മഞ്ഞുമ്മൽ ബോയ്സ് എന്ന സിനിമ ഇറങ്ങിയ ശേഷം കൊടൈക്കനാലിൽ യാത്ര പോകാൻ ചെറുപ്പക്കാർക്ക് പ്രത്യേക ഹരം ആണെന്ന് തോന്നുന്നു… ഏതായാലും ചൂട് അസഹ്യമായപ്പോൾ കേരളത്തിൽ നിന്ന് കൊടൈക്കനാലിലേക്ക് വെച്ച് പിടിക്കുന്നവരുടെ എണ്ണം കൂടിയിട്ടുണ്ട് എന്നത് സത്യം. ഒപ്പം സിനിമയിൽ പറയുന്ന ഡെവിൾസ് കിച്ചൻ അഥവാ ചെകുത്താന്‍റെ അടുക്കള എന്ന് അറിയപ്പെടുന്ന ഗുണ കേവ്സ് നേരിട്ടു കാണാൻ ഉള്ള സാഹസം. സന്ദർശകരെ ആകർഷിക്കുന്നതിനായി ഗുഹയിലേക്കുള്ള റോഡ് പൊതുജനങ്ങൾക്കായി തുറന്നിട്ടുണ്ട്, എന്നാൽ സഞ്ചാരികളുടെ സുരക്ഷയ്ക്കായി ഗുഹയ്ക്കുള്ളിലെ പ്രവേശനം ഇപ്പോഴും അടച്ചിട്ടിരിക്കുകയാണ്. എന്നാൽ പുറത്ത് നിന്ന് കാണാനും പ്രകൃതി ഭംഗി ആസ്വദിക്കാനും കഴിയും.
കൊടൈക്കനാലിലെ മനോഹരമായ ഹിൽസ്റ്റേഷനിൽ സ്ഥിതി ചെയ്യുന്ന പ്രകൃതിദത്തമായ ഒരു അത്ഭുതമാണ് ഗുണ കേവ്സ്. ഈ ഗുഹകൾ നിഗൂഢമായ ഒരു ആകർഷണം ഉൾക്കൊള്ളുന്നു, ഇടതൂർന്ന വനങ്ങളാലും പച്ചപ്പ് നിറഞ്ഞ കുന്നുകളാലും ചുറ്റപ്പെട്ടിരിക്കുന്നു. എന്നാൽ ഇതിനകത്ത് ഒളിഞ്ഞിരിക്കുന്ന സങ്കീർണ്ണമായ പാറ കൂട്ടങ്ങളും അഗാധ ഗർത്തങ്ങളും ആരിലും ഭയം ജനിപ്പിക്കും.
ഈ ഗുഹകൾക്ക് “ഡെവിൾസ് കിച്ചൻ” എന്ന പേര് ലഭിച്ചത് മഹാഭാരത കാലഘട്ടത്തിൽ പാണ്ഡവർ ഈ ഗുഹകൾ അവരുടെ വനവാസ കാലത്ത് പാചകം ചെയ്യാൻ ഈ ഗുഹകൾ ഉപയോഗിച്ചിരുന്നു എന്ന കഥയിൽ നിന്നാണ്. കൊടൈക്കനാലിലെ നിബിഡവനങ്ങളിൽ പാണ്ഡവർ അഭയം തേടി. തങ്ങളുടെ ഭക്ഷണം തയ്യാറാക്കാനുള്ള രഹസ്യ അടുക്കളയായി ഗുണ ഗുഹകൾ ഉപയോഗിച്ചിരുന്നതായി പറയപ്പെടുന്നു. ഈ പുരാണ ബന്ധത്തിൽ നിന്നാണ് “ഡെവിൾസ് കിച്ചൻ” എന്ന പേര് ഉരുത്തിരിഞ്ഞത്. ഗുഹകളുടെ നിഗൂഢമായ സ്വഭാവവും മറഞ്ഞിരിക്കുന്ന ഭാഗങ്ങളും ആ ഗുഹയിൽ ചാത്തന്മാർ ഉണ്ട് എന്ന അന്ധ വിശ്വാസത്തിലേക്ക് എത്തിക്കുകയും ചെയ്തു .
