വൃക്കയും കണ്ണും
വൃക്കയുമായി ബന്ധപ്പെട്ട രോഗങ്ങൾ പ്രവർത്തനത്തിലെ മാന്ദ്യം ഇവ കണ്ണുകളുടെ കാഴ്ച കുറച്ചേക്കാം. ഇത്തരം അവസ്‌ഥ ഉണ്ടെങ്കിൽ ഡോക്ടറെ കണ്ടു മരുന്നു വാങ്ങുകയാണ് ആദ്യം ചെയ്യേണ്ടത്. കണ്ണട വച്ച് കാഴ്ച ശരിയാക്കുന്നത് അതിനു ശേഷം മതിയാകും. കിഡ്നി രോഗങ്ങൾ യഥാവിധി ചികിത്സിച്ചു മാറ്റിയില്ലെങ്കിൽ കണ്ണിന്‍റെ കാഴ്ചയും ക്രമേണ ഇല്ലാതാകും. പ്രത്യേകിച്ചും ലാസ്റ്റ് സ്റ്റേജിലുള്ള വൃക്കരോഗികൾക്ക് മിക്കവാറും കണ്ടുവരുന്ന പ്രശ്നമാണിത്.
കിഡ്നി രോഗങ്ങൾ പെട്ടെന്നൊരു ദിവസം കൊണ്ട് പിടിപ്പെടുന്നവയല്ല. ഭൂരിഭാഗം പേരിലും തെറ്റായ ജീവിതശൈലിയിൽ നിന്ന് ഉടലെടുക്കുകയാണ് ചെയ്യുന്നത്. ചിലരിൽ ജന്മനാലുള്ള പ്രത്യേകതകൾ നിമിത്തം കിഡ്നി ഫെയ്‍ലിയർ കണ്ടുവരാറുണ്ട്. രോഗങ്ങൾ ഉണ്ടെങ്കിൽ സാധാരണ കണ്ടുവരാറുള്ള ചില ലക്ഷണങ്ങൾ ഇതൊക്കെയാണ്.
ക്ഷീണം
നല്ല ഭക്ഷണം കഴിച്ചിട്ടും എപ്പോഴും ക്ഷീണവും തളർച്ചയും അനുഭവപ്പെടുന്നുണ്ടെങ്കിൽ വൃക്കരോഗങ്ങൾ ഉണ്ടോ എന്നു പരിശോധിക്കണം. വൃക്ക ശരിയായി പ്രവർത്തിക്കുന്നില്ല എങ്കിൽ രക്തത്തിൽ ടോക്സിനുകൾ വർദ്ധിച്ചു വരും. ഇത് തളർച്ചയുണ്ടാകും. മൂത്രമൊഴിക്കുന്നതിലെ തടസ്സവും ഉറക്കത്തിൽ വൈഷമ്യവും ഇപ്രകാരം ടോക്സിനുകൾ വർദ്ധിക്കുമ്പോൾ കിഡ്നിയുടെ ക്ലിനിംഗ് പ്രക്രിയ തകരാറിലാവുന്നു. ശരീരത്തിൽ നിന്ന് മൂത്രം പുറന്തള്ളാൻ കഴിയാതെ വരികയും ഉറക്കം നഷ്ടമാവുകയും ചെയ്യുന്നു. വൃക്ക രോഗമുണ്ടെങ്കിൽ ഏറ്റവും പ്രധാന ലക്ഷണമാണ് മൂത്രം ഒഴിക്കാൻ പ്രയാസം നേരിടുന്നത്. ദിവസവും നിരവധി തവണ മൂത്രമൊഴിക്കണമെന്ന് തോന്നുകയും മൂത്രം കാര്യമായി പോകാതിരിക്കുകയും ചെയ്താൽ ഡോക്ടറെ തീർച്ചയായും കാണണം. പല കാരണങ്ങൾ കൊണ്ട് ഇത്തരം തടസ്സങ്ങൾ ഉണ്ടാകാം. അതിൽ പ്രധാനപ്പെട്ട ഒരു കാരണമാണ് കിഡിനി ഫെയ്‍ലിയർ. ശരീരത്തിൽ നിന്ന് മൂത്രം പുറന്തള്ളുന്ന പ്രക്രിയ നിയന്ത്രിക്കുന്നത് വൃക്കകളാണ്. മൂത്രത്തിന്‍റെ നിറം, ഗന്ധം ഇവ പരിശോധിച്ചാൽ വൃക്കരോഗങ്ങൾ ഉണ്ടോ എന്ന് മനസ്സിലാക്കാൻ കഴിയും. മൂത്രമൊഴിക്കുമ്പോൾ ധാരാളം പത കണ്ടാൽ ഡോക്ടറെ സന്ദർശിച്ച് പറയുക.
