സമൃദ്ധിയുടെയും പ്രതീക്ഷയുടെയും ഒരു വിഷുക്കാലം കൂടി കടന്നു വന്നിരിക്കുകയാണ്. വിഷു എന്ന് കേൾക്കുമ്പോൾ കായത്തിന്‍റെ മണം പരക്കുന്ന സാമ്പാറും കറിവേപ്പിലയുടെയും വെളിച്ചെണ്ണയുടെയും രുചിയുണർത്തുന്ന അവിയലുമൊക്കെയാവും നമ്മുടെ ഓർമ്മകളിൽ ആദ്യം ഓടിയെത്തുക. എന്നാൽ ഇത്തവണ വിഷുവിന് വിളമ്പാൻ അൽപം വ്യത്യസ്തമായി വിഭവങ്ങൾ ഒരുക്കിയാലോ. പാലക്കാടൻ സദ്യയിലെ സുപരിചിതമായ പരമ്പരാഗത രുചിപ്പെരുമ പേറുന്ന ഈ നാടൻ വിഭവങ്ങൾ തീർച്ചയായും എല്ലാവരും ഇഷ്ടപെടും. സ്വാദും തനിമയും ഒത്തുചേർന്ന ഈ കറികൾ നടൻ ചേരുവകൾ ഉപയോഗിച്ചാണ് തയ്യാറാക്കുക.
വെള്ളരിക്കയും പച്ചമാങ്ങയും കറി
ചേരുവകൾ
മൂത്തവെള്ളരി – അരക്കിലോ
മൂത്ത പച്ച മാങ്ങ – 1 (100 ഗ്രാം)
ഒരു തേങ്ങ ചിരകിയത്
ജീരകം – 1 ടീസ്പൂൺ
മഞ്ഞൾപൊടി – ഒരു ടീസ്പൂൺ
ഉലുവ – അര ടീസ്പൂൺ
ചുവന്ന മുളക് – എരിവിന് അനുസരിച്ച്
ശർക്കര (വേണമെങ്കിൽ ചേർക്കാം)
കടുക്, മുളക്, കറിവേപ്പില (വറവിടാൻ )
ഉപ്പ് പാകത്തിന്
തയ്യറാക്കുന്ന രീതി
വെള്ളരിക്ക ചെറുതാക്കി നുറുക്കി വേവാൻ പാകത്തിന് വെള്ളം ഒഴിച്ച് മഞ്ഞൾപൊടിയിട്ട് അടച്ച് വേവിക്കുക. മുക്കാൽ ഭാഗം വെന്താൽ അതിലേക്ക് മാങ്ങ തോല് കളഞ്ഞ് ചെറുതാക്കി നുറുക്കി ചേർക്കുക. പാകത്തിന് ഉപ്പും ഇട്ട് മാങ്ങ കൂടി വേവുന്ന വരെ തിളപ്പിക്കുക. നല്ലവണ്ണം വെന്ത് കഴിഞ്ഞാൽ, അതിലേക്ക് ചിരകി വച്ച തേങ്ങയും ഒരു ടീസ്പൂൺ ജീരകവും, ചേർത്ത് നന്നായി അരച്ച് തിളയ്ക്കുന്ന കഷണത്തിൽ ചേർക്കുക. നല്ലവണ്ണം തിളച്ചാൽ ശർക്കര വേണമെങ്കിൽ ഒരു കഷണം ഇടാം. വാങ്ങിവെച്ച ശേഷം വറവ് ഇട്ട് ചൂടോടെ ഉലുവപ്പൊടി ചേർത്ത് അടച്ച് വയ്ക്കുക. കറി തയ്യാർ.
ചക്ക എരിശേരി
ചേരുവകൾ
മൂത്ത ചക്ക- (50gm വൃത്തിയാക്കിയെടുത്തത് )
മഞ്ഞൾ പൊടി- 1 ടീസ്പൂൺ
കുരുമുളക് പൊടി- 2 ടീസ്പൂൺ (എരിവിന് അനുസരിച്ച്)
നല്ലജീരകം – 1 ടീസ്പൂൺ
തേങ്ങ ചിരകിയത് (വലുത് )- 1 മുറി
തേങ്ങ ചിരകിയത്- ഒരു മുറിയുടെ പകുതി
ഉപ്പ് പാകത്തിന്
വെള്ളം ആവശ്യത്തിന്
നെയ്യ്- 1 ടേബിൾ സ്പൂൺ
തയ്യാറാക്കുന്ന രീതി
മൂത്ത ചക്ക ചെറുതാക്കി നുറുക്കിയത് നികക്കെ വെള്ളമൊഴിച്ച് തിളച്ച് തുടങ്ങുമ്പോൾ മഞ്ഞൾ പൊടിയും കുരുമുളക് പൊടിയും ഇടുക. അതിന് ശേഷം അടച്ച് വേവിക്കുക. വെന്താൽ ഉപ്പ് ചേർക്കുക.
