ചോദ്യം
എന്‍റെ അഞ്ചു വയസ്സുള്ള മകൾ യാത്ര ചെയ്യുമ്പോൾ അസ്വസ്ഥത പ്രകടിപ്പിക്കുന്നു. കുറച്ചുദൂരം സഞ്ചരിച്ചാൽ മതി അവൾ ഛർദ്ദിക്കാൻ തുടങ്ങും. ഇതിനെന്താണ് പരിഹാരം?
ഉത്തരം
കുട്ടികളിൽ ട്രാവൽ സിക്നെസ്സ് ഉണ്ടാകുന്നത് വളരെ സാധാരണമാണ്. ചെവിയ്ക്കകത്തുള്ള സെമി സർക്കുലർ കനാലിലുണ്ടാകുന്ന അസ്വസ്‌ഥതകളാണ് ഇതിന് കാരണം. ഇത് ഒഴിവാക്കാൻ സഹായകമായ മരുന്നുകൾ ലഭ്യമാണ്. എന്നാൽ അവ കഴിക്കുമ്പോൾ ക്ഷീണമുണ്ടാകാം.
ചോദ്യം
62 വയസ്സുള്ള റിട്ടയേർഡ് അധ്യാപകനാണ് ഞാൻ. 2004ൽ ബൈപാസ് സർജറി നടത്തിയിരുന്നു. അതു കഴിഞ്ഞ് വലിയ പ്രശ്നങ്ങളൊന്നും ഉണ്ടായിരുന്നില്ല. എന്നാൽ രണ്ടുമാസമായി എനിക്ക് ശ്വാസം മുട്ടൽ അനുഭവപ്പെടുന്നു. പരിശോധനയിൽ ഗ്രാഫ്റ്റ് ചെയ്തിരിക്കുന്ന ഞരമ്പുകളിൽ തടസ്സമുള്ളതായി കണ്ടു. വീണ്ടും ആൻജിയോഗ്രാഫി ചെയ്യണമെന്നാണ് പറയുന്നത്. എന്നാൽ ഈ ചികിത്സ നടത്തുന്നതിനുള്ള മാനസികാവസ്‌ഥയിലല്ല ഞാൻ.
ഉത്തരം
താങ്കൾക്ക് അത്ര പ്രായമായിട്ടില്ലല്ലോ. കൊറോണറി ധമനികൾ അല്ലെങ്കിൽ ഗ്രാഫ്റ്റ് ചെയ്ത ഞരമ്പുകൾ സങ്കോചിക്കുന്നതായി കാണപ്പെടുകയാണെങ്കിൽ വീണ്ടും വിദഗ്‌ധ ചികിത്സ നടത്തുന്നതായിരി ക്കും ഉചിതം.
ധൈര്യം കൈവെടിയാതിരിക്കുക. വീണ്ടും ആൻജിയോ പ്ലാസ്‌റ്റി ചെയ്യേണ്ടി വരികയാണെങ്കിൽ അത് ചെയ്യുന്നതല്ലേ നല്ലത്. നല്ലൊരു കാർഡിയോളജിസ്‌റ്റിനെ കണ്ട് ചികിത്സ നടത്തുക.
ചോദ്യം
15 വയസ്സുള്ള വിദ്യാർത്ഥിനിയാണ് ഞാൻ. എനിക്ക് സുസ്മ‌ിത സെന്നിന്‍റെയത്ര പൊക്കം വേണമെന്നാണ് ആഗ്രഹം. ഉയരം കുട്ടാൻ ഞാൻ എന്താണ് ചെയ്യേണ്ടത്?
ഉത്തരം
ഒരു വ്യക്‌തിയുടെ ഉയരവും ശാരീരിക ഘടനയും അയാളിലെ ജനിതക ഘടകവുമായി ബന്ധപ്പെട്ടിരിക്കും. മാതാപിതാക്കളും മുത്തച്ഛനും മുത്തശ്ശിയും ഉയരക്കുറവുള്ളവരാണെങ്കിൽ തീർച്ചയായും അവരുടെ പിൻതലമുറക്കാരും ഉയരം കുറഞ്ഞവരായിരിക്കും.