അത് പോലെ മറ്റൊരു ഐതിഹ്യത്തിലും ഗുഹകളിൽ ചെന്ന് മടങ്ങിവരാത്ത യോദ്ധാക്കളെ കുറിച്ച് പറയുന്നുണ്ട്. ഈ ധീരരായ വ്യക്തികൾ ഒരു തുമ്പും അവശേഷിപ്പിക്കാതെ അപ്രത്യക്ഷരായി എന്നാണ് പറയപ്പെടുന്നത്.
ഗുണ ഗുഹകളെക്കുറിച്ചുള്ള രസകരമായ ചില വിശദാംശങ്ങൾ ഇതാ:
2,230 മീറ്റർ ഉയരത്തിൽ സ്ഥിതി ചെയ്യുന്ന ഗുണ ഗുഹകൾ ചരിത്രത്തിനും അവയുടെ വിസ്മയത്തിനും പേരുകേട്ടതാണ്. ഈ ഗുഹ 1821-ൽ ആദ്യമായി കണ്ടെത്തി രേഖപ്പെടുത്തിയത് ബ്രിട്ടീഷ് ഓഫീസർ ബി.എസ്. വാർഡ് ആണ്. അദ്ദേഹമാണ് അതിനെ ഡെവിൾസ് കിച്ചൻ എന്ന് നാമകരണം ചെയ്തത്. ഗുഹയിൽ നിറയെ വാവലുകൾ ഉള്ളതിനാൽ ആണ് വാർഡ് ഈ പേര് നൽകിയത്. എന്നാൽ, 1980-കളുടെ അവസാനം വരെ ഇത് താരതമ്യേന അജ്ഞാതമായ സ്ഥലം ആയിരുന്നു.
1991-ൽ കമൽഹാസൻ അഭിനയിച്ച “ഗുണ” എന്ന സിനിമ ഇറങ്ങിയ ശേഷമാണ് ഈ ഗുഹകൾക്ക് പ്രാധാന്യം ലഭിച്ചത്. ചിത്രത്തിലെ ഹിറ്റ് ഗാനമായ ‘കൺമണി അൻബോടു കാതലൻ’ ഈ ഗുഹയിൽ ആണ് ചിത്രീകരിച്ചത്. അന്നുമുതൽ ഗുഹകൾക്ക് ഗുണ കേവ്സ് എന്ന പേര് ലഭിച്ചു. അതിനുശേഷം, അങ്ങോട്ട് സാഹസപ്രിയരായ വിനോദസഞ്ചാരികളുടെ വരവ് തുടങ്ങി.
എന്നാൽ അതിന് ശേഷം സംഭവിച്ച നിഗൂഢമായ തിരോധാനങ്ങൾ നിമിത്തം ഗുഹകൾ കുപ്രസിദ്ധമായി, ഗുഹ കാണാൻ പോയ നിരവധി ആളുകൾ അതിനുള്ളിൽ അപ്രത്യക്ഷരായി. ഗുഹയുടെ ആഴവും ക്രമരഹിതമായ ഘടനയും കാരണം മൃതദേഹങ്ങൾ പോലും പുറത്തെടുക്കാൻ അധികൃതർക്ക് കഴിഞ്ഞില്ല. ലോകത്തിലെ ഏറ്റവും അപകടകരമായ ഗുഹകളിൽ ഒന്നായി ഇത് കണക്കാക്കപ്പെടുന്നു. 2016 ലെ കണക്കനുസരിച്ച്, മൃതദേഹങ്ങൾ ലഭിക്കാത്തതിനാൽ 16 തിരോധാനങ്ങൾ രേഖപ്പെടുത്തിയിട്ടുണ്ട്.
2000-കളുടെ തുടക്കം മുതൽ 2016 വരെ, കാണാതാകുന്നവരുടെ എണ്ണം വർദ്ധിച്ചതിനാൽ ഗുഹ അടച്ചിരുന്നു. എന്നിരുന്നാലും, ആളുകൾ മുന്നറിയിപ്പ് അവഗണിച്ച് ഗുഹയ്ക്കുള്ളിൽ കയറുന്നത് തുടർന്നു.
