ചോദ്യം:
പ്ലസ് വൺ വിദ്യാർത്ഥിനിയാണ് ഞാൻ. പഠന കാര്യങ്ങളിൽ വളരെ ശ്രദ്ധ പുലർത്താറുണ്ട്. ഒരു വിട്ടുവീഴ്ച‌യും ചെയ്യാറില്ല. അതു കൊണ്ട് പരീക്ഷയെച്ചൊല്ലി ഞാനൊരിക്കലും ഭയന്നിട്ടില്ല. എന്നാൽ അടുത്തിടെയായി ഞാനാകെ അസ്വസ്‌ഥയാണ്. പരീക്ഷ അടുത്തുവരുന്തോറും ഒരു ഭയം. എനിക്കൊന്നും എഴുതാൻ കഴിയില്ലെന്ന തോന്നൽ. ഇങ്ങനെ മുമ്പൊരിക്കലും സംഭവിച്ചിട്ടില്ല. എനിക്കെന്തെങ്കിലും മാനസികമായ അസുഖമായിരിക്കുമോ? ഇങ്ങനെ പോയാൽ പരീക്ഷയിൽ തോറ്റുപോകുമോ എന്നാണെന്‍റെ പേടി. എന്‍റെ പ്രശ‌നത്തിനൊരു പരിഹാരം നിർദ്ദേശിക്കാമോ?
ഉത്തരം:
കുട്ടി വളരെ ചഞ്ചലചിത്തയാണെന്ന് തോന്നുന്നു. ഈ സമയത്ത് റിലാക്സേഷനാണ് വേണ്ടത്. പരീക്ഷാ വേളകളിൽ ചില കുട്ടികളിൽ സംഭവിക്കുന്ന ഒരു പ്രശ്നം മാത്രമാണിത്. പഠിച്ചതൊക്കെ മറന്നു പോകുന്നുവെന്ന തോന്നലുണ്ടാവുന്ന സമയത്ത് കുറച്ചുനേരം പഠനം നിർത്തി റിലാക്സ‌് ചെയ്യാൻ ശ്രമിക്കുക. ഇഷ്ട്‌ടമുള്ള പാട്ട് കേൾക്കുകയോ, കുറച്ചുനേരം ഉലാത്തുകയോ, വ്യായാമം ചെയ്യുകയോ ചെയ്യാം. റിലാക്സേഷൻ പകരുന്ന ധാരാളം വ്യായാമങ്ങളുണ്ട്. ബോർഡ് പരീക്ഷ മറ്റേത് സാധാരണ പരീക്ഷപോലെയുള്ളുവെന്ന് മനസ്സിനെ ബോധ്യപ്പെടുത്തുക. അങ്ങനെയാണെങ്കിൽ എപ്പോഴത്തേയും പോലെ നിങ്ങൾക്ക് നല്ല വിജയം ഉണ്ടാകും. കടുത്ത മാനസിക സമ്മർദ്ദത്തിലാണ് നിങ്ങളെങ്കിൽ ഏതെങ്കിലും കൗൺസലിംഗ് സെന്‍ററിന്‍റെ സഹായം തേടാം. പ്രശ്‌നങ്ങൾ അച്ഛനമ്മമാരോട് തുറന്നു പറഞ്ഞുകൂടെ, ടെൻഷൻ തീർച്ചയായും മാറിക്കിട്ടും. നല്ല ആത്മവിശ്വാസത്തോടെ കാര്യങ്ങളെ സമീപിക്കുക.
ചോദ്യം:
24 വയസ്സുള്ള യുവതിയാണ് ഞാൻ. മൂന്ന് സഹോദരന്മാരുടെ ഒരേയൊരു പെങ്ങളാണ്. അതുകൊണ്ട് എല്ലാവർക്കും എന്നെ ജീവനാണ്. എന്‍റെ കാര്യത്തിൽ അവർ വളരെ ജാഗരൂകരാണ്. ഈ അമിതമായ ശ്രദ്ധയാണ് എന്‍റെ ഏറ്റവും വലിയ പ്രശ്നവും.