ഈ പ്രായത്തിൽ സ്വന്തം ആരോഗ്യകാര്യങ്ങളിൽ ശ്രദ്ധിക്കുകയാണ് കുട്ടി ചെയ്യേണ്ടത്. നിത്യവും വ്യായാമം ചെയ്യുക. പോഷക സമ്പന്നമായ ഭക്ഷണം കഴിക്കണം. കുറഞ്ഞത് ഏഴു മണിക്കൂർ നേരമെങ്കിലും ഉറങ്ങണം. ആരോഗ്യകാര്യങ്ങളിൽ ശ്രദ്ധിക്കുകയാണ് കുട്ടി ചെയ്യേണ്ടത്. ഈവക കാര്യങ്ങളിൽ ശ്രദ്ധിക്കുന്നതുമൂലം വളർച്ചാ ഹോർമോണുകളുടെ ഉല്പാദനം ആരോഗ്യകരമായ നിലയിൽ നടക്കും.
കൗമാരപ്രായത്തിൽ നിത്യവും വ്യായാമം ചെയ്യുന്നത് ഗുണം ചെയ്യും. ഹോർമോണുമായി ബന്ധമുണ്ട്. വ്യായാമം ചെയ്യുന്നതിലൂടെ ഗ്രോത്ത് ഹോർമോൺ വലിയ അളവിൽ ഉല്പാദിപ്പിക്കപ്പെടും. ഇതുകൊണ്ട് ചെറിയ രീതിയിലുള്ള മാറ്റമുണ്ടാകാം. ക്രോസ് ബാറിൽ തൂങ്ങുന്നതുകൊണ്ട് അധികം നീളം ലഭിക്കുമെന്ന ധാരണ തെറ്റാണ്. പരസ്യങ്ങളിലും മറ്റും വരുന്ന നീളം കൂട്ടാൻ സഹായകമായ മരുന്നുകൾ ഗുണം ചെയ്യുകയില്ലെന്ന് ഓർക്കുക.
ചോദ്യം
22 വയസുള്ള വിദ്യാർത്ഥിനിയാണ് ഞാൻ, എന്‍റെ ഇടത് സ്തനം വലത്തെ സ്തനത്തേക്കാൾ ചെറുതും നിപ്പിൾ ഉള്ളിലേക്ക് വലിഞ്ഞുമാണിരിക്കുന്നത്. എന്തുകൊണ്ടാണ് ഇങ്ങനെ സംഭവിച്ചത്? ഏതെങ്കിലും ഗുരുതരമായ ആന്തരിക പ്രശ്നമുള്ളതുകൊണ്ടാണോ ഇങ്ങനെ?
ഉത്തരം
ഇരു സ്‌തനങ്ങളും തമ്മിൽ ആകാരത്തിലും വലുപ്പത്തിലും നേരിയ വ്യത്യാസമുണ്ടാകുന്നത് സാധാരണമാണ്. ഇതിൽ അസാധാരണമായ വ്യത്യാസം കാണുന്നുവെങ്കിൽ മാത്രം വൈദ്യപരിശോധന നടത്താവുന്നതാണ്. നേരത്തെ സാധാരണ രീതിയിലായിരുന്ന നിപ്പിൾ ഉള്ളിലേക്ക് വലിഞ്ഞിരിക്കുന്നുവെങ്കിൽ വൈദ്യപരിശോധന നടത്തണം.
നിപ്പിൾ ഉള്ളിലേക്ക് വലിഞ്ഞിരിക്കുന്നത് ഭാവിയിൽ പ്രശനമാകാം. ഒരമ്മയാകുമ്പോൾ കുഞ്ഞിനെ മുലയൂട്ടാൻ ഇത് തടസ്സമാകും. മറ്റൊന്ന്, കുറച്ചുകഴിയുന്നതോടെ ഉള്ളിലേക്ക് വലിഞ്ഞിരിക്കുന്ന നിപ്പിൾ താനേ ശരിയാകും. ഈ പ്രശ്നം ശരിയാകാൻ ഒരു ലഘുവ്യായാമവും ചെയ്തുനോക്കാം. എന്നും രാവിലെയും വൈകുന്നേരവും നിപ്പിളിന് രണ്ടുവശത്തായി തള്ളവിരലും ചൂണ്ടുവിരലും വെച്ച് പുറത്തേയ്ക്ക് വലിക്കാൻ ശ്രമിക്കുക. ഈ വ്യായാമത്തിലൂടെ ഈ പ്രശ്നം പരിഹരിക്കാനാകും. ഇത് മൂന്നുനാല് ആഴ്ചയോളം തുടരണം. അതുമല്ലെങ്കിൽ ഏതെങ്കിലും സർജനെ കണ്ട് പരിഹാരം തേടാം.