കണ്ണും ചർമ്മവും
വൃക്കയുടെ പ്രവർത്തന പരാജയത്തിന്‍റെ ദൂഷ്യഫലങ്ങൾ പ്രകടമായി കാണാൻ കഴിയുന്ന രണ്ടു ഭാഗങ്ങളാണ് കണ്ണും ചർമ്മവും. അതിന്‍റെ ലക്ഷണങ്ങളിലൊന്നാണ് കണ്ണിലും തൊലിപ്പുറമേയും കാണുന്ന ചൊറിച്ചിൽ. കണ്ണുകൾക്ക് ചുവപ്പ് നിറവും ഉണ്ടാകാം. അലർജിയുടെയും അണുബാധയുടെയോ ലക്ഷണമായി കണ്ണുചൊറിച്ചിലും ചുവപ്പും കണ്ടുവരാറുണ്ട്. എന്നാൽ കിഡ്നി രോഗമുള്ളവർക്കും ഇതേ ലക്ഷണം കാണാറുണ്ട്. കണ്ണിനു വേദനയും അനുഭവപ്പെടാം.
കണ്ണുകളുടെ വരൾച്ച
കണ്ണ് വരണ്ടിരിക്കുക എന്ന അവസ്‌ഥയും വൃക്കരോഗികളിൽ സംഭവിക്കാറുണ്ട്. ഇത് വളരെ സങ്കീർണ്ണമായ ഒരു ലക്ഷണമാണ്. കണ്ണുകൾ തിരുമ്മിയാൽ വീണ്ടും ഡ്രൈ ആകും. വരണ്ട കണ്ണുകൾ നിമിത്തവും കാഴ്ചശക്തി കുറയും. കിഡ്നി യഥാവിധി പ്രവർത്തിക്കാതെ വരുമ്പോൾ കണ്ണിൽ കാത്സ്യവും ഫോസ്ഫേറ്റും അടിയുന്നു. അങ്ങനെ കണ്ണിന് വരൾച്ച ഉണ്ടാകുന്നു. വരണ്ട കണ്ണുകളിൽ ചെറിയ മുറിവുകൾ രൂപപ്പെടാനും സാധ്യത കൂടുതലാണ്. കണ്ണ് കലങ്ങിയിരിക്കുന്നതു പോലെ തോന്നുകയും ചെയ്യും. കോർണിയയിലും വെളുത്ത ഭാഗത്തും എല്ലാം പരിക്കുകൾ സംഭവിക്കുന്നു.
റെറ്റിനോപതി
വൃക്കരോഗികളിൽ കണ്ടുവരുന്ന മറ്റൊരു കണ്ണ് രോഗമാണിത്. കാഴ്ച മങ്ങുന്നതാണ് ഒരു പ്രധാന ലക്ഷണം. കണ്ണിന്‍റെ കാഴ്ച കുറയുകയോ, മൂത്രം പോകുന്നതിൽ വ്യത്യാസം തോന്നുകയോ ചെയ്താൽ വൃക്കരോഗം ഉണ്ടോ എന്ന് പരിശോധിച്ച് ഉറപ്പു വരുത്തുകയാണ് ആദ്യം ചെയ്യേണ്ടത്.
– ഡോ. പിഎൻ ഗുപ്ത
ചീഫ് നെഫ്രോളജി, പാരസ് ഹോസ്പിറ്റൽ
