അടുക്കള ജോലി എളുപ്പമാക്കാൻ ഇത് ചെയ്യൂ

അടുക്കളയിൽ കയറുമ്പോൾ പണികൾ എളുപ്പമാക്കാൻ കുറച്ചു വിദ്യകൾ പഠിച്ചു വെയ്ക്കാം. സാമ്പാറിൽ വെള്ളം കൂടിപ്പോയാലും പഴയ കറി ചൂടാക്കി ഉപയോഗിക്കേണ്ടി വന്നാലും ഇങ്ങനെയൊക്കെ കാര്യം റെഡി ആക്കാം. അറിഞ്ഞിരിക്കാം ചില കിച്ചൻ ടിപ്‌സ്.

• സാമ്പാർ ഫ്രിഡ്ജിൽ നിന്നെടുത്തു ചൂടക്കുമ്പോൾ അൽപം കടുക് താളിച്ചു ചേർത്താൽ കറിക്കു പുതുമ തോന്നും.
• ക്യാരറ്റിന്‍റെ അറ്റത്തു പച്ചപ്പ് മുള ഉണ്ടെങ്കിൽ ആ ഭാഗം ചെത്തിക്കളഞ്ഞു വെള്ളത്തിൽ ഇട്ട് വയ്ക്കുക ഇല വളർന്നു വരും. അത് സലാഡിൽ ഉപയോഗിക്കാം.
• പച്ചക്കറികൾ വേവിക്കുന്ന വെള്ളം ഉപ്പുമാവ് ചപ്പാത്തി പുട്ട് ഇവ തയ്യാറാക്കാൻ ഉപയോഗിക്കാം. പോഷക സമ്പന്നമാണ്.
• മോര് കറി, തേങ്ങ ചേർത്ത കറി ഇവ രണ്ടാമത് ചൂടാക്കുമ്പോൾ നേരെ അടുപ്പത്തു വെയ്ക്കരുത്. മോര് കറി പാത്രം തിളയ്ക്കുന്ന വെള്ളത്തിൽ ഇറക്കി വെച്ചാൽ മതി. കറിക്ക് സ്വാദ് വർദ്ധിക്കും.
• പാത്രത്തിലെ മുട്ടയുടെ ഉളുമ്പു മണം മാറാൻ പാത്രം കടലമാവും ചൂട് വെള്ളവും ഉപയോഗിച്ച് കഴുകി നോക്കു. നാരകത്തിന്‍റെ ഇല കൊണ്ട് ഉരച്ചു കഴുകിയാലും ഉളുമ്പു മണം പോകും.
• എണ്ണ മയമുള്ള പാത്രം നാരങ്ങാനീരു കൊണ്ട് തുടച്ച ശേഷം ചൂട് വെള്ളത്തിൽ കഴുകിയാൽ കൂടുതൽ വൃത്തിയും തിളക്കവും ലഭിക്കും.
• വറുത്തരച്ച കറികളിൽ അല്പം ശർക്കര ചേർത്താൽ രുചി കൂടും.
• സാമ്പാറിൽ വെള്ളം കൂടിപ്പോയാൽ അല്പം അരിപ്പൊടി ചേർത്താൽ മതി.
• പായസം ഉണ്ടാക്കുമ്പോൾ മധുരം ചേർക്കുന്നതിനൊപ്പം ഒരു നുള്ള് ഉപ്പും ചേർത്താൽ കൂടുതൽ സ്വാദ് തോന്നും.