കണ്ണുകൾക്കടിയിൽ കറുത്ത പാടുണ്ടാകാൻ കാരണം?

ചോദ്യം: 44 വയസ്സുള്ള വീട്ടമ്മയാണ് ഞാൻ. മുൻനിരയിലെ പല്ലുകൾക്കിടയിൽ വിടവുണ്ടായിരിക്കുന്നു. പല്ലിന്‍റെ കോണുകൾ പൊട്ടിപ്പോയിട്ടുമുണ്ട്. ഉറക്കത്തിൽ ഞാൻ പല്ല് കടിക്കാറുണ്ടെന്നാണ് ഭർത്താവ് പറയുന്നത്. അടുത്തിടെ ദന്തഡോക്ടറെ കണ്ടപ്പോൾ അദ്ദേഹവും ഇതേകാര്യം ചോദിച്ചു. ഈ പ്രശ്നത്തിൽ നിന്നും മോചനം നേടുന്നതിന് എന്താണൊരു പോംവഴി?

ഉത്തരം: ഉറക്കത്തിൽ പല്ല് കടിക്കുന്ന ശീലമുള്ളവരുടെ പല്ലുകൾ പ്രായമാകുംമുമ്പ് ഇളകിത്തുടങ്ങും. പല്ലുകൾ തമ്മിലുള്ള തുടർച്ചയായ ഘർഷണം മൂലം പല്ലുകൾക്ക് തേയ്മാനം സംഭവിക്കാം. കൂടാതെ, പല്ലുകൾക്കിടയിൽ വിടവുണ്ടായി പല്ലുകളുടെ കോണുകൾ പൊട്ടിപ്പോകാനും അതിടയാക്കും.

ഉറക്കത്തിൽ പല്ല് കടിക്കുന്നതിന് പ്രധാന കാരണം മാനസിക പിരിമുറുക്കമാണ്. പ്രാണായാമം, യോഗ, രാവിലെ യും വൈകുന്നേരവുമുള്ള നടത്തും, രാത്രിയിൽ കിടക്കുന്നതിന് മുമ്പുള്ള യോഗ നിദ്ര എന്നിവ മനഃശാന്തി ലഭിക്കാൻ സഹായിക്കും. ഇതുകൊണ്ടാന്നും ഫലമുണ്ടായില്ലെങ്കിൽ ഏതെങ്കിലും ദന്ത ചികിത്സകനെക്കൊണ്ട് മൗത്ത് ഗാർഡ് വയ്പിക്കാം. ഇത് ധരിച്ചു കൊണ്ട് ഉറങ്ങിയാൽ പല്ലുകൾ തമ്മിൽ കൂട്ടിയിറുമ്മുകയില്ല.

താഴത്തേയും മുകളിലേയും പല്ലുകളുടെ അഗ്രങ്ങൾ തമ്മിൽ യോജിപ്പില്ലാത്തതു കൊണ്ടും പല്ലുകൾ കുട്ടിയിറുമ്മാനുള്ള സാധ്യതയുണ്ടാകാം. പല്ലുകൾ നിരയൊത്തതാക്കുന്നതിലൂടെ ഈ പ്രശ്നം ഒഴിവായിക്കിട്ടും. വിടവുണ്ടായിട്ടുള്ള പല്ലിന്‍റെ അരിക് പൊട്ടിയിട്ടുണ്ടെങ്കിൽ അത് പുനർനിർമ്മിച്ച് പ്രശ്നം പരിഹരിക്കാം. അതിനായി പലതരത്തിലുള്ള റിസ്‌റ്റോറേഷൻ പ്രതിവിധികൾ സ്വീകരിക്കണം. ഉദാ: വിടവുകൾ അടയ്ക്കുക, പൊട്ടിപ്പോയ പല്ലിന്‍റെ മുകളിൽ ക്രൗൺ ഇടുക, കേടു സംഭവിച്ച പല്ലിന് മുകളിൽ വിനിയർ പിടിപ്പിക്കു ക തുടങ്ങിയ ദന്തചികിത്സാ രീതികൾ.

ചോദ്യം: പ്ലസ് വൺ വിദ്യാർത്ഥിനിയാണ്. അടിക്കടി വായ്പ്പുണ്ണുണ്ടാകുന്നു. പല ചികിത്സകളും നടത്തി നോക്കിയെങ്കി ലും ഫലമുണ്ടായില്ല. എന്തു കൊണ്ടാണ് ഇങ്ങനെയുണ്ടാകുന്നത്? ഇതൊഴിവാക്കാൻ വല്ല മാർഗ്ഗവുമുണ്ടോ?