എനിക്ക് എങ്ങും തനിച്ച് പോകാനോ വരാനോ അനുവാദമില്ല. സ്വന്തമിഷ്ടം അനുസരിച്ച് ഒന്നും ചെയ്യാനും കഴിയുന്നില്ല. വീട്ടുതടങ്കലിലെന്നപോലെയാണ് എന്‍റെ ജീവിതം.
ഇപ്പോൾ വീട്ടിൽ എനിക്കുവേണ്ടി വിവാഹമാലോചിക്കുകയാണ്. ഭർത്താവും എന്നോട് ഇതുപോലെയാണ് പെരുമാറുന്നതെങ്കിൽ ഞാൻ മറ്റെവിടേക്കെങ്കിലും ഒളിച്ചോടും. അതുകൊണ്ട് എനിക്ക് വിവാഹത്തോട് ഒട്ടും താലപര്യം തോന്നുന്നില്ല.
ഉത്തരം:
വീട്ടുകാർ പ്രത്യേകിച്ച് സഹോദരങ്ങൾ നിങ്ങളെ അങ്ങേയറ്റം സ്നേഹിക്കുന്നുണ്ടെന്ന് സമ്മതിക്കുന്നുണ്ട്. സ്നേഹമുള്ളതുകൊണ്ടാണ് അവർ അങ്ങേയറ്റം കരുതൽ പുലർത്തുന്നത്. അവരുടെ കരുതലും സ്നേഹവും നിങ്ങളുടെ അവകാശമാണെന്ന് ഓർക്കണം. പക്ഷേ, വീട്ടുകാരുടെ ഈ സ്നേഹവായ്‌പ് നിങ്ങൾ തടങ്കലായി കരുതുന്നു.
വിവാഹശേഷമുള്ള ജീവിതത്തെക്കുറിച്ച് നിങ്ങൾ മുൻധാരണകൾ വെച്ചു പുലർത്താൻ പാടില്ല. സഹോദരങ്ങളുടെ ശ്രദ്ധയുണ്ടെങ്കിലും അവരുടെ സാന്നിധ്യത്തിൽ സ്വന്തം കാര്യങ്ങളും ഉത്തരവാദിത്തങ്ങളും സ്വയമേറ്റെടുത്ത് ചെയ്‌ത്‌ ശീലിക്കുക. അവരുടെ സമ്മതത്തോടെ കുറച്ചൊക്കെ തനിച്ച് യാത്ര ചെയ്യുക. ഏതുകാര്യത്തിലും സുതാര്യമായ സമീപനം ആവശ്യമാണ്. പോസിറ്റീവായ ചിന്തയാണ് ആവശ്യം. സുന്ദരമായ ഭാവിജീവിതം സ്വ‌പ്നം കാണുക.
ചോദ്യം:
26 വയസ്സുള്ള യുവാവാണ്. അടുത്തിടെയായി ഞാനൊരു പ്രശ്നം നേരിടുകയാണ്. മുമ്പ് ഏതെങ്കിലും പെൺകുട്ടിയെക്കുറിച്ച് ഓർക്കുകയോ സ്‌പർശിക്കുകയോ ചെയ്യുന്ന മാത്രയിൽ എന്നിൽ ലൈംഗികവികാരമുണരുമായിരുന്നു. ഇപ്പോൾ അങ്ങനെയൊരു തോന്നൽ എനിക്കുണ്ടാകാറില്ല. ഇത് എന്‍റെ ശരീരത്തിന്‍റെ എന്തെങ്കിലും കുഴപ്പമാകുമോ? കുറച്ചുനാൾ മുമ്പ് ഒരു സുഹൃത്ത് പറഞ്ഞതനുസരിച്ച് 40- 50 വിറ്റാമിൻ ഇ1 ടാബ്‌ലറ്റ് കഴിച്ചിരുന്നു. ഇക്കാരണത്താലാവുമോ എനിക്കീ പ്രശ്ന‌മുണ്ടായത്? സോണോഗ്രാഫിയും രക്തപരിശോധനയും നടത്തിയിരുന്നു. എല്ലാം നോർമലാ ണ്. എന്‍റെ ഭാവി ജീവിതത്തെ ഇത് ബാധിക്കുമോ?
