ഏതു നാട്ടിൽ ചെന്നാലും വീട്ടിലെ ഭക്ഷണം ഒരു വികാരമാണ്. നമ്മുടെ അടുക്കളയിൽ തയ്യാറാക്കുന്ന നാടൻ വിഭവങ്ങളുടെ സ്വാദ് ഒന്നു വേറെ തന്നെയാണ്. ഇത് രുചിയുടെ നൊസ്റ്റാൾജിയ!
വിവിധതരം പച്ചക്കറികളും കട്ടത്തൈരും തേങ്ങയും ചേർത്തുണ്ടാക്കുന്ന ഒരു വിഭവമാണ് അവിയൽ. ഒട്ടുമിക്ക പച്ചക്കറികളും അവിയലിൽ ഉപയോഗിക്കാറുണ്ട്. കേരളീയ സദ്യയിലെ ഒഴിച്ചുകൂടാനാവാത്ത ഒരു വിഭവമാണിത്.
ചേരുവകൾ
കുമ്പളങ്ങ 100 ഗ്രാം
മത്തങ്ങ 100 ഗ്രാം
ചേന 100 ഗ്രാം
പച്ച വാഴയ്ക്ക 1 എണ്ണം
ഉരുളക്കിഴങ്ങ് 1 എണ്ണം
മുരിങ്ങക്കായ് 1 എണ്ണം
ക്യാരറ്റ് 1 എണ്ണം
തേങ്ങ ചിരകിയത് ഒന്നര കപ്പ്
പച്ചമുളക് 6 എണ്ണം
മഞ്ഞൾപ്പൊടി ഒരു ടീസ്പൂൺ
ചെറുതായി പുളിയുള്ള തൈര് അര കപ്പ്
മുളകുപൊടി ഒരു ടീസ്പൂൺ
വെളിച്ചെണ്ണ 2 ടേബിൾ സ്പൂൺ
ഉപ്പ് ആവശ്യത്തിന്
തയ്യാറാക്കുന്ന വിധം
പച്ചക്കറികളെല്ലാം തന്നെ നന്നായി കഴുകി വൃത്തിയാക്കിയശേഷം നീളത്തിൽ നേർത്തതായി മുറിക്കുക.
ശേഷം കുക്കറിൽ പച്ചക്കറിയിട്ട് ആവശ്യത്തിന് വെള്ളം ചേർത്ത് മഞ്ഞൾപ്പൊടി, മുളകുപൊടി ഉപ്പ് ചേർത്ത് വേവിക്കുക.
ഇനി തേങ്ങ പച്ചമുളകും വെള്ളവും ഒഴിച്ച് നന്നായി അരച്ചെടുത്ത് അവിയൽ കൂട്ടിലേക്ക് ചേർത്ത് ഏതാനും മിനിറ്റ് പാകം ചെയ്യുക.
തുടർന്ന് തൈര് ചേർത്ത് ഇളക്കുക.
കറിവേപ്പിലയും വെളിച്ചെണ്ണയും ചേർത്ത് ഗ്യാസ് ഓഫാക്കുക. അവിയൽ റെഡി.
