ഏതു നാട്ടിൽ ചെന്നാലും വീട്ടിലെ ഭക്ഷണം ഒരു വികാരമാണ്. പരമ്പരാഗതമായി നമ്മുടെ അടുക്കളയിൽ തയ്യാറാക്കുന്ന നാടൻ വിഭവങ്ങളുടെ സ്വാദ് ഒന്നു വേറെ തന്നെയാണ്. അത്തരം വിഭവങ്ങളെ പരിചയപ്പെടാം. ഇത് രുചിയുടെ നൊസ്റ്റാൾജിയ!
കേരളത്തിലെ പരമ്പരാഗത കറി വിഭവങ്ങളിൽ ധാരാളം പേരുടെ ഇഷ്ടപ്പെട്ട വിഭവമാണ് ചിക്കന്‍ കറി. വേറിട്ട രീതിയില്‍ ചിക്കന്‍ ഉണ്ടാക്കുന്ന വിധം എങ്ങനെയെന്ന് നോക്കാം.
ചേരുവകൾ
ചിക്കൻ ഒരു കിലോ ചെറിയ കഷണങ്ങളാക്കിയത്
മല്ലിപ്പൊടി 2 ടേബിൾ സ്പൂൺ
കാഷ്മീരി മുളകുപൊടി ഒരു ടേബിൾ സ്പൂൺ
മഞ്ഞൾപ്പൊടി കാൽ ടീസ്പൂൺ
സവാള 1 നേരിയതായി അരിഞ്ഞത്
ചെറിയ ഉള്ളി 10-15 എണ്ണം നേരിയ തായി അരിഞ്ഞത്
വറ്റൽമുളക് രണ്ട്
പച്ചമുളക് മൂന്ന് ചെറുതായി മുറിച്ചത്
ഇഞ്ചി 2 മീഡിയം സൈസ് അരിഞ്ഞത്
വെളുത്തുള്ളി 6 അല്ലി നന്നായി അരച്ചത്
ഗരംമസാല ഒരു ടീസ്പൂൺ
പെരുംജീരകം മുക്കാൽ ടീസ്പൂൺ
കുരുമുളകുപൊടി ഒരു ടീസ്പൂൺ
തേങ്ങാക്കൊത്ത് കാൽ കപ്പ്
കടുക് അര ടീസ്പൂൺ
കറിവേപ്പില ഒരു തണ്ട്
എണ്ണ ആവശ്യത്തിന്
വെള്ളം ആവശ്യത്തിന്
ഉപ്പ് ആവശ്യത്തിന്
തയ്യാറാക്കുന്ന വിധം
ചെറിയ ഉള്ളി, പച്ചമുളക്, ഇഞ്ചി, വെളുത്തുള്ളി എന്നിവ മിക്സിയിൽ നന്നായി അരച്ചെടുക്കുക.
കഴുകി വൃത്തിയാക്കിയ ചിക്കൻ കഷണങ്ങളിൽ മഞ്ഞൾപ്പൊടി, മുളകുപൊടി, മല്ലിപ്പൊടി, ഗരംമസാല, പെരുംജീരകം പൊടിച്ചത്, കുരുമുളകുപൊടി, ഉപ്പ് എന്നിവയ്ക്കൊപ്പം അരച്ച ഈ പേസ്റ്റ് പുരട്ടുക. അതിനുശേഷം 15-20 മിനിറ്റുനേരം ചിക്കൻ അടച്ച് വയ്ക്കുക.
ഒരു പാനിൽ എണ്ണയൊഴിച്ച് ചൂടാക്കി അതിൽ കടുകിട്ട് പൊട്ടിക്കുക. അതിലേക്ക് വറ്റൽ മുളക്, കറിവേപ്പില എന്നിവ ഇടുക. തുടർന്ന് സവാള അരിഞ്ഞത് ഇട്ട് വഴറ്റുക.
തുടർന്ന് മാരിനേറ്റ് ചെയ്ത ചിക്കൻ ഇട്ട് 2-3 മിനിറ്റ് നേരം ഇളക്കുക. ശേഷം അടച്ച് 10 മിനിറ്റ് നേരം പാകം ചെയ്യാം. ശേഷം മീഡിയം ഫ്ളെയിമിൽ ഇടയ്ക്ക് ഇളക്കി അതിലെ ഗ്രേവി വറ്റുന്നതുവരെ പാകം ചെയ്യാം.
തേങ്ങാക്കൊത്തും അൽപം ഗരം മസാലയും കൂടി വിതറുക. നന്നായി എല്ലാം കൂടി മിക്സ് ചെയ്തശേഷം 5 മിനിറ്റ് നേരം കൂടി പാകം ചെയ്യുക. ഒരു ടീസ്പൂൺ വെളച്ചെണ്ണ മീതെ ഒഴിച്ച് നന്നായി ഇളക്കി ചേർക്കുക. ഇത് പുട്ടിനോ, കപ്പയ്ക്കോ, പൊറോട്ടയ്ക്കോ ഒപ്പമോ കഴിക്കാം.
