കൂടുതൽ സ്ത്രീകളും പുറമെ അണിയുന്ന വസ്ത്രങ്ങളെ പറ്റി വളരെ ശ്രദ്ധാലുക്കളായിരിക്കും, എന്നാൽ ഇന്നർ വിയറുകൾ തെരഞ്ഞെടുക്കുന്നതിൽ വലിയ ശ്രദ്ധ കാണിക്കുകയില്ല. അതിന്‍റെ നിലവാരം, ക്ലോത്ത്, സൈസ്, ഡിസൈൻ എന്നിവയിലൊന്നും യാതൊരു അഭിരുചിയും കാണിക്കുകയില്ല. ഉള്ളിലിടുന്നതല്ലേ ആര് കാണാനാ എന്ന ലൈനാവും പലർക്കും. എന്നാൽ ഒരു സ്ത്രീയുടെ വാർഡ്രോബിന്‍റെ പ്രധാനപ്പെട്ട ഭാഗമാണ്, വളരെ ശ്രദ്ധ നൽകേണ്ട കാര്യമാണ് ഇന്നർവിയറുകൾ. അടിവസ്ത്രങ്ങൾ വാങ്ങുമ്പോൾ ശ്രദ്ധിക്കേണ്ട കാര്യങ്ങൾ മനസ്സിലാക്കാം.
കോട്ടൺ അടിവസ്ത്രങ്ങൾ ഉപയോഗിക്കുക
വായു സഞ്ചാരം സുഗമമാക്കുന്ന തരത്തിലുള്ള കോട്ടൺ കൊണ്ട് നിർമ്മിച്ച അടിവസ്ത്രങ്ങൾ ആണ് ഉപയോഗിക്കേണ്ടത്. ആരോഗ്യത്തിന് ഇതാണ് ഉത്തമം. സിൽക്ക്, സിന്തറ്റിക് മെറ്റീരിയലുകൾ കൊണ്ടുള്ള അടിവസ്ത്രങ്ങൾ സെക്‌സിലുക്ക് നൽകുമെങ്കിലും വായുവിനെ കടത്തി വിടില്ല. ഇത് ഇൻഫെക്ഷകൻ ഉണ്ടാവാൻ ഇടയാക്കുന്നു. സിന്തറ്റിക് വാങ്ങാൻ ആഗ്രഹിക്കുന്നുവെങ്കിൽ കോട്ടൺ പോലെ ലൈനിംഗ് ഉള്ളത് തെരഞ്ഞെടുക്കുക. ദീർഘനേരം ഉപയോഗിക്കയുമരുത്.
സൈസ് നോക്കി വാങ്ങാം
ശരിയായ സൈസ് നോക്കി വാങ്ങണം. വലുതായാൽ അഴിഞ്ഞു പോകാം. അതുപോലെ ചെറുതായാൽ ഇറുക്കത്തിന്‍റെ പ്രശ്നങ്ങളും നേരിടേണ്ടി വരും. ഇറുക്കമുള്ളതായാൽ തൊലി പൊട്ടാനും പാട് വീഴാനും സാധ്യതയുണ്ട്. മാത്രമല്ല നടക്കുമ്പോഴും ഇരിക്കുമ്പോഴും അസ്വസ്ഥത അനുഭവപ്പെടുന്നു. പാന്‍റിയുടെ സൈസ് നിങ്ങ ടെ ബ്രായുടെ സൈസിനേക്കാൾ കൂടുതലായിരിക്കും.
കടുത്ത നിറങ്ങൾ വേണ്ട
കാണാൻ ആകർഷകമായിരിക്കുമെങ്കിലും ഇതിന്‍റെ നിറം കൊടുക്കാനുപയോഗിച്ച കെമിക്കൽ മൃദുല ചർമ്മത്തിന് ഹാനികരമാണ്. അതിനാൽ വെള്ള നിറമാണ് അഭികാമ്യം. സംവേദനക്ഷമതയുള്ള ചർമ്മമാണെങ്കിൽ പ്രത്യേകിച്ചും.
ഷേപ്പ് വിയർ അധികനേരം അണിയരുത്
വയർ കുറയ്ക്കാനും ഉദരത്തിനു ഷേപ്പ് കിട്ടാനും ഷേപ്പ് വിയർ ധരിക്കുന്ന സ്ത്രീകൾ ധാരാളം ഉണ്ട്. ഇവ അധികനേരം അണിയരുത്. ഇത് ആരോഗ്യ പ്രശ്നങ്ങൾ സൃഷ്ടിക്കും. അധികനേരം ഉപയോഗിച്ചാൽ പിത്തം, അമ്‍ളം തുടങ്ങിയ പ്രശ്നങ്ങൾക്ക് പുറമെ വയറ്റിൽ നീർക്കെട്ടും വരാം. അതിനാൽ സ്‌ഥിരമായും അധികനേരവും ഉപയോഗിക്കരുത്.