ഉത്തരം: പിരിമുറുക്കം, ശരീരത്തിൽ വിറ്റാമിൻ ബി കോംപ്ലക്സ‌ിന്‍റെ കുറവ്, ശരീരത്തിന്‍റെ പ്രതിരോധശേഷി കുറയൂക എന്നിവയൊക്കെയാണ് വായ്പുണ്ണ് ഉണ്ടാകുന്നതിനുള്ള പ്രധാന കാരണങ്ങൾ, പോഷകസമ്പന്നമായ ഭക്ഷണം കഴിക്കുന്നതിലൂടെയും വ്യായാമം ചെയ്യുന്നതിലൂടെയും ഈ പ്രശ്നം ഒഴിവായിക്കിട്ടും. മനസ്സിന്‍റെ പിരിമുറുക്കമകലാൻ പതിവായി വ്യായാമം ചെയ്യുക.

വായ്പ്പുണ്ണ് ഉണ്ടാവുന്ന അവസരങ്ങളിൽ വായ്ക്കകത്ത് രണ്ടുമൂന്നു പ്രാവശ്യം 0.1 ശതമാനം കേനാകോർട്ട് ഓറൽ ജെൽ പുരട്ടുക. ഭക്ഷണം കഴിച്ചശേഷം ഇത് പുരട്ടാം. വായ്പ്പുണ്ണ് ഏതാനും ദിവസങ്ങൾക്കകം മാറും.

ചോദ്യം: 25 വയസ്സുള്ള വിവാഹിതയാണ് ഞാൻ. എന്‍റെ കണ്ണുകൾക്കടിയിൽ കറുത്ത പാടുണ്ടാവുന്നു. എന്തുകൊണ്ടാണ് കറുത്ത പാടുണ്ടാകുന്നത്? ഇത് മാറാൻ ഫലപ്രദമായ മരുന്നുകളോ ക്രീമുകളോ ലഭ്യമാണോ?

 ഉത്തരം: കണ്ണുകൾക്കടിയിൽ കറുത്ത പാടുണ്ടാകുന്നത് സാധാരണ പ്രശ്നമാണ്. പാരമ്പര്യമായും ഇതുണ്ടാകാം. കണ്ണിനു സമീപത്തായി മെലാനിൻ കോശങ്ങൾ പെരുകുന്നതുമൂലമാണ് ഇതുണ്ടാവുന്നത്. നേത്രഗോളത്തിന്‍റെ ആഴം, അതിന്‍റെ ആകൃതി തുടങ്ങിയ കാര്യങ്ങളും കണ്ണിന് ചുറ്റുമുള്ള നിറത്തെ സ്വാധീനിക്കാം. ഉറക്കമില്ലായ്മയും ശരീരത്തിൽ രക്തത്തിന്‍റെ അളവു കുറയുന്നതും ഈ കറുപ്പ് അധികമായി തോന്നിക്കാനിടയാക്കും.കണ്ണിനടിയിൽ വിറ്റാമിൻ ഇ ക്രീമും ഹൈഡ്രോക്സി ക്വിനോൻ ക്രീമും പുരട്ടുന്നത് ഗുണം ചെയ്യും. ശരിയായ മേക്കപ്പിലൂടെ ഈ കറുപ്പിനെ വിദഗ്‌ധമായി മറയ്ക്കാം.

ചോദ്യം: 24 വയസ്സുണ്ട്. ആറു വർഷമായി എന്‍റെ മുടി വല്ലാതെ കൊഴിയുന്നു. കുറച്ചു നാളുകളായി ഒരു ചർമ്മരോഗ വിദഗ്‌ധന്‍റെ ചികിത്സയിലാണ്. തലയിൽ ഫിനോസ്ട്രോയിഡ് ലോഷൻ പുരട്ടുന്നുണ്ട്. ലോഷൻ പുരട്ടിത്തുടങ്ങിയതോടെ മുടികൊഴിച്ചിൽ നിന്നു. എന്നാൽ ലോഷൻ പുരട്ടുന്നത് നിർത്തിയതോടെ വീണ്ടും മുടി കൊഴിഞ്ഞു തുടങ്ങി.

