കടുത്ത വേനൽക്കാലം തുങ്ങുകയായി. ഈ കാലാവസ്‌ഥ നിങ്ങളുടെ മുടിയെ സാരമായി ബാധിക്കാം. വേനൽക്കാല കേശ സംരക്ഷണം എങ്ങനെയാവണം എന്നതിനെ പറ്റി അറിയാം. സൂര്യ കിരണങ്ങളിൽ നിന്നും മുടിയുടെ ആരോഗ്യം കാക്കാം.
സ്കാൽപ് കെയർ
വേനലിൽ ശിരോചർമ്മത്തിന്‍റെ പരിചരണം വളരെ പ്രധാനമാണ്. ഈ സീസണിൽ ശിരോചർമ്മം വൃത്തിയായി സൂക്ഷിക്കുന്നതിനൊപ്പം ഈർപ്പവും നിലനിർത്തണം. അണുബാധയിൽ നിന്നും സംരക്ഷണം നൽകാൻ ഇതു സഹായിക്കും. ശിരോചർമ്മം വരളുന്നത് മുടിയുടെ ആരോഗ്യത്തെ ബാധിക്കും. വേനലിൽ അമിതമായി വിയർക്കുമല്ലോ. വിയർപ്പു കാരണം പൊടിയും ചളിയും ശിരോചർമ്മത്തിൽ അടിഞ്ഞു കൂടും. അതിനാൽ കൃത്യമായി മുടി കഴുകണം.
മുടിയുടെ സ്വഭാവം കണക്കിലെടുത്ത് മൈൽഡ് ഷാംപു കൊണ്ട് കഴുകാം, കെമിക്കൽ അധികം ഇല്ലാത്ത ഷാംപു ആണ് ഉത്തമം. അമിതമായി ഷാംപു ഉപയോഗിച്ചാൽ ശിരോചർമ്മത്തിലെ എണ്ണമയും നഷ്ടപ്പെടും. അത് ദോഷമാണ്. അതിനാൽ ആഴ്ചയിൽ ഒന്നോ രണ്ടോ തവണ എണ്ണ തേച്ച് കഴുകി കളയാം.
മുടി കഴുകിയ ശേഷം നല്ല കണ്ടീഷണർ ഉപയോഗിക്കണം. ഇതു മുടിയ്ക്ക് സുരക്ഷാ കവചം ഒരുക്കും. മുടി വരണ്ടതായി തീരുകയുമില്ല. തിളക്കവും ഈർപ്പവും നിലനിൽക്കുകയും ചെയ്യും. പുറത്തു പോകുന്ന വേളയിൽ തലയിൽ സ്കാർഫ് ചുറ്റുക. ഇത് ശിരോചർമ്മം വിയർക്കാതിരിക്കാൻ സഹായിക്കും. പൊടിപടലങ്ങൾ അടിഞ്ഞു കൂടുന്നതും തടയും. ഷോർട്ട് ഹെയർ ഉള്ളവർക്ക് തൊപ്പിയും അണിയാവുന്നതാണ്. നല്ല വെൻറിലേഷൻ കിട്ടുന്നതാവണമെന്ന് മാത്രം.
ഈർപ്പം നിലനിർത്തുക
ധാരാളം വെള്ളം കുടിക്കണം. ഇത് മുടിയുടെ ആരോഗ്യ സംരക്ഷണത്തിനും നല്ലതാണ്. വെള്ളം കുടിക്കുന്നത് മുടി വേരുകൾക്ക് ബലം നൽകുന്നു. അഴകും പ്രദാനം ചെയ്യുന്നു. ശിരോചർമ്മം ആരോഗ്യത്തോടെയിരിക്കാനും ധാരാളം വെള്ളം കുടിക്കേണ്ടതുണ്ട്. ഡിഹൈഡ്രേഷൻ തടയാനും ഉപകരിക്കും. കരിക്ക്, കഞ്ഞിവെള്ളം, തണ്ണിമത്തൻ, പഴച്ചാറുകൾ, നാരങ്ങാ വെള്ളം, ഡിടോക്സ് വാട്ടർ എന്നിവ കുടിക്കാം.
ഷോർട്ട് ഹെയർ കൂൾ ലുക്ക്
പുരുഷന്മാർക്കാണിത് ഏറെ സൗകര്യം. നീണ്ട മുടിയുള്ളവർക്ക് അത് പരിചരിക്കാൻ വേനൽക്കാലത്ത് പാടായിരിക്കും. മുടി വെട്ടാൻ ആഗ്രഹിക്കുന്ന സ്ത്രീകൾ വേനൽക്കാലത്ത് ചെയ്യുന്നതാണ് ഉചിതം. ബോയ്ക്കട്ട് ചെയ്യാൻ ഇഷ്ടപ്പെടാത്തവർ, പ്രത്യേകിച്ചും നീണ്ട മുടിയുള്ളവർ കുറച്ച് വെട്ടി നിർത്തുന്നതാണ് അഭികാമ്യം. വേനൽക്കാല കേശ പ്രശ്നങ്ങൾ ബാധിക്കാതിരിക്കാൻ അതാണ് നല്ലത്.
കളറിംഗ് വേണ്ട
കൃത്രിമ നിറങ്ങൾ മുടിയ്ക്ക് നൽകുന്നത് ഫാഷനാണെങ്കിലും അത് വേനലിൽ ഒഴിവാക്കുക. കളറിൽ കെമിക്കലുകൾ ഉണ്ടാവും അത് മുടിയ്ക്ക് ദോഷം ചെയ്യും. കളർ ചെയ്‌താൽ വേനലിൽ മുടിയ്ക്ക് പ്രത്യേക പരിചരണം നൽകുകയും വേണം. ആഴ്ചയിൽ എണ്ണയിട്ട് മസാജ് ചെയ്ത ശേഷം മൈൽഡ് ഷാംപു കൊണ്ട് കഴുകണം. സൂര്യ കിരണങ്ങൾ മുടിയിൽ ഏൽക്കാതെ നോക്കണം.
കായിക പ്രേമികൾക്ക്
ഈ സീസണിൽ മിക്കവരും വെക്കേഷൻ ആഘോഷിക്കാനായി ട്രക്കിംഗിനും മറ്റും പോകാറുണ്ട്. അതുപോലെ സ്വിമ്മിംഗും. ഇങ്ങനെ കായിക വിനോദങ്ങളിൽ ഏർപ്പെടുമ്പോൾ മുടിയുടെ ആരോഗ്യം കാക്കണം.
വിയർപ്പാണ് വില്ലനാവുന്നത്. സ്വിംമ്മിഗിനു മുമ്പ് ഷാംപു ഉപയോഗിക്കരുത്. കാരണം മുടിയിലെ സ്വാഭാവിക എണ്ണമയം നഷ്ടപ്പെടും. പിന്നെ ക്ലോറിൻ വെള്ളത്തിൽ നീന്തുന്നതോടെ മുടി വീണ്ടും വരണ്ടു പോകും. പൊട്ടിപ്പോകാനും കൊഴിയാനും ഇത് ഇടയാക്കും. ഹെയർ ക്യാപ്പ് ധരിക്കുന്നതും നന്ന്. സ്വിമ്മിംഗ് കഴിഞ്ഞ ശേഷം ഷാംപു ഇട്ട് മുടി കഴുകാം. വ്യായാമം ചെയ്യുന്നവരാണെങ്കിൽ നന്നായി വെള്ളം കുടിക്കണം. പഴങ്ങളും കഴിക്കണം.
