നല്ലതല്ല ഇത് കരിയർ വളർച്ചയ്ക്ക് ഹാനികരമാണ്.
മൾട്ടിടാസ്കിംഗ് എങ്ങനെ ബാലൻസ് ചെയ്യാം
മൈൻഡ്‌ഫുൾ മൾട്ടിടാസ്കിംഗ്: എപ്പോൾ മൾട്ടിടാസ്‌ക് ചെയ്യണമെന്ന് തിരഞ്ഞെടുക്കുകയും ജോലിയുടെ ഗുണനിലവാരത്തിൽ വിട്ടുവീഴ്‌ച ചെയ്യുന്നില്ലെന്ന് ഉറപ്പാക്കുകയും ചെയ്യുന്നത് നിർണായകമാണ്.
മുൻഗണന: ടാസ്‌ക്കുകൾക്ക് മുൻഗണന നൽകുന്നതും ഏറ്റവും നിർണായകമായവയിൽ ശ്രദ്ധ കേന്ദ്രീകരിക്കുന്നതും മൾട്ടിടാസ്കിംഗ് കൂടുതൽ ഫലപ്രദമായി കൈകാര്യം ചെയ്യാൻ സഹായിക്കും.
പ്രൊഫഷണൽ ഡെവലപ്‌മെന്‍റ്: എങ്ങനെ മൾട്ടിടാസ്‌ക് ഫലപ്രദമായി നടത്താം എന്നതിനെക്കുറിച്ച് തൊഴിലുടമകൾ പരിശീലനം നൽകണം. ഇത് കരിയർ പുരോഗതിക്ക് പ്രയോജനകരമാകും.
മൾട്ടിടാസ്കിംഗ് കരിയർ വളർച്ചയ്ക്ക് സംഭാവന നൽകുന്ന ഒരു വൈദഗ്ദ്ധ്യം ആയിരിക്കുമെങ്കിലും, അതിനെ ശ്രദ്ധാപൂർവം സമീപിക്കുകയും അത് കരിയർ പാതയെ പ്രതികൂലമായി ബാധിക്കുന്നില്ലെന്ന് ഉറപ്പാക്കുകയും ചെയ്യേണ്ടത് അത്യാവശ്യമാണ്.