ചോദ്യം
53 വയസ്സുള്ള വീട്ടമ്മയാണ് ഞാൻ. വേഗത്തിൽ നടക്കുമ്പോഴും ഏണിപ്പടികൾ കയറുമ്പോഴും ശ്വാസം മുട്ടൽ അനുഭവപ്പെടുന്നു. അതുകൊണ്ട് എനിക്ക് വല്ലാത്ത അസ്വസ്ഥത അനുഭവപ്പെടുന്നു. ഞാൻ ഫാമിലി ഡോക്ടറെ കാണിച്ചെങ്കിലും ഒരു പ്രയോജനവുമുണ്ടായില്ല. ഒപ്പം മെഡിക്കൽ റിപ്പോർട്ടും വെക്കുന്നു.
ഉത്തരം
നിങ്ങളുടെ മെഡിക്കൽ റിപ്പോർട്ട് അനുസരിച്ച് ഹിമോഗ്ലോബിനും ബ്ലഡ് ഷുഗറും ചെസ്‌റ്റ് എക്സറേയും ഈ.സി.ജി.യുമൊക്കെ സാധാരണ നിലയിലാണ്. നിങ്ങൾക്ക് അനിമിയയോ, ഡയബറ്റീസോ, ഹൃദ്‌രോഗമോ കാണുന്നില്ല.
എന്നാൽ ബ്ലഡ്പ്രഷർ അല്പ‌ം കൂടിയ നിലയിലാണ്. അത് 140/96ൽ നിന്നും കുറച്ച് 120/80 ൽ ആക്കുകയാണ് വേണ്ടത്. അതിന് ശരീരഭാരം അല്പ‌ം കുറ‌യ്ക്കേണ്ടതായുണ്ട്. പതിവായി വ്യായാമം ചെയ്യണം. മാത്രമല്ല, ഭക്ഷണത്തിൽ ഉപ്പിന്‍റെ അളവ് നന്നേ കുറയ്ക്കണം. ആവശ്യമെങ്കിൽ ഡോക്ടറുടെ മേൽനോട്ടത്തിൽ മരുന്ന് കഴിക്കണം.
മാത്രമല്ല, ശ്വാസകോശങ്ങൾക്ക് അകത്തുള്ള ശ്വാസ നാളികൾ ചുരുങ്ങിയിരിക്കുന്നതായി റിപ്പോർട്ടിൽ പറയുന്നുണ്ട്. ആസ്തമാ. ബ്രോങ്കൈറ്റീസ് തുടങ്ങിയ അസുഖങ്ങളുള്ളത് കൊണ്ടാണ് ഇങ്ങനെ സംഭവിക്കുന്നത്. ഇക്കാര്യം നിങ്ങളുടെ ഡോക്ടർക്ക് എളുപ്പത്തിൽ കണ്ടുപിടിക്കാനാകും. രോഗനിർണയത്തിനു ശേഷം അതിനനുസരിച്ചുള്ള മരുന്നുകൾ കഴിച്ചാൽ മതി. നടക്കാനും കോണിപ്പടികൾ കയറാനും ബുദ്ധിമുട്ടുള്ള സ്ഥിതിക്ക് നിങ്ങളുടേത് ശ്വാസസംബന്ധമായ രോഗമാകാനാണ് സാധ്യതയെന്നാണ് അനുമാനിക്കാൻ കഴിയുന്നത്. എത്രയും പെട്ടെന്ന് വിദഗ്‌ധനായ ഒരു ഡോക്ടറെ കണ്ട് ചികിത്സിക്കുക.
