പുറംവേദന, മൈഗ്രേൻ, മുട്ട് വേദന തുടങ്ങിയ ജീവിതശൈലി പ്രശ്നങ്ങൾ നേരിടുന്നവരാണ് ഇന്ന് മിക്കവരും. നിങ്ങളും ഇത്തരത്തിലുള്ള പ്രശ്നങ്ങൾ നേരിടുന്നുവെങ്കിൽ ചില പോംവഴികൾ സ്വീകരിക്കാം. തീർച്ചയായും ശരീരത്തിനും മനസ്സിനും നവോന്മേഷവും ഊർജ്ജസ്വലതയും അനുഭവപ്പെടും.
മടി കളയുക
മടി കളഞ്ഞ് രാവിലെയും വൈകുന്നേരവും അടുത്തുള്ള പാർക്കിലേക്ക് നടക്കാൻ പോവുക. ഇനി കാലാവസ്‌ഥ അനുകൂലമല്ലെങ്കിൽ ട്രെഡ്മില്ലിൽ കുറച്ചു സമയം എക്സർസൈസ് ചെയ്യാം. തൊട്ടടുത്തുള്ള മെട്രോ സ്റ്റേഷനിലേക്കും നടക്കാം. സ്വന്തം വാഹനം ജോലി സ്ഥലത്തു നിന്നും അൽപം മാറി പാർക്ക് ചെയ്‌ത് ഓഫീസിലേക്ക് നടന്നു പോകാം.
ഡ്രൈവിംഗ് ശ്രദ്ധയോടെ
മുതുകുവേദനയ്ക്ക് ഒരു പ്രധാന കാരണമാണ് ഡ്രൈവിംഗ്. പ്രത്യേകിച്ചും ദീർഘദൂരം വാഹനമോടിക്കുന്നവർക്ക് ഡ്രൈവ് ചെയ്യുമ്പോൾ സ്റ്റിയറിംഗ് വീലിൽ നിന്നും തെറ്റായ അകലം വയ്ക്കുന്നതു മൂലം കഴുത്ത്, കൈ, ചുമൽ, നട്ടെല്ല്, മുതുക്, കൈത്തണ്ട് തുടങ്ങിയയിടങ്ങളിൽ വേദനയും അസ്വസ്ഥതയുമുണ്ടാകും. അതുകൊണ്ട് സ്റ്റിയറിംഗ് വീലിൽ നിന്നും ശരിയായ അകലത്തിലിരുന്നു വേണം വാഹനമോടിക്കാൻ. കാലുകൾക്ക് പൂർണ്ണമായ വിശ്രമം നൽകാം.
ഓഫീസിലാണെങ്കിൽ
ഓഫീസ് കസേര മുതുകിന്‍റെ അടിഭാഗത്തിന് സപ്പോർട്ട് ചെയ്യുന്ന വിധത്തിലായിരിക്കണം. കംപ്യൂട്ടർ സ്ക്രീൻ മുഖത്തിന് സമാന്തരമായിരിക്കണം.
ശാരീരിക വ്യായാമം
കസേരയിലിരുന്നു കൊണ്ട് ചില ലൈറ്റായ വ്യായാമങ്ങൾ ചെയ്യാൻ ശ്രമിക്കാം. നിവർന്ന് ഇരുന്ന ശേഷം കാലുകൾ പരമാവധി നീട്ടുക. വിരലുകൾ വിടർത്തുക. ഇനി 30 മുതൽ 40 ഡിഗ്രി നിലയിൽ കാലുകൾ ഉയർത്താൻ ശ്രമിക്കുക. എന്നിട്ട് നിലത്ത് സ്പർശിക്കാതെ താഴെ പാദങ്ങൾ കൊണ്ടുവരിക. ഇപ്രകാരം 10-15 തവണ ആവർത്തിക്കുക. ഇത് വയർ കുറയ്ക്കാൻ സഹായിക്കുമെന്ന് മാത്രമല്ല മുതുകിന് താഴെയുള്ള ഭാഗത്തിന് നല്ല ബലവും പകരും.
ആവർത്തിക്കുക ഇങ്ങനെ
ഈ വ്യായാമത്തിനൊപ്പം മറ്റൊരു വ്യായാമം കൂടി ചെയ്യാം. ഒരു പേന അല്ലെങ്കിൽ പെൻസിൽ നിലത്തിടുക. അതിനു ശേഷം കാൽവിരലു കൊണ്ട് അതുയർത്താൻ നോക്കുക.
നിലത്തേക്ക് നേരിട്ട്
നിലത്ത് വീണു കിടക്കുന്ന ഏത് വസ്‌തുവും എടുക്കാൻ പെട്ടെന്ന് കുനിയുന്നതിന് പകരം ആദ്യം മുട്ട് മടക്കി ആ വസ്‌തു എടുക്കുക.
കൈത്തണ്ടയ്ക്ക് വിശ്രമം നൽകുക
വിരലിൽ പെരുപ്പോ മരവിപ്പോ തോന്നുകയാണെങ്കിൽ ഇത് കാർപ്പൽ ടണൽ സിൻഡ്രോമിന്‍റെ ലക്ഷണമായി കരുതാം. കൈത്തണ്ടകൾക്ക് വിശ്രമം നൽകണം. കൈകൾക്കും കൈത്തണ്ടകൾക്കും ചെറിയ ഇടവേളകളിലായി വിശ്രമം നൽകാം.