വ്യായാമം ചെയ്യുമ്പോൾ
വ്യായാമം ചെയ്യുമ്പോൾ ഇറുങ്ങിയതോ അധികം ലൂസ് ആയതോ അണിയരുത്. ഗുണനിലവാരമുള്ളത് മാത്രം അണിയുക. പാന്‍റി നിറം ഇളക്കുന്നതോ സിന്തറ്റിക്കോ ആവരുത്. വിയർപ്പ് ഒട്ടി പിടിച്ച് ബാക്ടീരിയ രൂപപ്പെടും. വ്യായാമ ശേഷം പാന്‍റി മാറ്റാൻ ശ്രദ്ധിക്കണം. വിയർപ്പ് കുടിച്ചു കിടക്കുന്ന പാന്‍റി തുടർന്ന് അണിഞ്ഞാൽ ചർമ്മം ചുവന്ന് തടിക്കാൻ സാധ്യതയുണ്ട്. വ്യായാമ ശേഷം പാന്‍റി അഴിച്ചു മാറ്റി കുറച്ചുനേരം കാറ്റ് കൊള്ളുന്നതും നല്ലതാണ്.
സ്ത്രീരോഗ വിദ്‌ഗദ്ധരുടെ അഭിപ്രായം
ഡോ.മോണിക്ക ജൈന്‍റെ അഭിപ്രായത്തിൽ പാന്‍റി അലക്കുമ്പോൾ അതിൽ ചോരക്കറയോ, കട്ടിയുള്ള ദുർഗന്ധം പുറപ്പെടുവിക്കുന്ന ദ്രാവകമോ സ്ഥിരമായി ശ്രദ്ധയിൽ പെട്ടാൽ ഡോക്ടറെ കാണുന്നതാണ് നല്ലത്.
പാന്‍റീസ് അലക്കാൻ ഉപയോഗിക്കുന്ന ഡിറ്റർജെന്‍റ് ഗുണനിലവാരം ഉള്ളതാവണം. ഡിറ്റർജന്‍റ് മണമില്ലാത്തതും നിറമില്ലാത്തതും ആയിരിക്കണം. കാരണം ഇത് അലർജിയുണ്ടാക്കാൻ ഇടവരുത്തും.
ശ്രദ്ധിക്കേണ്ട കാര്യങ്ങൾ
ഉറങ്ങുമ്പോൾ പാന്‍റി അണിയരുത്
ദിവസം മുഴുവൻ പാന്‍റീസ് അണിഞ്ഞ് കഴിയേണ്ടി വരുന്ന സ്ത്രീകൾ രാത്രി ഉറങ്ങുമ്പോൾ അടിവസ്ത്രം ഉപയോഗിക്കാതിരിക്കുന്നതാണ് നല്ലത്. മണിക്കൂറുകളോളം വിയർപ്പും നനവും ഉണ്ടാവുന്നതിനാൽ ഇൻഫക്ഷൻ പുകച്ചിൽ എന്നിവ ഉണ്ടാവുന്നു. ആ ഭാഗത്ത് വായുസഞ്ചാരം അനിവാര്യമാണ്. പാന്‍റി അണിയാത്ത സമയങ്ങളിൽ ചർമ്മത്തിന് ശ്വസിക്കാനും പ്രയാസം നേരിടില്ല.
പകൽ സമയത്ത് ധരിച്ചില്ലെങ്കിൽ
ചില സ്ത്രീകൾ പാന്‍റീസ് അണിയാറേയില്ല. ഇങ്ങനെ ചെയ്യുന്നതും ഉചിതമല്ല. കാരണം മാംസം തൂങ്ങി ഷേപ്പ് നഷ്‌ടപ്പെടാൻ ഇതിടയാക്കും. നിതംബത്തിന്‍റെ കെട്ടുറപ്പിനെയും ബാധിക്കുന്നു. കൂടാതെ വസ്ത്രങ്ങൾ ഉരഞ്ഞ് പാടുകൾ വീഴാനും മുറിവേൽക്കാനും സാധ്യത കൂടുതലാണ്. അതിനാൽ പകൽ സമയത്ത് പാന്‍റീസ് ധരിക്കണം
എപ്പോൾ മാറ്റണം
ഓരോ സീസണിലും സ്ത്രീകൾ തങ്ങളുടെ ഉടയാടകൾ, ചെരിപ്പ്, ആക്സസറീസ് എന്നിവ മാറ്റാറുണ്ട്. എന്നാൽ പാന്‍റീസ് എപ്പോഴാണ് മാറ്റുന്നത്? പലരും പഴകിയ പാന്‍റീസ് തന്നെ ഏറെ നാൾ ഉപയോഗിക്കുന്നവരാണ്. നരച്ചു തുടങ്ങുമ്പോഴോ ചെറുതായി കീറി തുടങ്ങുമ്പോഴോ ആണ് പലരും പാന്‍റീസ് മാറ്റാൻ ആലോചിക്കുന്നതു തന്നെ.
തുണിയുടെ ഗുണനിലവാരം കുറഞ്ഞു തുടങ്ങുമ്പോഴെ പാന്‍റീസ് മാറ്റണം. പാന്‍റിയുടെ ഇലാസ്റ്റിക് കേടായാൽ ഉടനെ പാന്‍റീസ് ഉപേക്ഷിക്കണം. പുതിയത് വാങ്ങുമ്പോൾ തീർച്ചയായും ബ്രാന്‍റഡ് ഇന്നർവിയറുകൾ തന്നെ വാങ്ങുക.