ഉത്തരം: ഫിനോസ്ട്രോയിഡ് ലോഷൻ ഉപയോഗിക്കുമ്പോൾ മുടി കൊഴിച്ചിൽ നിലയ്ക്കുന്നു. നിർത്തുമ്പോൾ വീണ്ടും മുടി കൊഴിഞ്ഞു തുടങ്ങുന്നു. ഇങ്ങനെ പ്രശ്നമുള്ള സ്ഥിതിക്ക് ഒരിക്കൽക്കൂടി ചർമ്മരോഗ വിദഗ്‌ധനെ കണ്ട് വേണ്ട ഉപദേശം തേടുക. ഡോക്ടറുടെ നിർദ്ദേശമനുസരിച്ചുള്ള മരുന്നുകൾ കഴിക്കുകയും വേണം. ഭക്ഷണ കാര്യങ്ങളിൽ കൂടുതൽ ജാഗ്രത പുലർത്തുക. ഭക്ഷണം പോഷക സമ്പുഷ്ടമായിരിക്കണം.

ചോദ്യം: എനിക്ക് 51 വയസ്സുണ്ട്. കുറേ നാളുകളായി വളരെ നിസ്സാര കാര്യത്തിൽപ്പോലും ദേഷ്യം വരുന്നു. ചില വസ്‌തുക്കൾ എവിടെയാണ് വെച്ചതെന്നുപോലും മറന്നു പോകുന്നു. ചിലപ്പോൾ ഒരേ വസ്തുതന്നെ പലയാവർത്തി പരിശോധിച്ച് ഉറപ്പുവരുത്തേണ്ടി വരും. ഉദാ: വീട് ലോക്ക് ചെയ്താലും ലോക്ക് ചെയ്തോ, ഇല്ലയോ എന്ന സംശയമായിരിക്കും. എന്തുകൊണ്ടാണ് ഇങ്ങനെ സംഭവിക്കുന്നത്?

ഉത്തരം: ഇത് വിഷാദത്തിന്‍റെ ഒരു ലക്ഷണമാണ്. ഈ സാഹചര്യം മനസ്സിന്‍റെ ഏകാഗ്രതയെ ദോഷകരമായി സ്വാധീനിക്കുന്നതുകൊണ്ടാണ് ഓർമ്മശക്തിയിലും പ്രതികുലമായ മാറ്റങ്ങളുണ്ടാകുന്നത്. അതുകൊണ്ട് ഏതെങ്കിലും മനോരോഗവിദഗ്‌ധനെ കണ്ട് ഇതിനുള്ള ചികിത്സ തേടേണ്ടതാണ്. സ്വന്തം സുഖദുഃഖങ്ങളെക്കുറിച്ചും അസ്വസ്‌ഥതകളെക്കുറിച്ചും മനോവികാരങ്ങളെക്കുറിച്ചും ഏറ്റവും അടുപ്പമുള്ളവരുമായി പങ്കുവയ്ക്കുന്നതും ഗുണം ചെയ്യും.

സ്വന്തം നേട്ടങ്ങളെക്കുറിച്ചും നല്ല കാര്യങ്ങളെക്കുറിച്ചും അഭിമാനപൂർവ്വം ഓർക്കാൻ ശ്രമിക്കുക. ജീവിതത്തെക്കുറി ച്ച് പോസിറ്റീവായി ചിന്തിക്കുക. ചെയ്യാൻ പോകുന്ന പ്രവൃത്തി അശുഭമാകും, ഫലവത്താവില്ല എന്നിങ്ങനെയുള്ള ചിന്തകൾ പാടില്ല. കഴിവതും പിരിമുറുക്കമുണ്ടാക്കുന്ന സാഹചര്യങ്ങൾ ഒഴിവാക്കുക. എന്നും വ്യായാമം ചെയ്യുക. പോഷകസമ്പുഷ്ടമായ ഭക്ഷണം കഴിക്കുക. കുടുംബത്തോടും കൂട്ടുകാരോടുമൊപ്പം വിനോദയാത്രയ്ക്ക് പോവുകയോ അവരോട് സംസാരിക്കുകയോ ചെയ്യുക. പതിയെപ്പതിയെ നിങ്ങളുടെ ഭീതി അകന്നുകിട്ടും.