2024-ൽ പുറത്തിറങ്ങിയ “മഞ്ഞുമ്മൽ ബോയ്സ്” എന്ന സിനിമയിൽ പറയുന്നത് പോലെ ഗുണ കേവ്സിന്‍റെ ആഴങ്ങളിൽ നിന്ന് ഇതുവരെ ഒരാൾ മാത്രമേ രക്ഷപ്പെട്ടിട്ടുള്ളൂ. എറണാകുളത്തെ മഞ്ഞുമ്മൽ എന്ന ഗ്രാമത്തിൽ നിന്ന് ഒരു ക്ലബിലെ 9 അംഗങ്ങൾ 2006 ൽ ഗുണ കേവ്സിലേക്ക് നടത്തിയ യാത്രയും തുടർന്ന് അതിലെ സുഭാഷ് എന്ന വ്യക്തി ഗുഹയിലെ അഗാധ ഗർത്തത്തിൽ കുടുങ്ങിയതും, കൂടെ ഉള്ളവർ വളരെ ശ്രമപ്പെട്ട ശേഷം ആളെ ജീവനോടെ പുറത്തെടുക്കുകയും ചെയ്തു. ഈ സംഭവമാണ് ചിത്രത്തിന്‍റെ കഥ.
യഥാർത്ഥത്തിൽ ഗുണ കേവ്സ് ഒരു പരമ്പരാഗത “ടൂറിസ്റ്റ് സ്പോട്ട്” അല്ല എന്നാൽ, അത് തീർച്ചയായും കൗതുകകരവും നിഗൂഢവുമായ ഒരു ലക്ഷ്യസ്ഥാനമായി ഇന്ന് മാറിയിരിക്കുന്നു, സാഹസികത തേടുന്നവരെ ആകർഷിക്കുന്ന ഇടമാണ് ഇപ്പോഴും ഗുണ കേവ്സ്… ദിണ്ഡിഗൽ ജില്ലയിൽ മൊയർ പോയിന്‍റ് റോഡിൽ സ്ഥിതി ചെയ്യുന്ന ഈ ഗുഹകൾ കൊടൈക്കനാലിൽ നിന്ന് 10 കിലോമീറ്റർ അകലെയാണ്. പൈൻ വനങ്ങളിലൂടെ നടന്നാണ് ഗുഹകളിൽ എത്തുന്നത്. ഇപ്പോൾ സുരക്ഷാ കാരണങ്ങളാൽ സുരക്ഷിതമായ അകലത്തിൽ നിന്ന് ഗുഹകൾ കാണാൻ കഴിയും. ഷോള മരങ്ങളും പുല്ലും നിറഞ്ഞ പ്രദേശത്താണ് ഗുഹകൾ. ഈ മരങ്ങളുടെ വേരുകൾ പ്രദേശത്തുടനീളം വ്യാപിച്ചുകിടക്കുന്നു,
ബാരിക്കേഡുകളും ഇരുമ്പ് കമ്പികളും കൊണ്ട് ഗ്രിൽ ചെയ്ത ആഴത്തിലുള്ള ഇടുങ്ങിയ ഗുഹകൾ കാണാം. 400 അടി ഉയരമുള്ള പ്രകൃതി ദത്തമായ കരിങ്കൽ പാറക്കൂട്ടങ്ങൾ ഉൾപ്പെട്ട പില്ലർ റോക്കിൽ നിന്ന് കൊടൈക്കനാലിന്‍റെ ശാന്തമായ സൗന്ദര്യം ആസ്വദിക്കാം. ഈ മൂന്ന് പാറകളും തോളോട് തോൾ ചേർന്ന് നിൽക്കുന്നു. രണ്ട് പാറകൾക്കിടയിലുള്ള വിടവിനെ ആണ് ‘ഡെവിൾസ് കിച്ചൻ’ എന്ന് വിളിക്കുന്നത്.
ട്രെക്കിംഗിനു വഴികാട്ടാൻ വഴികാട്ടികളുണ്ടാകും. പാറക്കെട്ടുകൾക്ക് സമീപം വെള്ളച്ചാട്ടങ്ങളുമുണ്ട്. സമൃദ്ധമായ പച്ചപ്പും പാറക്കൂട്ടങ്ങളുടെ അടിത്തട്ടിൽ വൈവിധ്യമാർന്ന പൂക്കളുള്ള പൂന്തോട്ടവും കുടുംബങ്ങൾക്ക് അനുയോജ്യമായ ഒരു പിക്നിക് സ്ഥലമാക്കുന്നു. അടുത്തുള്ള കടകളിൽ നിന്ന് ചായയും ലഘുഭക്ഷണവും ആസ്വദിക്കാം. പില്ലർ റോക്‌സിന്‍റെ മനോഹരമായ കൊടുമുടിയിലേക്ക് ഗ്രൂപ്പ് ഹൈക്കിംഗ് യാത്രയും നടത്താൻ പറ്റും.
