വീടിന്‍റെ നിലവിലുള്ള രൂപം മാറ്റുകയോ കൂട്ടി ചേർക്കുകയോ ചെയ്യുമ്പോൾ കോലം കെടാതെ നോക്കണം. എവിടെയെങ്കിലും കണ്ട് ഇഷ്ടപ്പെട്ട ഡിസൈനുകളും സ്റ്റൈലുകളും സ്വന്തമായ മാറ്റങ്ങൾ ഉൾപ്പെടുത്തി ചെയ്യുന്നവരും ഉണ്ട്. ഇതൊക്കെ നല്ലതു തന്നെ, പക്ഷേ അത് അനുയോജ്യമാണോ ഭംഗി കൂടുമോ എന്നൊക്കെ ചിന്തിച്ചിട്ടും വേണം ചെയ്യാൻ.
ഇന്‍റീരിയർ പുതുക്കുക എന്നതു കൊണ്ട് ഉദ്ദേശിക്കുന്നത് എന്താണ്? പഴയതെല്ലാം മാറ്റി പുതിയവ സ്‌ഥാപിക്കുക എന്നല്ല. മുറിയിലുള്ള ഫർണീച്ചറുകളും മറ്റും കലാപരമായി പുന:ക്രമീകരിക്കുകയാണ് വേണ്ടത്. പുതുമ വരുത്താൻ വേണ്ടി വെളിച്ചം പ്രതിഫലിപ്പിക്കുന്ന ചുമരുകളിലേയ്ക്ക് കണ്ണാടികൾ മാറ്റി നോക്കൂ. പെട്ടെന്ന് മുറിയുടെ ലുക്ക് മാറും.
നല്ലൊരു ലാംമ്പ് ഷെയ്ഡ് കൊണ്ടും മുറിയുടെ ചന്തം മാറ്റാനാവും. ലാംമ്പ് ഷെയ്ഡുകൾ കൊണ്ട് ഇഫക്റ്റുകൾ തീർക്കാം.
പ്ലാസ്റ്റിക് കൊണ്ടുള്ള അലങ്കാര വസ്തുക്കൾ വീടിന്‍റെ അകത്തളങ്ങളിൽ വയ്ക്കാതിരിക്കുന്നതാണ് നല്ലത്. മണ്ണിന്‍റെയോ സിറാമിക്കിന്‍റെയോ ചെടിച്ചട്ടികൾ ആവാം. മരത്തിന്‍റെ ബോക്സ് കൊണ്ട് കവർ ചെയ്ത ചെറിയ ചട്ടികളും വീടിന്‍റെ അകത്തളങ്ങൾക്ക് യോജിക്കും.
സ്വീകരണ മുറിയുടെ കാറ്റും വെളിച്ചവും കിട്ടുന്ന ഇടങ്ങളിൽ ഒരു ഇന്‍റീരിയർ പ്ലാന്‍റ് വയ്ക്കുന്നത് ആകർഷകമായിരിക്കും. നല്ല ഓക്സിജൻ ലഭിക്കാനും വീടിനുള്ളിലെ ടോക്സിനുകൾ അകറ്റാനും ഇന്‍റീരിയർ പ്ലാന്‍റ് കൊണ്ട് സാധിക്കും. ഇതിനായി സ്നേക്ക് പ്ലാന്‍റ് പോലുള്ളവ നടാം.
വീടിന്‍റെ ഏതെങ്കിലും കോർട്ട്യാഡിൽ ചെറുതും വലുതുമായ കൗതുക വസ്തുക്കൾ സജ്ജീകരിക്കാം. അതുപോലെ ആന്‍റിക് വസ്തുക്കൾ നല്ല രീതിയിൽ ക്രിയാത്മകമായി അലങ്കരിക്കാൻ ഉപയോഗപ്പെടുത്താം. ഉദാ: ഉപയോഗ്യശൂന്യമായ പഴയ കനൽ കൽക്കരി ഇസ്തിരിപ്പെട്ടി അതിന്‍റെ പിടിയൊക്കെ പെയ്ന്‍റ് ചെയ്‌ത് വയ്ക്കാം.
