ബോളിവുഡ് താരം സുശാന്ത് സിംഗിന്‍റെ ആത്മഹത്യക്ക് ശേഷം കാമുകി റിയ ചക്രവർത്തിയുടെ ജീവിതം ദുരിതമയമാണ്. ആത്മഹത്യാകേസിൽ റിയയുടെ പേര് വലിച്ചിഴക്കപ്പെട്ടതോടെ അവരുടെ ജീവിതം കടുത്ത വെല്ലുവിളികൾ നിറഞ്ഞതായി. കേസ് കോടതിയിൽ ആണെങ്കിലും റിയ കുറ്റക്കാരി ആണെന്ന മട്ടിലാണ് ഭൂരിഭാഗവും പ്രതികരിക്കുന്നത്. ഇതിനിടെ മയക്കു മരുന്ന് കേസിൽ ഒരു മാസം ജയിൽ വാസവും അനുഭവിച്ചു. എന്നാൽ താൻ തോറ്റു കൊടുക്കാൻ തയ്യാറല്ലെന്ന് റിയ പറയാതെ പറയുകയാണ്. സോഷ്യൽ മീഡിയയിൽ അവർ പോസ്റ്റ്‌ ചെയുന്ന ചിത്രങ്ങൾ പലതും അതാണ് വെളിപ്പെടുത്തുന്നത്.
ഒഴിവു സമയങ്ങൾ പുസ്തകം വായിച്ചും യോഗ പരിശീലിച്ചും മനസിനെ ശക്തിപ്പെടുത്തുകയാണ് റിയ. ഇതേ കുറിച്ച് അവർ ഒരു ചിത്രം ഇൻസ്റ്റയിൽ പങ്ക് വെച്ചു. കുറച്ചു ദിവസം മുൻപ് നെവർ ഗിവ് അപ്പ് എന്നെഴുതിയ ക്യാപ് ധരിച്ച ചിത്രവും ഇവർ പങ്കു വെയ്ക്കുകയുണ്ടായി. അമിതാബ് ബച്ചനൊപ്പം ചെഹരേ എന്ന ചിത്രത്തിലൂടെ റിയ മടങ്ങിവരവിന് തയ്യാറാകുകയാണ്.
തികച്ചും കഠിനമായ വർഷം ആയിരുന്നു റിയക്ക് 2020. അതിനു ശേഷം റിയ ഈ വർഷം മാർച്ച് മുതൽ ആണ് ഇൻസ്റ്റാഗ്രാം പോസ്റ്റുകൾ ഇടാൻ തുടങ്ങിയത്. സുശാന്ത് മരിച്ച് ഒരു മാസത്തിനുള്ളിൽ പിതാവ് റിയയ്‌ക്കെതിരെ പട്‌നയിൽ എഫ്‌ഐആർ ഫയൽ ചെയ്തിരുന്നു. ആത്മഹത്യയ്ക്ക് പ്രേരിപ്പിച്ചുവെന്നും പണം തട്ടിയെടുത്തുവെന്നും ആരോപിച്ചാണ് കേസ് ഫയൽ ചെയ്തത്.
സെപ്റ്റംബറിൽ സുശാന്തിന്‍റെ മരണത്തിൽ മയക്കുമരുന്ന് ബന്ധം ഉണ്ടെന്ന ആരോപണത്തെ ക്കുറിച്ച് നടത്തിയ അന്വേഷണവുമായി ബന്ധപ്പെട്ട് റിയയെ എൻ‌സി‌ബി അറസ്റ്റ് ചെയ്തു. മുംബൈ ജയിലിൽ ഒരു മാസത്തിനു ശേഷം റിയ കഴിഞ്ഞ വർഷം ഒക്ടോബറിൽ ജാമ്യത്തിൽ പുറത്തിറങ്ങി.
തുടർന്നാണ് ഒഴിവുസമയങ്ങളിൽ മാനസിക സമ്മർദ്ദം കുറയ്ക്കാൻ പുസ്തകങ്ങൾ വായിക്കാനും യോഗ പരിശീലിക്കാനും തുടങ്ങിയത്.