പില്ലർ റോക്കിസിലേക്കുള്ള പ്രവേശന സമയം ഞായറാഴ്ചകൾ ഉൾപ്പെടെ രാവിലെ 9നും വൈകുന്നേരം 4നും ഇടയിലാണ്. ഒരാൾക്ക് 5 രൂപയാണ് ഫീസ്, സ്റ്റിൽ ക്യാമറ ഷൂട്ടിന് 20 രൂപ നൽകണം. കുട്ടികളെ കൂടെ കൊണ്ടുപോകുകയാണെങ്കിൽ, പാറകളുടെ അരികിൽ നിന്ന് അവരെ അകറ്റി നിർത്താൻ ശ്രദ്ധിക്കുക.
ഗുണ ഗുഹകൾ സന്ദർശിക്കുമ്പോൾ, സുരക്ഷയ്ക്ക് മുൻഗണന നൽകേണ്ടത് അത്യാവശ്യമാണ്. മനസ്സിൽ സൂക്ഷിക്കേണ്ട ചില മുൻകരുതലുകൾ ഇതാ:
- ഭൂപ്രദേശത്തെക്കുറിച്ചും അപകടസാധ്യതകളെക്കുറിച്ചും പരിചിതമായ അറിവുള്ള ഒരു ഗൈഡിനൊപ്പം മാത്രമേ പ്രവേശിക്കാവു.
- പാറ പ്രതലങ്ങൾക്ക് അനുയോജ്യമായ ദൃഢമായ, സ്ലിപ്പ് അല്ലാത്ത പാദരക്ഷകൾ ധരിക്കുക.
- ചലനം തടസപ്പെടുതാത്ത സുഖപ്രദമായ വസ്ത്രം ധരിക്കുക.
- ഇരുണ്ട ഭാഗങ്ങളിൽ എത്തുമ്പോൾ ഒരു ഫ്ലാഷ്‌ലൈറ്റോ ഹെഡ്‌ലാമ്പോ കരുതുക.
- ഫോണിന്‍റെ ഫ്ലാഷ്‌ലൈറ്റിനെ മാത്രം ആശ്രയിക്കുന്നത് ഒഴിവാക്കുക.
- ജലാംശം നിലനിർത്താൻ ആവശ്യത്തിന് വെള്ളം കരുതുക.
- ഇടുങ്ങിയ ഭാഗങ്ങളിലൂടെ കയറുന്നതും ഇഴയുന്നതും ഒക്കെ ആരോഗ്യമുള്ളവർക്ക് മാത്രമേ സാധിക്കു. ഈ ഗുഹകൾ വഴുക്കൽ ഉള്ളതും വെല്ലുവിളി നിറഞ്ഞതുമായിരിക്കും.
- തനിച്ചുള്ള യാത്ര ഒഴിവാക്കുക. ഒരു ഗ്രൂപ്പായി എക്സ്പ്ലോർ ചെയ്യുക. വഴിതെറ്റി പോകാനുള്ള സാധ്യതയുള്ളതിനാൽ സോളോ ട്രാവൽ നിരുത്സാഹപ്പെടുത്തിയിരിക്കുന്നു.
- സുരക്ഷാ കാരണങ്ങളാൽ ചില പ്രദേശങ്ങളിൽ നിയന്ത്രണം ഏർപ്പെടുത്തിയിട്ടുണ്ടാകും. അതിനെ മറികടക്കാൻ ശ്രമിക്കരുത്.
- ഫോണിൽ ലോക്കൽ എമർജൻസി നമ്പറുകൾ സേവ് ചെയ്യുക.
- സന്ദർശനത്തെക്കുറിച്ചും പ്രതീക്ഷിക്കുന്ന മടക്ക യാത്ര സമയത്തെക്കുറിച്ചും പുറത്ത് ആരെയെങ്കിലും അറിയിക്കുക.