ഉപ്പ് ചക്കയിൽ പിടിച്ചാൽ തീ കുറച്ചിട്ട്, ചിരകി വച്ച ഒരുമുറി തേങ്ങയും ഒരു ടീസ്പൂൺ ജീരകവും ചേർത്ത് മിനുസമായി അരയ്ക്കണം. അരപ്പ് ചക്കയിൽ ചേർത്ത് തിളച്ചാൽ വാങ്ങി വച്ച് അതിലേക്ക് ഒരു മുറി തേങ്ങയുടെ പകുതി മാറ്റി വച്ചത് വെള്ളം ചേർക്കാതെ ഒന്ന് പൊടിച്ച്, ഒരു ടേബിൾ സ്പൂൺ നെയ്യ് ഒഴിച്ച് നല്ല ബ്രൗൺ കളറിൽ വറുത്ത്, അരപ്പ് ചേർത്ത് തിളച്ച ചക്കയിലേക്ക് ചേർത്ത് വാഴ ഇല കൊണ്ട് അടച്ച് വയ്ക്കുക. രുചികരമായ ചക്ക എരിശ്ശേരി റെഡി.
വറുത്തരച്ച സാമ്പാർ
ചേരുവകൾ
ഇളവൻ- 100 ഗ്രാം
(ഉള്ളി, ക്യാരറ്റ്, വഴുതന, കൈപ്പക്ക എന്നീ പച്ചക്കറികളും വേണമേങ്കിൽ ചേർക്കാം)
തക്കാളി- രണ്ടെണ്ണം,
വെണ്ടയ്ക്ക- നാലെണ്ണം
മുരിങ്ങാക്കായ്- രണ്ടെണ്ണം
തുവരപ്പരിപ്പ്-അൻപത് ഗ്രാം
പുളി- ഒരു നെല്ലിക്ക വലിപ്പത്തിൽ ഉരുള എടുത്ത് വെള്ളത്തിൽ ഇട്ടു വയ്ക്കണം
കായം- രണ്ട് ടീസ്പൂൺ
വറവിനായി
മല്ലി- മൂന്ന് ടേബിൾ സ്പൂൺ
ഉലുവ- രണ്ട് ടീസ്പൂൺ
ചുവന്ന മുളക് എരിവ് പാകത്തിന്
തുവരപ്പരിപ്പ്- ഒരു ടേബിൾ സ്പൂൺ
ഒരു മുറി തേങ്ങ -ചിരകിയത്
തയ്യാറാക്കുന്ന രീതി
വറവിനുള്ള ചേരുവകൾ ഒരോന്നായി വറുക്കണം, തേങ്ങ ബ്രൗൺ കളറിൽ വറുക്കണം. തണുത്തശേഷം വറുത്തുവെച്ച കൂട്ടുകളെല്ലാം ചേർത്ത് നന്നായി അരയ്ക്കുക.
പരിപ്പും തുവരപ്പരിപ്പും ഇളവനും കൂടി വേവിക്കുക. കുക്കറിൽ ആണെങ്കിൽ രണ്ടും ഒപ്പം വേവിക്കാം. അതിനുശേഷം തക്കാളി, വെണ്ടയ്ക്ക, മുരിങ്ങക്ക എന്നിവ ഇളവനും പരിപ്പിനും ഒപ്പം വേവിക്കുക. അതോടൊപ്പം തന്നെ പുളി വെള്ളം ഒഴിക്കണം. തിളച്ചു കഴിഞ്ഞാൽ അരപ്പ് തിളയ്ക്കുന്ന കഷണത്തിൽ ചേർക്കുക. നല്ലവണ്ണം തിളച്ചു കഴിഞ്ഞാൽ രണ്ട് ടീസ്പൂൺ കായപ്പൊടി അല്ലെങ്കിൽ കട്ടക്കായം ഒരു ചെറിയ കഷണം അതിലേക്ക് ഇട്ട് ഇളക്കി വാങ്ങി വയ്ക്കുക. ഒടുവിൽ കടുകും കറിവേപ്പിലയും മുളകും വെളിച്ചെണ്ണയിൽ മൂപ്പിച്ച് സാമ്പാറിൽ ചേർക്കുക.
കടപ്പാട് – ശ്രീല നല്ലേടം
