ബ്രാൻഡഡ് വസ്ത്രങ്ങളുടെ നിരവധി പകർപ്പുകൾ വിപണിയിൽ ലഭ്യമാണ്. അത്തരമൊരു സാഹചര്യത്തിൽ, അവ വാങ്ങുമ്പോൾ അബദ്ധത്തിൽ വഞ്ചിക്കപ്പെടുന്നത് വലിയ കാര്യമല്ല, എന്നാൽ ബ്രാൻഡഡ് വസ്ത്രങ്ങളിൽ നിരവധി സവിശേഷതകൾ ഉണ്ട്. അതെല്ലാം വ്യാജന്മാർക്ക് പകർത്താൻ കഴിയില്ലെന്ന് നിങ്ങൾക്കറിയാമോ.
ഫാഷന്‍റെ മാറിക്കൊണ്ടിരിക്കുന്ന ഈ കാലഘട്ടത്തിൽ, ഇന്ന് എല്ലാവരും ബ്രാൻഡഡ് വസ്ത്രങ്ങൾ വാങ്ങാൻ ആഗ്രഹിക്കുന്നു. ബ്രാൻഡഡ് വസ്ത്രങ്ങൾ വാങ്ങുന്നതിന് യുവാക്കൾക്കിടയിൽ മത്സരം പോലുമുണ്ട്. ഇന്നത്തെ തലമുറ അവരുടെ ബ്രാൻഡ് വസ്ത്രങ്ങളെയും ഷൂകളെയും കുറിച്ച് ബോധമുള്ളവരാണ്, എന്നാൽ പോലും വ്യാജനെ ബ്രാൻഡായി തെറ്റി ധരിച്ചു വാങ്ങുന്നവരും ഉണ്ടാകാം. തങ്ങൾ വാങ്ങിയത് യഥാർത്ഥത്തിൽ പകർപ്പാണെന്നും ബ്രാൻഡിന്‍റെ പേരിൽ കബളിപ്പിച്ചിട്ടുണ്ടെന്നും കുറച്ചു ദിവസങ്ങൾക്കു ശേഷം മനസ്സിലാക്കുന്നു. ഇത് നിങ്ങൾക്കും സംഭവിച്ചിട്ടുണ്ടെങ്കിൽ, അൽപം ജാഗ്രത പാലിക്കുക. ഷോപ്പിംഗിനിടെ നിങ്ങൾക്ക് ഓർമ്മിക്കാനും വഞ്ചനയ്ക്കുള്ള സാധ്യത ഒഴിവാക്കാനും കഴിയുന്ന ചില ടിപ്പുകൾ ഇതാ.
ബ്രാൻഡഡ് വസ്ത്രങ്ങൾ തിരിച്ചറിയുന്നതിനുള്ള മാർഗങ്ങൾ
സ്‌റ്റിച്ചിംഗ്
സ്റ്റിച്ചിംഗിൽ ശ്രദ്ധ പതിപ്പിച്ചുകൊണ്ട് നിങ്ങൾക്ക് ബ്രാൻഡഡ് വസ്ത്രങ്ങൾ തിരിച്ചറിയാൻ കഴിയും. ബ്രാൻഡഡ് വസ്ത്രങ്ങളുടെ തുന്നൽ വളരെ വൃത്തിയുള്ളതും ആകർഷകവുമായിരിക്കും. തുന്നലിൽ ഉപയോഗിക്കുന്ന ത്രെഡും ഗുണ മേന്മ ഉള്ളതായിരിക്കും.
സിപ്പ്
ബ്രാൻഡഡ് വസ്ത്രങ്ങളുടെ സിപ്പ് വളരെ മിനുസമാർന്നതും മികച്ച നിലവാരമുള്ളതുമാണ്. സിപ്പ് ഉപയോഗിച്ച് വ്യാജ വസ്ത്രങ്ങൾ തിരിച്ചറിയുന്നത് വളരെ എളുപ്പമാണ്. വേഗത്തിൽ തുറന്ന് അടയ്‌ക്കുക. ഇത് ചെയ്യുന്നതിലൂടെ നിങ്ങൾക്ക് ബ്രാൻഡ് ആണോ വ്യാജൻ ആണോ എന്ന് മനസിലാക്കാം. ശ്രദ്ധിക്കേണ്ട ഒരു കാര്യം കൂടി, മിക്ക ബ്രാൻഡഡ് വസ്ത്രങ്ങളുടെയും സിപ്പിലാണ് ബ്രാൻഡിന്‍റെ പേര് എഴുതിയിരിക്കുന്നത്.
ബട്ടൺ
ഡ്രെസ്സിലെ ബട്ടൺ നോക്കുക. ബട്ടണിന് ചുവടെയുള്ള സ്ക്രൂവിൽ ബ്രാൻഡിന്‍റെ പേര് എഴുതിയിട്ടുണ്ടെങ്കിൽ ബ്രാൻഡ് യഥാർത്ഥമാണെന്ന് അർത്ഥമാക്കുന്നു. വ്യാജ വസ്ത്രങ്ങളിൽ അത് ഉണ്ടാകില്ല. ബ്രാൻഡിന്‍റെ പേര് ബ്രാൻഡഡ് വസ്ത്രങ്ങളുടെ ബട്ടണുകളിൽ എഴുതാറുണ്ട്. അടുത്ത തവണ നിങ്ങൾ ഷോപ്പിംഗ് നടത്തുമ്പോൾ, ബട്ടണിലും ശ്രദ്ധിക്കുക.
ലോഗോ
ലോഗോ കൊണ്ട് ബ്രാൻഡഡ് വസ്ത്രങ്ങൾ തിരിച്ചറിയുന്നത് ചിലപ്പോൾ ബുദ്ധിമുട്ടാണ്, പക്ഷേ നിങ്ങൾക്ക് ആ ബ്രാൻഡിന്‍റെ ലോഗോ നിങ്ങളുടെ മൊബൈലിൽ തുറന്ന് ഡ്രെസ്സിലെ ലോഗോയുമായി ഒത്തു നോക്കാം. ഫോണ്ട് സ്റ്റൈൽ, സൈസ് ഉപയോഗിച്ച് ലോഗോ തിരിച്ചറിയാൻ കഴിയും.
ടാഗുകൾ
സാധാരണയായി ബ്രാൻഡഡ് വസ്ത്രങ്ങൾ വാങ്ങുമ്പോൾ അവരുടെ ടാഗുകൾ ഉപയോഗിച്ചാണ് നമ്മൾ അവരെ തിരിച്ചറിയുന്നത്. എന്നാൽ വിപണിയിൽ നിലവിലുള്ള അവരുടെ വ്യാജന്മാർ അതേ ടാഗുകൾ ഇട്ട് വിൽക്കുന്നു. അടുത്ത തവണ നിങ്ങൾ മാർക്കറ്റിലേക്ക് പോകുമ്പോൾ, ടാഗുകളും സൂക്ഷ്മമായി വിലയിരുത്തുക.