ഉത്തരം:
നിങ്ങൾക്ക് ശാരീരികമായി ഒരു പ്രശ്നവുമില്ല. പൂർണ്ണമായും നോർമലും ആരോഗ്യവാനുമാണ്. ഇതൊക്കെ മനസ്സിന്‍റെ വെറും തോന്നലുകൾ മാത്രമാണ്. അതേക്കുറിച്ച് മാത്രം ചിന്തിച്ചിരിക്കാതെ മറ്റ് കാര്യങ്ങളെക്കുറിച്ച് ചിന്തിക്കുക. മറ്റ് എന്തെല്ലാം കാര്യങ്ങളുണ്ടാവും ചെയ്യാനായി. അനാവശ്യമായ ചിന്തകൾ വെടിഞ്ഞ് ജീവിതത്തിൽ ചെയ്യാനുള്ളതിനെപ്പറ്റി ചിന്തിക്കുക.
ചോദ്യം:
38 വയസ്സുള്ള വിവാഹിതയാണ്. വിവാഹം കഴിഞ്ഞിട്ട് 15 വർഷമായി. 14 വയസ്സുള്ള ഒരു മകളുണ്ട്. ഭർത്താവ് സർക്കാർ സർവീസിൽ ഉയർന്ന ഉദ്യോഗസ്ഥനാണ്. ഇതുവരെ ഞങ്ങൾക്ക് സ്വന്തമായി ഒരു വീടുണ്ടാക്കാനായിട്ടില്ല. ഭർത്താവ് അത്തരം കാര്യങ്ങളിൽ പ്രാക്ടിക്കലായി ചിന്തിക്കാറില്ലെന്നതാണ് കാര്യം. മാത്രമല്ല, മറ്റ് സമ്പാദ്യങ്ങളുമില്ല. അതേക്കുറിച്ച് അദ്ദേഹം ചിന്തിക്കാറു പോലുമില്ല. എന്‍റെയോ മകളുടെയോ കാര്യത്തിൽ യാതൊരു ശ്രദ്ധയും താല്‌പര്യവും ഇല്ല തന്നെ. എനിക്കിപ്പോൾ മകളുടെ ഭാവിയെ കുറിച്ചോർത്താണ് വേവലാതി.
ഉത്തരം:
ഭർത്താവിന്‍റെ ഉത്തരവാദിത്തമില്ലായ്മയെച്ചൊല്ലി വേദനിച്ചിട്ട് കാര്യമില്ല. അദ്ദേഹത്തിൽ ഇനിയെന്തെങ്കിലും മാറ്റമുണ്ടാവുമെന്ന കാര്യം സംശയമാണ്. അതുകൊണ്ട് ആ സാഹചര്യവുമായി പൊരുത്തപ്പെടുകയല്ലാതെ മറ്റ് പോംവഴികളൊന്നുമില്ല. ഉത്തരവാദിത്തങ്ങൾ നിങ്ങൾ സ്വയമേറ്റെടുക്കുകയാണ് വേണ്ടത്. മകളെ വളർത്തുന്നതിനുള്ള ഉത്തരവാദിത്തം സ്വയമേറ്റെടുക്കുക കയ്യിൽ കിട്ടുന്ന പണത്തിൽ നിന്നും കുറച്ചൊക്കെ മിച്ചം പിടിച്ച് സമ്പാദ്യപദ്ധതികളിൽ നിക്ഷേപിക്കുക. കുറച്ചുകഴിയുന്നതോടെ ഭർത്താവിൽ മാറ്റമുണ്ടാവാം. വീടു നിർമ്മിക്കുന്നതിനെപ്പറ്റി വീട്ടിൽ ചർച്ചചെയ്യുക. ഭർത്താവിന് അടുപ്പം തോന്നിത്തുടങ്ങാൻ ഇത്തരം ചർച്ചകൾ സഹായിക്കാം. ശുഭപ്രതീക്ഷ കൈവെടിയാതിരിക്കുക. അതാണ് പ്രധാനം.