കർട്ടൻ മാറ്റിയാൽ തന്നെ വീടിന്‍റെ നിലവിലെ ഇന്‍റീരിയർ ലുക്കിൽ കാര്യമായ മാറ്റം വരും. ട്രെന്‍റിന് അനുസരിച്ചുള്ളതിനേക്കാൾ മനസിനു ഇണങ്ങിയത് തെരഞ്ഞെടുക്കുക.
ഫർണ്ണീച്ചറുകൾ ഒതുക്കുമ്പോഴും ശ്രദ്ധിക്കണം. ചെറിയ മുറിയിൽ വലിയ ഫർണ്ണീച്ചറുകൾ വയ്ക്കരുത്. അതുപോലെ വിശാലമായ മുറിയിൽ ചെറിയ ഫർണ്ണിച്ചറുകളും ഇടരുത്. ഇത് രണ്ടും അഭംഗിയാണ്. ഇരുന്ന് സംസാരിക്കാനുള്ള സോഫ ഏരിയ ജനലുകളുടെ സമീപത്താക്കാം.
കുട്ടികളുടെ മുറി ഒരുക്കുമ്പോഴും ശ്രദ്ധ വേണം. വളരെ കളർഫുൾ ആയിരിക്കണം മുറി. കുട്ടികൾക്ക് പ്രോജക്‌റ്റ് ചെയ്യാനുള്ള ടേബിൾ ഒരു ഭാഗത്ത് ഒരുക്കാം.
ചുവരുകളിൽ അലങ്കാരത്തിന് എപ്പോഴും ലളിതമായ പെയിന്‍റിങ്ങുകളോ ഹാംഗിങ്ങുകളോ ആണ് നല്ലത്. സങ്കീർണ്ണമായ ആർട്ട് വർക്കുകൾ ഇന്‍റീരിയറിൽ വേണ്ട. ക്രിസ്റ്റൽ, ഗ്ലാസ് എന്നിവ കൊണ്ടുള്ള കരകൗശല വസ്തുക്കൾ വയ്ക്കാം. അക്വേറിയം ആവാം. അതിനായി പ്രത്യേക സ്‌ഥലം സെറ്റ് ചെയ്യാം. സ്‌ഥലപരിമിതി ഉണ്ടെങ്കിൽ വലിയ രണ്ട് ബൗളുകളിലായി അലങ്കാരമത്സ്യങ്ങൾ വയ്ക്കാം. കൃത്യമായ പരിചരണം ഇതിനാവശ്യമാണെന്ന് കാര്യം ശ്രദ്ധിക്കുക.
പഴയ വീടാണെങ്കിൽ അതിന്‍റെ തനിമ നിലനിർത്തി കൊണ്ട് വേണം ഇന്‍റീരിയർ മാറ്റുവാൻ. ആദ്യം ഫ്ളോർ തൊട്ട് ആവശ്യമുള്ള മാറ്റങ്ങൾ വരുത്തണം. ഫ്ളോർ ഇളം നിറമാണെങ്കിൽ സോഫ, കുഷ്യൻ, കർട്ടൻ എന്നിവ നിറക്കൂട്ടുകൾ ഉള്ളത് ആവാം.
കാർപ്പറ്റുകൾ തെരഞ്ഞെടുക്കുന്നതിലും ശ്രദ്ധ വേണം. ആന്‍റിക് കാർപെറ്റാണെങ്കിൽ അതിലുള്ള ഏതെങ്കിലും ഒരു നിറം കർട്ടനുകളിൽ കൊടുത്താൽ ലുക്ക് സൂപ്പറാവും. ചുമരുകൾക്ക് ലെഡ് ഇല്ലാത്ത ഓർഗാനിക്, സിന്തറ്റിക് പെയ്ന്‍റുകൾ ഉപയോഗിക്കാം. കടും നിറങ്ങൾ ചുമരുകൾക്ക് ഒഴിവാക്കുന്നതാണ് എല്ലാം കൊണ്ടും നല്ലത്.
